སྔོན་གླིང་གོ་ལ་ཟླུམ་པོའི་ཁྱོན་ནི་ས་ཡི་དཀྱིལ་འཁོར་ཕུང་པོ་ཞིག།
     རིམ་གྱིས་གཡུ་མདོག་མཚོ་ཆེན་ཆགས་པ་རིན་ཆེན་སྣོད་ལ་བདུད་རྩིས་འཁྱིལ།།
     དར་ཞིང་རྒྱས་པའི་མཚོ་མོའི་ཀློང་དུ་ཆུ་སྲིན་རུས་སྦལ་གསེར་ཉ་སྐྱིད།།
     འདུས་བྱས་ཐམས་ཅད་རང་བཞིན་འགྱུར་བས་མཚོ་སྐྱོར་ར་བའི་ཁ་རལ་ནས།།
     སྐམ་ས་ཆེན་པོར་གྱུར་པའི་ཚེ་ན་རྩི་ཤིང་ནགས་ཚལ་རི་དྭགས་འཕེལ།།
     ཁྱད་པར་བློ་རིག་རྣོ་ལ་རྒོད་པའི་སྤྲ་དང་སྤྲེའུའི་རྒྱུད་འཕེལ་བར།།
     ཕ་རྒྱུད་སྤྲེའུ་བྱང་ཆུབ་སེམས་དཔའ་མ་རྒྱུད་བྲག་སྲིན་གཉིས་ཡིན་སྐད།།
     སྤྲེའུ་དང་བྲག་སྲིན་བཟའ་མི་བྱས་པར་སྤྱོད་ལམ་དྲུག་སྐྱེས་སྤྲེའུ་ཕྲུག་ནི།།
     དམྱལ་བའི་ཡུལ་གྱི་གནས་ནས་ཚེ་འཕོས་ཞལ་ངོ་གནག་ཅིང་སྡུག་བསྲན་བཟོད།།
     ཡི་དྭགས་གནས་ནས་ཚེ་འཕོས་སྤྲེའུ་བཞིན་རས་མི་སྡུག་ཟས་ལ་གདུང་།།
     དུད་འགྲོའི་གནས་ནས་ཚེ་འཕོས་སྤྲེའུ་ལུས་སྟོབས་གཟི་མདངས་ཉམས་ཤིང་གླེན།།
     མི་ཡི་གནས་ནས་ཚེ་འཕོས་སྤྲེའུ་ཤེས་རིག་འཕེལ་ཞིང་ཡིད་སེམས་ཆུང་།།
     ལྷ་མ་ཡིན་གྱི་གནས་ནས་ཚེ་འཕོས་ཕྲག་དོག་ཆེ་ཞིང་གཤིས་སྤྱོད་ངན།།
     ངང་རྒྱུད་རིང་ལ་བློ་སེམས་དགེ་བ་ལྷ་ཡི་གནས་ནས་ཚེ་འཕོས་པར།།
     རི་དང་ཐང་གི་ཤིང་འབྲས་དག་གིས་འཚོ་ཞིང་གཞེས་ནས་རང་གཤིས་འགྱུར།།
     རིམ་བཞིན་ནགས་ཚལ་ཉམས་ཤིང་རྒུད་ནས་རི་སྐྱེས་འབྲུ་རྣམས་ཉུང་བར་གྱུར།།
     འཚོ་བའི་ཟས་ལ་དཀའ་ཁག་འཕྲད་དུས་བློ་རྒོད་སྤྲེའུའི་རྩེད་ཐང་དུ།།
     ཤིང་ཐུར་བཀོལ་ནས་ས་ཁུང་བརྐོས་པར་རྒོད་སྐྱེས་འབྲུ་འཕངས་རིམ་གྱིས་ནི།།
     ཞིང་སར་གྱུར་ཏེ་ཟས་ཚོགས་འཚོ་ཙམ་ཞིང་ལ་སྔ་བ་ཟོ་དང་ཞིང་།།
     སྤྲེའུ་རྣམས་བློ་རྣོ་ལུས་སྟོབས་རྒྱས་ཏེ་ཡར་ལུང་ཁོག་ཏུ་མིའི་རིགས་ཆགས།།
     འཕེལ་འགྲིབ་འགྱུར་བག་དབྱར་ཁའི་གནམ་ལྟར་མི་རབས་ཕྲེང་བསྟར་བརྒྱུད་པའི་ཁྲོད།།
     རྒྱལ་རབས་རིམ་བྱོན་ཉི་ཟླའི་ཟོལ་དུ་སྟོད་ཀྱི་སྟེང་གཉིས་གནམ་གྱི་ཁྲི་བདུན།།
     བར་གྱི་ལེགས་དྲུག་སེ་ལྡེ་བརྒྱད་ནས་འོག་གི་བཙན་ལྔ་འཁྲུངས་པའི་མཐུས།།
     གསར་གཏོད་གསར་བཟོ་གསར་སྤེལ་བགྱིས་ཏེ་མི་རབས་ཕྱི་མར་མཛད་རྗེས་བསྐྲུན།།
     སྔོན་བྱོན་མཁས་པ་བགྲང་ཡས་སྐར་བཞིན་འཛིན་མའི་པང་འདིར་ལེགས་བཞུགས་པར།།
     གསུང་འབུམ་བཀའ་ཆོས་རི་རབ་བརྩིགས་ཏེ་འབྱིང་དཔོག་དཀའ་བ་མཚོ་ལས་ཟབ།།
     སྔོན་བཞུད་མེས་པོའི་དྲི་མེད་དྲིན་ལ་ད་ལྟའི་ཤུལ་བཞག་རིག་གནས་ཀུན།།
     མ་དཔོད་མ་སྦྱངས་མིག་ལ་བསྟར་ཡང་གྲངས་ཚད་མངོན་རྫོགས་ཡོད་རེ་སྐན།།
     འཁོར་འགྲོས་བར་ནས་སྟོང་ལོ་འདས་ཀྱང་ཉམས་མེད་འཇིག་བྲལ་ཤེས་རིག་བྱིངས།།
     ལོ་ཟླའི་བར་ན་འོད་དུ་རབ་འཚེར་གཟི་བྱིན་བཀྲ་བའི་ཉི་གཞོན་ཉིད།།
     འོན་ཏེ་དུས་ཀྱི་གདགས་སྲིབ་བར་ནས་ཆགས་འཇིག་སྣ་མང་འབྱུང་བའི་མཐར།།
     ལ་ཤས་ཉམས་དམས་རེ་ཐག་ཟད་པ་རི་རྩེའི་ཟོམ་གྱི་དར་ཧྲུལ་མཐུན།།
     ངེད་ཅག་མ་ཞུམ་སྤོབས་པའི་དཔའ་གདེངས་མཐོན་པོར་བཏེགས་ཏེ་སླར་གསོའི་སྨན།།
     ཐོལ་གྱིས་དྲངས་ནས་རྒྱུད་འཛིན་ལེགས་སྤེལ་གཅིག་མཐུན་བརྩོན་ལེན་བྲེལ་བར་གཅེས།།
     ད་ལྟའི་སྤྱི་ཚོགས་ཁྱོན་ན་འདུར་བའི་བགྲང་ཡང་མིའི་རིགས་འདི་ཀོ་ཡིས།།
     ཚན་རྩལ་འཕྲུལ་གྱི་འཁོར་ལོ་བསྐོར་ཏེ་འཇིག་རྟེན་རིལ་མོ་ལག་མཐིལ་འདྲེན།།
     གནའ་དེང་དུས་ཀྱི་ཧེ་བག་བསམ་ན་ཡ་ཆུང་ཁོག་ནས་ཟུག་རྔུ་ཕྱུང་།།
     ད་ཆ་མ་སྡོད་རྒན་གཞོན་ཕོ་མོ་ཧུར་ཐག་གསེར་སྐུད་ལྷན་དུ་སྦྲེལ།།
     མ་འོངས་འབྱུང་འགྱུར་འཕེལ་རྒྱས་མགྲིན་དུ་གོམ་སྣེ་མ་ལྷོད་སྐྱོད་ཅིག་ཨང་།།