འཇིག་རྟེན་འཇིག་རྟེན་དུ་ཤེས་པ་ནས་བཟུང་།
ཁྱེད་རང་དགོད་སླ་ལ་ངུ་ཡང་སྐྱེན། 
ཐ་སྙད་ཀྱི་རྫ་བུམ་ཆེ་ཆུང་དུ་མ།
སིལ་བུར་བཅག་སྟེ།
ནམ་མཁའ་དང་ནམ་མཁའ་ཡུག་གཅིག་ཏུ་བསྲེས། །
རེ་དོགས་ཀྱི་སྐུད་པ་རྐྱ་ཞིག་ཀྱང་།
རྣམ་བཞག་གི་ཁབ་མིག་ཇི་ལྟར་སྐྱེད།
གཅིག་ནོ་ཡོད་པའམ་ཡིན་པ་དང་།
ཅིག་ཤོས་ནི་མེད་པ་དང་མིན་པའི་མིག་ཟུང་དེ།
ཇི་ལྟར་བགྲད་ཀྱང་། ཁྱེད་རང་མི་ཤོང་བས།
སྐུ་ན་ལྔ་བཅུའི་གྲངས་ལ་ཉེ་བའི་ཚེ།
(མིན__ལོ་གྲངས་ལྔ་བཅུ་ནི།
དུས་ཀྱི་བགྲོད་པ་ལགས་ཀྱི།
ཁྱོད་ཀྱི་ན་གཟུགས་ག་ལ་ཡིན།
ཁྱེད་ཀྱིས་སྡོམ་ཚིག་བགྲེས་པོ་ཞིག་བཞག་མེད་ལ།
རྒས་འཁོགས་ཀྱི་རྒན་སྙན་ངག་ནི་དེ་བས་ཀྱང་བྲིས་མ་མྱོང་། )
འཇིག་རྟེན་གྱི་མགོ་བོ་ཁྲག་ལ་བསྒྲེས་ཏེ།
འཇིག་རྟེན་ལས་འདས་པའི་སྒོ་གླེགས་བརྡུངས་པ་ན།
བདག་གིས་ནི་རི་རབ་རིབ་ཀྱི་ས་སྲོད་ཅིག་ལ། ཁྱེད་རང་ལན་མེད་པའི་འདྲི་རྟགས་དུ་མ་ལས་གྲུབ་པའི།
ལྕགས་ཐག་རིང་པོ་ཞིག་དྲུད་དེ།
ས་སྒང་གི་གངས་ཐིག་མཐོ་ཤོས་ལས།
དལ་བུར་བཞུད་པ་མཐོང་།
སྡིག་བོའུ་ཁྲ་རིང་གི་ཁ་ན་འཐིབས་པའི།
རྫས་དུད་མོག་པོ་དེ་ཡུན་གྱིས་དྭངས་པ་ན།
ཁྱོད་ཀྱི་བང་སོ་དེ།
ལོ་རྒྱུས་ཀྱི་དཀྱོག་མཚམས་ཤིག་ནས་ཪྙེད་བྱུང་།