དཔྱིད།
   དཔྱིད་ཀྱི་ཕོ་ཉས་གསུང་སྙན་སྒྲོག་དང་ལྷན། །
   མཐོ་སྒང་སྒེག་མོ་ཏིང་འཛིང་སྦུབས་ལས་གྲོལ། །
   འཇིག་རྟེན་ཡངས་པོར་ཚེ་སྲོག་འབུལ་དང་བསྟུན། །
   ཡོད་ཚད་གཉིད་ལས་བསླངས་ཏེ་དཔྱིད་དཔལ་བསུ། །
འཛིན་མའི་དཔྱིད་དཔལ་རྒྱས་པའི་ལང་ཚོ་ལས། །
མར་གད་མདངས་འཛིན་ལུས་སུ་ལེགས་གཡོགས་ཏེ། །
སྐྱིད་པའི་བྲོ་དང་དགའ་བའི་གླུ་ལེན་བཅས། །
དཔྱིད་དཔལ་དུས་གསར་དགའ་སྤྲོའི་ངང་ནས་ལྷགས། །
དབྱར།
    རོ་བརྒྱའི་དྲི་བསུང་རྩྭ་ཐང་ངོས་སུ་འཐུལ། །
    ཕྱོགས་ཕྱོགས་མགྲོན་དུ་ཕེབས་པའི་བུང་བའི་ཁྱུ། །
    ས་བཅུ་དགེ་འཛོམས་ཡུལ་ལྗོངས་ཁྱད་འཕགས་སུ། །
    མགྲིན་རྔ་ཡང་མོར་བརྡུང་བ་རྒྱུད་མངས་འདྲ། །
སྐབས་གསུམ་ཡུལ་ནས་འཕོ་འདྲའི་གནས་མཆོག་ཏུ། །
ནེའུ་གསིང་གཡུ་ཡི་མེ་ལོང་འཕྱིས་འདྲའི་ངོས། །
རྒྱུ་སྐར་ས་ལ་ལྷུང་འདྲའི་ཕྱུགས་ཟོག་རྗེས། །
རྫི་བོའི་མགུར་གླུ་དབྱངས་ཅན་མ་ལ་འཁུ། །
     སྟོན།
གསེར་ཞུན་ལན་བརྒྱར་བྱུགས་པའི་ཞིང་ས་ཀུན། །
གསེར་མདངས་གོས་ཀྱིས་ལེགས་པ་རབ་གཡོགས་བ། །
ངུར་སྨིག་བཙུན་པ་མ་གྲོས་མཉམ་མཐུན་གྱིས། །
སྟོན་དུས་དགའ་སྟོན་ཆོ་གར་ཕེབས་པ་འདྲ། །
གཡུར་ཟ་འབྲས་བུ་སྨིན་པའི་དུས་ཚིགས་སུ། །
དགའ་བ་འབུམ་གྱིས་མྱོས་པའི་ཞིང་པ་རྣམས། །
སྙན་མོ་གླུ་དང་བཅས་ཏེ་སྟོན་བསྡུ་བའི། །
རྣམ་པ་ཇི་སྲིད་བར་དུ་གནས་གྱུར་ཅིག །
དགུན།
  སྤང་ལྗོངས་མདངས་ཉམས་གཅེར་བུ་ལུས་པ་ལ། །
 ལྷ་ཡི་བུ་མོས་བྱམས་དང་སྙིང་རྗེ་ཡིས། །
 ཁ་བ་གོས་དཀར་ཟོལ་གྱིས་གཏོར་བ་ན། །
 དར་དཀར་གོས་བཟང་བཀླུབས་པའི་བརྟུལ་ཞུགས་འཛིན། །
དལ་འགྲོ་མ་ཡིས་མཐོང་མུར་ཕྲག་དོག་གིས། །
ལུས་ལ་གཟབ་མཆོར་སྤྲད་པའི་སྒེག་མ་བཞིན། །
ཟ་འོག་དར་ཟམ་ལས་གྲུབ་ཕོ་བྲང་དུ། །
ལྷུང་ལྷུང་སྒྲ་ཡིས་གསང་གཏམ་ལྷུག་པོར་བརྗོད། །