མཐའ་བཞི་རིན་ཆེན་བརྩེགས་པའི་རི་བོས་བསྐོར། །
བརྗིད་ལྡན་གཡང་གཟར་བྲག་རི་མཁའ་ལ་བསྙེགས། །
རང་བྱུང་ལྷུན་གྱིས་གྲུབ་པའི་ཚང་ཚིང་ཅན། །
སྐྱིད་པའི་ཕ་གཞིས་དྲོན་མོ་ལྷ་ཡུལ་འདྲ། །
 
འཆར་ཀའི་འོད་སྣང་སྲིད་པའི་ལྗོངས་སུ་འཕྲོས། །
ཉི་གཞོན་གསེར་སྐུད་ཕྲ་མོའི་འོད་ངོགས་སུ། །
དཀར་མཛེས་མུ་ཏིག་རྡོག་པོ་ཐང་མར་བརྡལ། །
ཕ་ཡུལ་རྩྭ་ཐང་གསེར་ཞུན་ཁུ་བས་བྱུགས། །
 
མུ་མེད་ནོར་འཛིན་སྒེག་མོའི་ཁྱོན་ཀུན་ལ། །
ཕྱོགས་རིས་མེད་པར་གོས་ལྗང་ལྭ་བ་བཀླུབས། །
རི་དང་ལུང་པ་རེ་རེའི་ཁུགས་སོ་ན། །
ཡན་ལག་བརྒྱད་ལྡན་ཆུ་བོའི་འགྱུར་ཁུགས་སྙན། །
 
དག་གཙང་སྤང་ལྗོངས་སྔོན་མོའི་ཞིང་ཁམས་ན། །
ཕྱུགས་ཟོག་རྟ་ནོར་ལུག་ཁྱུའི་སྐར་ཚོགས་བཀྲ། །
ལང་ཚོའི་རྩལ་རྫོགས་གཞོན་སྐྱེས་རྫི་བོ་ཡིས། །
ཕ་ཡུལ་རྩྭ་ཐང་སྙན་མོ་གླུ་ཡིས་བསྟོད། །