སྤྲིན་དང་སྨུག་པའི་ན་བུན་འཁྱིལ་བའི་མདུན་གྱི་རི་བོའི་ནགས་གསེང་ནས། །
     སུ་དང་གང་ལ་སྐྱོ་བ་སྟེར་བའི་ཁུ་ལོའི་གསུང་སྐད་སྙན་མོ་འདིར། །
     སྔོན་གྱི་དུས་སུ་ཙོང་ཁ་པ་ཡིས་ཨ་མ་དྲན་པའི་གཏམ་རྒྱུད་ཡོད། །
     དེ་རིང་ས་མཐའི་ཨ་ཇོ་ང་ཡིས་གྲོགས་ཀྱི་ཞལ་རས་ཝ་ལེར་དྲན། །
     དུས་རབས་འཕེལ་ཁ་ཉིན་བཞིན་དར་བས་སྣ་ཚོགས་གྱོ ན་ཆས་མང་ཡང་ཆོག །
     ཁྱོད་ཀྱིས་དགའ་མོས་དེ་དང་བསྡོངས་ནས་ཆ་ལུགས་འདྲ་མིན་བསྒྱུར་ཀྱང་རུང་། །
     རང་སྐད་གཙང་མའི་སྲོག་དང་མ་བྲལ་རང་གཤིས་རྣལ་མར་གནས་ཡོད་ན། །
     ཡུལ་གྱིས་བསྐལ་བས་སོ་སོར་གྱེས་ཀྱང་སྙིང་གི་གྲོགས་ལ་དུངས་པ་ཟབ། །
    
     ཁྲི་གདུགས་ཉི་མ་ལམ་ལམ་འབར་བའི་དབྱར་གྱི་དཔལ་མོའི་དུས་སྐབས་འདིར། །
     ལྕང་སྡོང་ཡལ་ག་འཐབ་པའི་གསེབ་ཏུ་མཛའ་གཅུགས་གྲོགས་པོ་རེ་རེ་ཡིས། །
     ཕན་ཚུན་བརྩེ་བའི་ལག་གདང་སྦྲེལ་ཏེ་ཟོལ་མེད་སྙིང་གཏམ་གླེང་བའི་སྐབས། །
     གྲོགས་མེད་གཅིག་པུར་ལུས་པའི་བུ་ངས་ཁྱོད་ཀྱི་མིང་ཡིག་ཁོ་ན་ཟློ། །
    
     རྡོ་བའི་ཁྲོད་ཀྱི་ཆུ་བོ་འདི་ལ་དུས་རབས་གསར་བའི་སྙན་ངག་པས། །
     དྭངས་གཙང་བསང་ཆུ་སྔོན་མོར་བོས་ཀྱང་ཁོ་བོས་དེ་ལྟར་མི་འདོད་དེ། །
     མི་གཙང་རྫས་ཀྱི་གད་སྙིགས་ཁྲོད་ནས་བཪྙས་བཅོས་ན་ཟུག་མ་བཟོད་པར། །
     ཉམ་ཐག་གདུང་པའི་སྨྲེ་ངག་འདོན་པ་ཡིད་མཐུན་གྲོགས་ཀྱིས་གསན་ལགས་སམ། །
    
     བཀོད་ལེགས་ཁང་བརྩེགས་དགུང་ལ་ཟུག་པའི་ཤེས་རིག་འོད་ཀྱི་སློབ་གླིང་ནས། །
     དུས་ཀྱི་རྟ་ཕོའི་རྗེས་སུ་སྙེག་པའི་གཞོན་སྐྱེས་དར་མའི་དཔུང་ཁག་འདིས། །
     འབྲི་ཀློག་དཔྱད་གསུམ་འབད་པས་གཉེར་ཞིང་སྒྱུ་རྩལ་རྩེད་འཇོར་རོལ་བའི་དུས། །
     རྒྱང་རིང་ཡུལ་གྱི་གྲོགས་པོ་བསམ་ན་སྐྱོ་བའི་རླབས་རྒྱུན་བྲག་ལ་རྡེབ། །
    
     ས་ཞིང་གྲུ་བཞིའི་རྣང་མའི་བར་ན་ཁོམ་པ་བྲལ་བའི་ཨ་མ་དེས། །
     སེར་གས་ཁྱབ་པའི་ལག་པ་ཟུང་གིས་རྩྭ་ལྡུམ་རྐེད་པར་བཅིངས་བྱས་ཏེ། །
     ལོ་ཟླའི་གཉེར་རིས་ཐོད་ལ་བསུ་བཞིན་འཇིག་རྟེན་འཚོ་བའི་གྲུབ་ངོགས་ནས། །
     མི་བཟོད་ངལ་བའི་རྡོག་ཕྲེས་མང་པོ་ཁྱོད་ཀྱི་ཕྱིར་དུ་འཁུར་གྱིན་ཡོད། །
    
     སྣ་ཚོགས་ཚོང་ཟོང་ཐང་མར་བརྡལ་བའི་ཡ་མཚན་སྒྱུ་མའི་གྲོང་ཁྱེར་ནས། །
     དོན་མེད་གཡེང་བས་དུས་ཚོད་སྐྱེལ་བའི་ཁྱོད་དང་ང་ཡི་སྤྱོད་སྟངས་འདིས། །
     ཁྱིམ་རྒྱུད་ཅིག་གི་རྔུལ་ཆུའི་ཡོང་འབབ་ཕངས་མེད་རླུང་ལ་བསྐུར་བ་ལས། །
     མི་ཚེ་ཞིག་གི་རྡོག་དོན་ཨེ་འགྲུབ་གྲོགས་པོ་ཁྱོད་ཀྱིས་ཞིབ་ཏུ་སོམས། །
    
     གློག་ཞུན་སྣ་ལྔའི་འོད་གོར་འཁྱིལ་བའི་མཚར་སྡུག་གར་གྱི་སྟེགས་བུ་ན། །
     ཉམས་འགྱུར་སྟོང་གི་སྒྱུ་རྩལ་རྫོགས་པའི་རྩེད་འཇོའི་གར་ལ་མཁས་པ་དེས། །
     སྙན་མོ་གླུ་ཡི་འགྱུར་ཁུགས་དྭངས་མོས་ཁོ་བོའི་སེམས་པ་སྒུལ་བའི་ཚེ། །
     དེ་འདྲའི་ཡོན་ཏན་རྫོགས་པ་མིན་ཡང་ཁྱོད་ཀྱི་གླུ་སྐད་ཡང་ཡང་དྲན། །
    
     བརྩེ་བའི་གཤོག་ཟུང་ལྗིད་ཀྱིས་མནན་པའི་ངང་པ་སེར་པོ་མཚོ་ནས་ལུས། །
     མགྱོ གས་པའི་བང་ཁ་མདའ་ཡིས་བཅོམ་པའི་ཤ་བ་སྨུག་ཆུང་སྤང་ནས་ལུས། །
     དྲན་པའི་གདུང་བ་སྙིང་ལ་ཕོག་པའི་གཏོལ་མེད་གཞོན་ནུ་ཡུལ་ནས་ལུས། །
     ཀྱེ་མ་ཕལ་བའི་ལུས་རྟེན་འདི་ལ་མི་ཐེག་ཁུར་པོ་ཇི་འདྲའི་ལྕི། །
    
     མགོ་རུས་སྐམ་པོ་མ་འཐོར་བར་དུ་གྲོགས་ལ་འཁྲེང་བའི་མིག་ཆུ་ཡོད། །
     སེམས་ཀྱི་འཆར་སྒོ་མ་འགག་བར་དུ་གྲོགས་ལ་བྲི་བྱའི་སྙན་ངག་ཡོད། །
     སྒྲིབ་གཉིས་མུན་པ་མ་སངས་བར་དུ་གྲོགས་ལ་ཞེན་པའི་ཉོན་མོངས་ཡོད། །
     མདོར་ན་གྲོགས་ཀྱི་གཟུགས་བཪྙན་རེ་རེ་དུས་ཀུན་མིག་ལ་ཤར་ནས་ཡོད། །