ཅ
འདི་ནས་སྣེ་བཟུང་རིང་དུ་བརྐྱངས་པའི་ལམ་ཆེན་དེ།
གངས་དཀར་རླབས་ཕྲེང་མཁའ་ལ་འཕེན་པའི་ཆུ་ཀླུང་བཞིན།
བདག་གི་རྫ་ཆུ་ཕྲ་མོའི་རྒྱུན་འདྲའི་གླུ་དབྱངས་འདི།
གནམ་ས་རལ་སྙམ་བྱེད་པའི་རྒྱ་མཚོའི་འུར་སྒྲར་བསྲེས།
ངེས་པར་ད་མཚམས་ཁོ་ནར་བདག་གི་ཚོར་སྣང་ལ།
མི་ཡི་དབང་ཐང་བབ་ཆགས་གཟི་བརྗིད་འཕྲོ་བར་མཐོང་།
རེ་ལྟོས་མེར་གྱིས་གང་བའི་རྒྱ་མཚོ་ཆེན་པོ་དེས།
འབྲུག་ལྟར་ལྡིར་བའི་གླུ་དབྱངས་ལེན་པའི་གོ་སྐབས་བྱིན།
བྱ་རྒོད་རླུང་འཚུབ་དང་ནི་ཆུ་འཛིན་མཐུག་པོའི་གསེབ།
འཕུར་ལ་དགའ་བ་སྟོབས་ལྡན་གཤོག་རྩལ་ངོམ་པ་མིན།
དེ་ནི་ཁོ་བོས་སྙིང་སྟོབས་སྤོབས་པ་ལེགས་བསྐྱེད་ནས།
མི་ཡི་དཔུང་བས་ཅི་ཙམ་འདེགས་བཟོད་དཔོག་པར་བསྐུལ།
གངས་རི་དར་དང་ཁ་བའི་ཁྲོད་དུ་ལངས་པ་ཡང་།
དངུལ་གྱི་མདངས་འཛིན་སྦྲ་གུར་ངོམ་པ་མ་ཡིན་ཏེ།
དེ་ནི་ཨ་མའི་མངགས་བཅོལ་དང་བླངས་ཁོ་བོ་ལ།
དུང་ལྟར་འཚེར་བའི་གླུ་ཡི་མགྲིན་པ་སྟེར་བ་ལགས།
བདག་ནི་གངས་རིའི་མགུལ་ནས་འོངས་པའི་གླུ་པ་སྟེ།
དྲང་བདེན་གླུ་ཡི་ལེན་སྟངས་གང་ཡིན་བདག་གིས་ཤེས།
ཁོང་ནས་ཕྱུང་བའི་དབྱངས་ཀྱི་འགུགས་འཁྱེར་ལེགས་པའི་ཕྱིར།
རྒྱུན་པར་ཨ་མའི་བྲང་གར་རྣ་བ་གཏད་ནས་ཉན།
དེ་ནི་དབྱངས་ཀྱི་ཡོན་ཏན་ཀུན་འབྱུང་རྩ་གནད་དེ།
དེ་ལས་རི་བོ་འབུམ་གྱི་གཏེར་བཅུད་བདག་ལ་ཐོབ།
ལུས་ཀྱི་རྩ་ཀུན་ཁྱབ་པའི་ཁྲག་གི་རྒྱུན་ཇི་བཞིན།
རྡུལ་གྱི་ཆ་རེར་མ་ཡི་ནུ་ཞོའི་བཅུད་ཀྱིས་གཏམས།
བདག་གིས་གླུ་གར་བྱས་ཏེ་སྤང་ལྗོངས་ཆེར་ཕྱིན་ནས།
ཨ་མས་བསླབས་པའི་གླུ་ཚིག་བློ་ལ་འཇགས་པར་བཟུང་།
སླར་ཡང་གླུ་གར་བྱས་ཏེ་དགུང་སྔོན་དབྱིངས་སུ་སོང་།
གཟའ་སྐར་རྣམས་ནི་ཕར་བསྐྱལ་འོད་སྟོང་ཚུར་ལ་བསུས།
མདུན་ལམ་མདའ་ལྟར་དྲང་ཞེས་གདེང་ཁེལ་བྱེད་དཀའ་སྟེ།
སྐབས་འགར་ལ་ལུང་ཁུག་ཀྱོག་ཡང་ཡང་འགྲིམ་ཡང་སྲིད།
རྩེ་གཅིག་རྒྱ་མཚོར་འབབ་པའི་ཆུ་ཀླུང་སྟོང་ཕྲག་དེའང་།
རི་ལུང་མང་བོ་བསྐོར་ནས་དལ་གྱིས་འབབ་པ་བཞིན།
མདུན་ལམ་དེ་ཡང་གཅིག་ཏུ་བདེ་ཞིང་སྙོམས་མིན་ཕྱིར།
སྐབས་འགར་རྐང་མགོ་བགྲོད་དཀའི་དཀན་གཟར་དག་ལའང་ཐུག།
གལ་ཏེ་ལམ་ནི་བདེ་ཞིང་སྙོམས་པར་ངེས་སྲིད་ན།
ཨ་མས་འབད་པས་བདག་ལ་ལག་ཟུང་བསྐྲུན་དོན་ཅི།
ངེད་ཅག་བརྒྱུད་ནས་འོངས་པའི་འགྲིམ་ལམ་དུ།
དོན་མེད་ཉེས་ཆད་འོས་མེད་སྡུག་བསྔལ་མྱངས།
མགར་པས་ལག་པ་གཡས་པའི་ཐོ་བ་ཡིས།
རང་གི་ལག་གཡོན་བསྣུན་པའང་སྐབས་འགར་མཐོང་།
དེ་ལྟ་ན་ཡང་ཕྱིར་ཆད་འགྲིམ་ལམ་དུ།
ཤ་རུས་རྐང་ལག་གཅེས་པར་འཛིན་དགོས་ཏེ།
མཆུ་འབིགས་མཆེ་བ་བགྲད་པའི་སོ་དེ་ཡིས།
སྙིང་གཏམ་བཤད་པའི་ལྕེ་རྩེ་ལྡོད་མ་འཇུག།
ད་ནི་བདག་ཀྱང་བྱིས་པའི་བླུན་སྐྱོན་དག་དང་བྲལ་གྱུར་པས།
ལམ་དུ་རྐང་ལག་ཕྱིད་པའི་གྲང་ངར་མེད་པར་ག་ལ་རློམ།
འོན་ཀྱང་གནམ་མཚོ་ཕྱུག་མོའི་དར་དང་ཁ་བ་ཞུ་བར་རྩོམ།
ངང་ངུར་ཁྱུ་ཚོགས་དབྱངས་སྙན་སྒྲོགས་པའི་མགྲིན་པའི་མདུད་པ་གྲོལ།
འགྲིམ་ལམ་འདི་རུ་སྙན་འཇེབས་གླུ་ཡི་རོལ་མོའི་རྒྱུན་ནི་མ་ཆད་ན།
བུ་དང་ཚ་བོ་རང་དགར་བཤའ་བའི་ཤ་སྐམས་དག་ཏུ་མི་འགྱུར་སྙམ།
བདག་ནི་ཚེ་གང་རྩེ་གཅིག་ཡིད་ཀྱིས་རླབས་ཆེན་དོན་འདིར་མགྲིན་པ་འདེགས།
མེ་ལྟར་དམར་བའི་ཉི་མའི་འོད་ཀྱིས་འཛམ་གླིང་ཁྱོན་ཀུན་ཁྱབ་པར་སྨོན།
ཡག་ག་ཡག་ག་དེ་རིང་ཡག།
གངས་རིས་ཕྱག་ཟུང་བརྐྱངས་ཏེ་སྣང་བྱེད་རིན་ཆེན་བཏེགས།
ཡག་ག་ཡག་ག་དེ་རིང་ཡག།
ཨ་མས་རིན་ཆེན་སྣོད་དུ་སེང་གེའོ་འོ་ཆང་བཙགས།