ཇ
སྤྱི་གཙུག་གངས་རི་འོད་གསལ་རིན་ཆེན་རྒྱན་གྱིས་རབ་མཛེས་པས།
སླར་ཡང་བར་སྣང་སྤྲིན་གྱིས་འཛིན་པར་ནམ་ཡང་སྐྲག་པ་མེད།
རང་དང་རྒྱུ་སྐར་སྐྱ་རེངས་གྲོགས་སུ་བསྡེབས་པ་དེ་ཡི་ཕྱིར།
སྙིང་གི་དབུས་སུ་མཚན་མོའི་གྲིབ་མ་གནས་པའི་གོ་སྐབས་བྲལ།
ལག་ཟུང་ཨ་མའི་སེང་གེའི་འོ་ཆང་བཏེགས་པའི་ཚེ།
སྙིང་གི་དཀྱིལ་དུ་འབྲུག་སྒྲ་འུར་འུར་སྒྲོགས་པ་བཞིན།
བྲག་རི་དང་མཚུངས་བརྟན་བརླིང་སྙིང་སྟོབས་ལྡན་པ་དེ།
སྙིང་རྗེའི་ཡུལ་གྱུར་ཞུམ་པའི་སེམས་དང་ཅི་ལ་འགྲོགས།
ཨ་མའི་བཀའ་དྲིན་དྲན་ཏེ་ས་ལས་ལངས་པ་ན།
ཆང་ལྟར་མངར་བའི་ཆུ་མིག་སྙིང་གི་ཁོང་ནས་བརྡོལ།
རང་ཉིད་སྔོན་ཆད་འགྲིམ་པའི་ལམ་ནི་གར་ཁྱབ་ཏུ།
གཞན་ཡིད་སིམ་པའི་བདུད་རྩིའི་གཟེགས་མ་གཏོར་བར་བྱས།
བདག་གིས་ཨ་མའི་གླུ་དབྱངས་བླངས་ཏེ་ལམ་དུ་བསྐྱོད་པ་ན།
འཇའ་ལྟར་མདངས་མཛེས་མེ་ཏོག་ཕོན་པོ་ལག་པའི་མཐིལ་དུ་བཞད།
རང་ཉིད་གོམ་པ་གར་སླེབས་ནོར་འཛིན་སྒེག་མོའི་འགྲམ་པ་ལ།
དུས་བཞིར་འཆག་མེད་གཡུར་དུ་ཟ་བའི་འབྲས་ལྡན་ལྗོན་ཤིང་བཙུགས།
བདག་གིས་རྟོགས་སོ་བློ་ཕུགས་གཏོད་ས་མེད་པའི་མི་སྐྱེས་ཏེ།
ཉིན་མཚན་གོ་ལྡོག་སྤྱོད་པའི་སྲིན་བྱ་འུག་པ་དག་དང་མཚུངས།
རང་གི་སྙིང་ལ་བྱ་རྒྱལ་ཁྱུང་གི་གཤོག་ཟུང་མ་སྐྱེས་ན།
ཆགས་ཐོགས་མེད་པར་རི་རྩེ་མཐོན་པོ་བརྒལ་བར་ག་ལ་ནུས།
བདག་གིས་རྟོགས་སོ་འཚོ་བའི་འདུན་མར་ཡིད་ཆེས་བྲལ་བའི་མི།
འགྲོ་ཐབས་འདུག་ཐབས་བྱེད་པས་ཚེ་སྐྱེལ་ཆར་སྡོད་བྱེ་འུ་བཞིན།
རང་གི་སྙིང་ཁོང་ཁུ་བྱུག་ལྟ་བུའི་དབྱངས་ཀྱི་རྩལ་མེད་ན།
ལོ་རེ་བཞིན་དུ་དཔྱིད་ཀྱི་མཛེས་སྡུག་འགུགས་པར་ག་ལ་ནུས།
མེ་ཏོག་ལྟེ་བར་འཁྱིལ་བའི་བཅུད་མཆོག་ལོངས་སུ་སྤྱོད་འདོད་ན།
ལག་པ་འབིགས་པའི་སེ་བའི་ཚེར་མར་སྐྲག་པ་ག་ལ་རུང་།
ཨ་མའི་སེམས་ཀྱི་གདུང་བའི་དྲི་མ་དག་པར་བཀྲུ་བའི་ཕྱིར།
བདག་ནི་མདའ་རྣོན་འཆང་བའི་བུང་བ་གྲོགས་སུ་བསྡེབ་པར་འདོད།
འཇའ་ཚོན་ཞགས་རིང་འཕངས་ནས་རེ་བའི་རི་དྭགས་རྔོན་བྱེད་ན།
གཉིད་དུ་ཤོར་སྐབས་རྐང་རྗེས་འདེད་པའི་ཁྱི་གུར་ཅི་ལ་སྐྲག།
དྲིན་ཅན་ཨ་མས་རིང་ནས་མོས་པའི་འདོད་དོན་འགྲུབ་པའི་ཕྱིར།
བདག་གི་ཤ་ཁྲག་ཕུང་བོ་འདོམ་གང་འདི་ཡང་སྤོང་བར་ནུས།
གསོམ་ཤུགས་ལྗོན་པས་གྲང་ངར་ལྷགས་པ་ལྡང་བའི་དགུན་ནག་ཐུབ་པ་དེ།
རང་བྱུང་ཁམས་ཀྱིས་དུས་བཞིར་སྔོ་བའི་རང་གཤིས་བཟང་བོ་བསྐྲུན་ལས་བྱུང་།
རྒྱ་མཚོ་ཆེན་པོ་བསྲུབས་ནས་གཙང་ཞིང་དྲི་མེད་མར་གསར་བླངས་པ་ལས།
ཨ་མའི་སྙིང་རྩེར་སྦར་བའི་དངུལ་གྱི་ཚེ་འབར་མར་གྱིས་བཀར་བར་བྱ།
གངས་ཀྱི་ལྷུན་པོས་ཤེལ་དཀར་ཕུང་བོ་གྱེན་དུ་འགྲེང་བྱས་ནས།
བདག་ལ་འོད་དཀར་སྤྲོ་བའི་མདུན་ལམ་མཆོག་དེ་འདིང་བ་དང་།
ཨ་མས་དགེ་མཚན་སྩོལ་བའི་ཤིས་ཚིག་དབྱངས་སུ་གྱེར་པ་ཡིས།
ཚེ་གང་ལུས་གནས་རྣམས་ཤེས་མཛེས་སྡུག་བྱད་ཉམས་ཐོན་པར་མཛོད།
བདག་ནི་གླུ་གར་བྱས་ཏེ་དགུང་སྔོན་དབྱིངས་སུ་ཕྱིན།
གཏོང་ཕོད་ལྡན་པའི་སྔོ་བསངས་མ་ལས་ལེགས་སྐྱེས་བསླངས།
གལ་ཏེ་རླབས་ཆེན་གནམ་སྔོན་འདུ་ཤེས་ཡོད་བདེན་ན།
བདག་ལ་རྟ་ལྗང་བདུན་གཡོར་འོད་སྟོང་འདྲེན་པར་བྱ།།