འདབ་ལོ་ས་ལ་ལྷུང་བའི་ཉམས་འདི།།
     སེམས་ལ་ན་ཟུག་འཇོག་མཁན་ཡིན་པས།།
     མཆི་མ་རས་དཀར་ངོས་སུ་འབྲི་བཞིན།།
     ཨ་ཐང་གྲང་མོ་རླུང་ལ་བསྐུར་སོང་།།
    
     སྨིན་ལེགས་འཛིན་མའི་པད་གདོང་ཚལ་ལ།།
     ཞེ་སྡང་འཚུབ་མའི་སེན་རྗེས་བཀོད་དེ།།
     ཁོར་ཡུག་རི་བོའི་སྒེག་ཉམས་འཕྲོག་པ།།
     སྨྲེང་སུན་འདེགས་པའི་ཀ་བ་ཡིན་སོང་།།
    
     སྤྲིན་པ་ནག་པོའི་ཞགས་པ་ཕྲ་མོ།།
     དྲི་མེད་ལང་ཚོའི་ངོས་ལ་བཏབ་སྟེ།།
     ཟ་ཟི་འོད་ཀྱིས་བྲང་གཞུང་འཁྱག་པ།།
     སྙིང་མཐིལ་གཟེར་བའི་ཚེར་མ་ཡིན་སོང་།།
    
     མེ་ཏོག་པང་ལས་ལྷོད་ཀྱིས་བཞུར་བའི།།
     འོ་མའི་བཅུད་འཛིན་རླུང་བུ་འཇམ་པོ།།
     དྲོན་མོ་སེམས་སུ་ཞོ་རུ་ཆགས་པ།།
     བྱེ་མ་རྡུལ་གྱི་ས་བོན་བཏབ་སོང་།།
    
     དྭངས་གསལ་སྒེག་མོའི་སྐྲ་ལོའི་འདབ་མ།།
     ཞི་བདེ་རྒྱ་མཚོའི་མཐའ་རུ་བརྐྱངས་ཡོད།།
     ཙག་རླུང་གཤོག་རྩེ་མཁའ་རུ་བསྒྱུར་བས།།
     ལོ་ཟླའི་སྐྲ་ལོར་ཁ་བ་བབས་བྱུང་།།
    
     ཁྲག་དང་དབུགས་ཀྱི་རྒྱུ་བ་འགགས་པའི།།
     ལྕང་སྡོང་དར་སྐུད་ཕྲ་མོའི་ངོས་ལ།།
     གྲང་རླུང་སོར་མོས་དཀྲོལ་བའི་དབྱངས་ཀྱིས།།
     ན་སྤང་ཚལ་ལ་མྱ་ངན་བཞག་སོང་།།
    
     སྣ་ཚོགས་བྱ་བྱེའུ་རོལ་མོའི་འགྱུར་ཁུགས།།
     ཕྱྭ་གཡང་འགུགས་པའི་རྟེན་དུ་གྱུར་ཡོད།།
     དུས་ཀྱི་སྲིན་མོར་སྙིང་རླུང་ལྡང་བའི།།
     གྱ་གྱུའི་གདུང་དབྱངས་མཚོ་རུ་མེར་བྱུང་།།
    
     གཡང་དཀར་འོ་མའི་ན་ཆུང་ཚོགས་ནི།།
     སྤང་སྟོངས་ཁུགས་པའི་སྙིང་རྩེར་འཁྱུད་དེ།།
     འབའ་དབྱངས་དཔག་ཚད་བར་དུ་ཟུག་པ།།
     བཟོད་མེད་སེམས་པའི་ན་ཟུག་ཡིན་སོང་།།
    
     དྲོད་རླུང་གོས་ཀྱིས་མངལ་དུ་ཁུར་བ།།
     རྨི་ལམ་ཞིང་གི་དྲོད་ཁོལ་ཡིན་སྐད།།
     བློ་རྩེ་ཡངས་པའི་གཞི་རུ་གཏད་ནས།།
     མིག་ཆུ་ཕྲེང་བའི་རྒྱུན་ཐག་མ་ལྷོད།།
    
     བསམས་ན་རི་ཀླུང་སྨུག་པས་འཛིན་ཞིང་།།
     མྱངས་ན་སྐྱུར་མོའི་མཆི་མ་ཕྱུང་སྟེ།།
     རེག་ན་ངལ་དུབ་བྲང་ལ་བརྩེགས་པས།།
     སྐྱོ་གླུ་མགྲིན་པའི་མལ་ལས་ལྡིང་བྱུང་།།