ལྐོག་འགྱུར་གྱི་གཟུགས་མེད་དུ་སྐྲུན་པའི།
     རྒྱུ་འབྲས་ཀྱི་ཚུལ་དང་བྲལ་བའི་ཟུམ་མེད་ཀྱི་བརྩེ་དུང་ཞིག
     འདོད་ཆགས་ལྕགས་ཀྱུས་སྦྲེལ་བའི།
     བདུད་རྒྱལ་གྱི་ཞགས་པ་བཞིན།
     དག་གཙང་གི་རྣམ་ཤེས་ཀྱིས་གྲུབ་པའི་ལུས་ཕུང་དུ་གནས་པའི།
     ཁྲག་རྩ་དང་བསམ་གཞིག་གིས་ལྡིང་བའི།
     ཉམ་ཆུང་གི་སྙིང་དམར་རྡོག་པོར།
     བཟོ་བསྲན་ལས་འགོང་བའི་ཟུག་གཟེར་གྱི་སྟོབས་ཤུགས་ཏེ།
     ཞེ་སྡང་གི་རིམས་ནད་ངན་པས་མནར་ཞིང་།
     རྣམ་གཡེང་གི་སྒྲིབ་ཡོལ་ནག་པོས་གཏིབས།
     དུས་དེ་ནས་བཟུང་།
     ཁོར་ཡུག་གི་ཡོད་ཚད་ཀྱི་ཁ་མདོག་རབ་རིབ་ཏུ་འགྱུར་ཞིང་།
     རྣམ་དཔྱོད་དང་བློ་གྲོས་ཀྱི་བསོན་ཤུགས་ཉམས་རྒུད་དུ་སོང་།
     ལུས་ཁོག་གི་སེམས་པར་སྐྱུར་ཆུས་གང་ཞིང་།
     ངག་སྒོའི་མགྲིན་པར་དབུགས་རིང་གིས་བརྣངས་ལ།
     མཁུར་མཚོས་ཀྱི་བཞིན་རས་མཆུ་མས་བརླན།
     རྨི་ལམ་གྱི་འཇིག་རྟེན་ཁྱོད་ཀྱིས་བཅོམ་ལ།
     མངོན་སུམ་གྱི་འཚོ་བ་ཁྱོད་ཀྱིས་བཟི།
     དུས་དེ་ནས་བཟུང་།
     འཁོར་བའི་སྡུག་བསྔལ་གྱི་ཆོས་ཉིད་ཉམས་སུ་མྱོང་ཞིང་།
     ལང་ཚོའི་དཔལ་ཡོན་གྱི་གཞོན་རྟགས་ཉམས་སུ་ཐག
     བརྩེ་དུང་གི་བདེན་རྫུན་ཤན་འབྱེད་དཀའ་ཞིང་།
     སྙིང་གཏམ་གྱི་གོམ་སྟབས་ལོག་ལམ་དུ་རྒྱུ།
     ཟིམ་མེད་ཀྱི་ལས་འདིར་འབྲས་མེད་དུ་ཤེས་ཀྱང་།
     ལས་དབང་དུ་བསམ་བཞིན་རེ་སྒུག་ཞིག་བྱེད་ཀྱིན།
     འབྱུང་འགྱུར་གྱི་འཚོ་བ་འཕྲུལ་སྣང་དུ་འཆིས་སོང་།