ཞོགས་པ།
ཞོགས་པའི་ཉི་ཟེར་ས་གཞིར་འཕྲོས་བ་ན། །
སྨན་ཤར་ན་ཆུང་བུ་མོ་གཞོན་ནུ་མའི། །
དགོ་དགོ་དབྱངས་རྟ་ངག་ལ་གྱེར་བཞིན་དུ། །
ཐུལ་དཀར་འབྲི་མོའི་འོ་མ་ཤག་ཤག་བཞོ། །
ཉིན་གུང་།
སྔོ་ལྗང་རླབས་ཕྲེང་འཕྱོ་བའི་རྩྭ་ཐང་ན། །
གཡང་དཀར་ལུག་ཁྱུ་སྐར་ཚོགས་བཞིན་དུ་བཀྲམ། །
ཁུ་ལོའི་གྲེ་འགྱུར་སྙན་མོ་སྒྲོག་དང་ལྷན། །
རྫི་བོས་དགའ་སྤྲོའི་ངང་ནས་ནོར་ལུག་འཚོ། །
ས་སྲོད།
ཁྲི་གདུགས་ཉི་མ་ནུབ་རིའི་ཕག་ལ་ཡིབ། །
སྔོ་ལྗང་རླབས་ཕྲེང་འཕྱོ་བའི་རྩྭ་ཐང་འདིར། །
རྫི་བོས་དགའ་སྤྲོའི་སྤྲོ་གླུ་གྱེར་བཞིན་དུ། །
བལ་ལྡན་མ་བུ་ལྷས་རྭའི་འདབས་ལ་འདེད། །