ཨ་མ།（༡）
     ལ་ཁའི་ཉི་མ་ལྟ་བུའི་ངའི་ཨ་མ།
     བདག་གི་སྐྲ་ལོ་ཡིན།
     གནག་ཅིང་སྣུམ་པའི་སྐྲ་ལོ།
     ངའི་ལང་ཚོའི་མཛེས་རྒྱན་ཡིན།
     སྐྲ་ལོ་ཤད་ཐེངས་རེ་ལ།
     གཉེར་མས་ཁེངས་པའི་ངོ་གདོང་དེ།
     ངའི་ཡ་ཆུང་གི་དྲན་ཤིང་ཡིན།
     མི་ལོ་ཉི་ཤུའི་སྔོན་གྱི་གསང་རྒྱ་ཡང་དེ་ལ་བཅོལ་ཡོད།
     ལ་ཁའི་ཉི་མ་དང་འདྲ་བའི་ངའི་ཨ་མ།
     ཉི་ཟླའི་ཤར་ནུབ་ཀྱི་བར་ན།
     རེ་སྒུག་གི་མིག་ཆུ་བྲང་ཁར་སྤུངས་ཞོར།
     རི་འདབས་ཀྱི་་ལམ་ཆུང་དེའི་སྣེ་ན།
     སྐྱོ་ངལ་དང་སྡུག་ཡུས་ཁྲོད་འབྱར་ཡོད་སྐད།
     ཨ་མ།ངའི་ཡ་ཆུང་གི་དྲན་ཤིང་དམར་པོ་ཡིན།
     ཨ་མ།
     （༢）
     ཉི་མ་གཟའ་ཡིས་བཟུང་སྟེ་
     ས་འཛིན་མུན་པས་གཡོགས་དུས།
     སྡོང་ལོ་རླུང་བུས་ཁུར་སོང་།
     གླིང་དེ་ནས་ཁྱེད་ཀྱིས་ཉི་མ་མཐོང་ངམ།
     ངའི་གངས་དཀར་སེམས་སུ་མུན་པས་འཚང་ཁ་རྒོད།
     ས་ཆུ་མེ་རླུང་གི་འབྱུང་བ་འཁྲུགས་པས།
     ང་རང་མུན་ཁྲོད་ནས་འཐེན་པའི་རྐང་ལམ་དེད་དེ།
     གླིང་གཞན་འགྲིམ་པའི་སྡུག་ཡུས་བཏུས།
     ངས་ལམ་སྣེ་རེ་ནས་ཁྱེད་ཕྱོགས་སུ་
     ཕྱིར་མིག་རེ་འཕངས་ལ།
     ལན་ཆགས་ལྕི་མོ་ཞིག་ལྟག་རྒྱབ་ནས་ལུས་སོང་བས།
     ངའི་དྲན་གདུང་གི་ལོ་མ་རླུང་གིས་ཁུར་ཞིང་།
     མཆི་མའང་ཁྲག་མདོག་ལ་བསྒྱུར་ཡོད།
     ཨ་མ།ང་རང་བྱ་བཞིན་འཕུར་ཤུལ་ན།
     སྡུག་ཡུས་ཀྱི་མཆི་མ་འཐུ་བཞིན།
     ཁྱེད་ལ་རྨི་ལམ་གྱི་ཁ་དོག་མང་ཞིང་།
     དྲན་གདུང་གི་སེམས་ཁྲལ་ལྕི་ཨང་།
     དུང་མདོག་གི་སྐྲ་ལོ་རླུང་གིས་གཡོ་ཞིང་།
     ཟུངས་ཟད་ཀྱི་ལུས་པོ་འཁར་བར་བརྟེན་ནས།
     དད་འདུན་གྱིས་འགྲེང་ཞིང་།
     རེ་སྡུག་གིས་འཚོ་བ་བསམས་ན།
     ངའི་འཇིག་རྟེན་ན་སྐར་ཚོགས་མེད་ལ།
     མེ་ཏོག་ཀྱང་མེད།