འཇིག་རྟེན་སྐྱེ་འགྲོའི་བདེ་སྡུག་ལྡེབས་རིས་ཀྱི་རི་མོ། །
     མ་བརྟག་མ་གཟིགས་འོད་གསལ་ཐུགས་བརྩེ་ཡིས་མཁྱེན་པའི། །
     མི་མངོན་དབྱིངས་སུ་བཞུགས་པའི་ཤེས་རབ་ཀྱི་ལྷ་དེས། །
     མ་རིག་ལོག་རྟོགས་སེལ་བར་དངོས་གྲུབ་དེ་སྩོལ་རོགས། །
    
     འཇིག་རྟེན་ཐང་སྟོང་ཡུལ་ལ་རྒྱུགས་རྒྱུགས་ཀྱི་མཐའ་མར། །
     འབྲས་མེད་ལམ་སྟོང་གྱུར་ན་ཨ་ཐང་རེ་ཆད་འགྲོ། །
     ཨུ་ཤུ་དངན་རིང་འཐེན་ཞོར་བསམ་གཞིག་རེ་བྱས་ན། །
     ལྕགས་སྨྱུག་ཕྲ་མོས་སྙན་ངག་ཐན་ཐུན་རེ་འབྲི་འདོད། །
    
     བྲིས་ཀྱང་གནད་ཅིག་མ་ཟིན་སྟོང་བསམ་གྱི་འདུ་ཤེས། །
     བསམ་ཡང་དོན་ཞིག་མ་རྟོགས་ཅང་མེད་ཀྱི་ཀླད་ཁམས། །
     བརྩོན་ཡང་འགྲུབ་རྒྱུ་མེད་པའི་འཇིག་རྟེན་གྱི་བྱ་གཞག །
     ཤེས་དང་མ་ཤེས་བར་ནས་ལོ་ཟླ་འདི་བཞུད་སོང་། །
    
     རང་སེམས་རི་རབ་ཁོང་གི་ཕུགས་བསམ་གྱི་སླད་དུ། །
     གཞན་ཡུལ་རྒྱུས་མེད་གྲོང་ཁྱེར་ས་ཆ་ཀུན་འགྲིམས་ཀྱང་། །
     འདི་སྣང་འཕྲུལ་བའི་སེམས་གྱི་ཉག་ཕྲན་གྱི་གཟུ་ས། །
     མདོ་མེད་འཕྱོར་མོ་ཞིག་གི་སྐྱེ་གཟུགས་དེ་ཡིན་སོང་། །
    
     ནང་སེམས་རིག་པའི་རྟ་རྒོད་ཚུར་ཕྱོགས་སུ་བཀུག་ནས། །
     རྣམ་གཡེང་ལེ་ལོའི་བུ་ཡི་བཞོན་པ་རུ་བྱས་ནས། །
     ཉོན་མོངས་འདམ་རྩབ་ཐང་ལ་རྟ་རྒྱུགས་རེ་བྱས་ན། །
     རྟ་ལོག་སྒ་ལོག་བྱུང་བའི་སྣང་ཚུལ་འདི་སྐྱོ་བ། །
    
     སྤོབས་པའི་མེ་དཔུང་ཡངས་པའི་བར་སྣང་ལ་འབར་མྱོང་། །
     སྟོང་བསམ་འཆར་གཞི་ཆེན་པོའི་ས་གཞི་ལ་བཀོད་མྱོང་། །
     ཡིན་ཡང་ཕྱི་ནང་གཉིས་ཀྱི་འདུ་འགོད་ཀྱི་དབང་གིས། །
     མ་འགྲུབ་མ་འཁྱོངས་བར་ནས་ལོ་ཟླ་འདི་བཞུད་སོང་། །
    
     ལ་ལུང་ཀུན་ནས་འདུས་པའི་མི་བུ་ཚོའི་གྲལ་ནས། །
     ང་རྒྱལ་མགོ་འཕང་དགུང་གི་ཉི་ཟླ་ལ་འགྲན་གྱིན། །
     སྡུག་ཡུས་ཅུང་ཙམ་མ་ཐེག་ཉམ་ཐག་ཏུ་འདུག་པའི། །
     ཕྱིར་དྲན་ལོ་ཟླ་ཞིག་གི་བཞུད་སྟངས་འདི་སྐྱོ་བ། །
    
     རང་ལ་ཤ་ཚ་སྙིང་ཉེའི་བྱམས་ལྡན་གྱི་ཕ་མས། །
     འབད་པ་སྟོང་གིས་བསྒྲུབས་པའི་རྒྱུ་ནོར་གྱི་ཡོད་ཚད། །
     རྒྱང་རིང་བུ་ལོ་གྲང་འགྲོ་ལྟོགས་འགྲོ་འདི་བསམ་གྱིན། །
     ཕངས་མེད་སྦྱིན་ཡང་ཇ་ལན་ཆུ་འཇལ་འདི་སྐྱོ་བ། །
    
     བརྩེ་སེམས་འོ་ཆུ་འདྲེས་པའི་ལས་སྐལ་གྱི་གྲོགས་མོ། །
     བརྩེ་མེད་ས་ཆེན་ཁྲོས་པའི་སྟངས་སྟབས་ཀྱི་ཁྲོད་ནས། །
     བརྩེ་འདང་བརྗོད་ཁོམ་མེད་པར་གློ་བུར་དུ་བཞུད་པ། །
     ལོ་འདིའི་བརྗོད་ཐབས་མེད་པའི་ན་ཟུག་གི་རྨ་ཁ། །
    
     ས་སྲོད་དུས་དང་ཁེར་རྐྱང་ཁོར་ཡུག་གི་ཁྲོད་ནས། །
     སྙིང་གི་མི་ཞེས་བརྒྱ་འབོད་སྟོང་གླེང་རང་བྱས་ཀྱང་། །
     སུས་ཀྱང་ཨ་ལན་མི་སྟེར་སྐྱོ་སྡུག་གི་སེམས་ཁམས། །
     མཚོན་ཕྱིར་ཐང་སྟོང་ཉུལ་ཞོར་ལོ་ཟླ་འདི་སྐྱེལ་དགོས། །
    
     རེ་བ་སྟོང་གིས་ཁེངས་པའི་བགྲང་བྱ་ཡི་འཁོར་སྐྱོད། །
     འདྲ་མིན་སྣ་ཚོགས་སྒྱུ་མས་གྲོ་བུར་དུ་སྒུལ་འགྲོ། །
     ཡུད་ཙམ་རྨི་ལམ་ལྟ་བུའི་ལོ་གཅིག་གི་དུས་ཡུན། །
     མ་ཚོར་འཁྲུལ་སྣང་ཁྲོད་ནས་སྐད་ཅིག་གིས་འདས་སོང་། །
    
     བཀའ་ཆོས་ཉིང་ཁུ་འོ་མའི་མར་ལོ་དེ་མ་ལོན། །
     དུས་གསར་བརྡ་འཕྲིན་དུས་ཀྱི་ཚན་རྩལ་དེ་མ་རྟོགས། །
     ཁ་བ་གངས་རིའི་ལྗོངས་ལ་ལག་རྗེས་ཤིག་མ་ཞོག །
     རང་སེམས་རང་གིས་གསོ་བཞིན་ལོ་ཟླ་འདི་བཞུད་སོང་། །
    
     བྱ་སྒྲོ་རླུང་ལ་སྤུར་འདྲའི་བདག་སེམས་ཀྱི་འདུན་མ། །
     སྐྱེ་གཟུགས་ཡིད་དུ་འོང་བའི་འཕྱོར་མོ་དེར་ཆགས་པས། །
     ཤེས་རིག་བདུད་རྩི་བཏུང་བའི་གོ་སྐབས་དེ་ཡལ་སོང་། །
     ལོ་ཟླ་ཧྲིལ་པོ་ཞིག་གི་གྱོ ང་གུད་དེ་ཉོས་སོང་། །
    
     སྒྲོན་མེ་མིག་ལ་མཛེས་ཀྱང་ཕྱེ་ལེབ་དེ་བསླུ་བྱེད། །
     འདི་སྣང་སྤྲོ་བ་ཡིན་ཡང་ཕུགས་འདུན་དེ་བརླག་བྱེད། །
     འདོད་སེམས་མེ་ལྕེ་འབར་ཡང་སྡུག་བསྔལ་འདི་འཕེལ་བྱེད། །
     བསམ་ཞིང་བསམ་ན་ལོ་ཟླའི་འཁོར་སྐྱོད་འདི་སྐྱོ་བ། །
    
     དཔྱིད་ཟླ་སྐྱ་བོ་ས་ཆེན་གཡོ་འགུལ་ཁྲོད་ཤོར་ཐལ། །
     དབྱར་ཟླ་དྲོན་མོ་འདུ་འཛི་རྣམ་གཡེང་ཁྲོད་བུད་ཐལ། །
     སྟོན་ཟླ་འབྲས་ལྡན་དྲན་གདུང་ན་ཟུག་གིས་བསྐྱལ་ནས། །
     དགུན་ཟླ་འཁྱག་པོ་བར་མ་བར་གསེང་ནས་བུད་ཐལ། །
    
     ཁྱེད་ལ་མཁོ་བའི་རིན་ཆེན་ནོར་བུ་དེ་མ་ལོན། །
     ཁོ་ལ་དགོས་པའི་བསམ་འཕེལ་ནོར་བུ་དེ་མ་ལོངས། །
     སུ་ལའང་ཕན་པའི་ལག་རྗེས་ཆེན་པོ་ཞིག་མ་ཞོག །
     འཚབ་མ་འཚུབ་ཀྱི་ལོ་ཟླའི་འཁོར་སྐྱོད་འདི་སྐྱོ་བ། །
    
     ཨ་ཐང་དགུ་རུ་ཆད་པའི་ད་ལྟ་ཡི་དུས་ལ། །
     རང་ཚོད་སྔ་བསམ་ཕྱི་མནོ་གཏོང་ཡག་ཅིག་བྱས་ནས། །
     དོན་དམ་རིག་པའི་གནས་ཀྱི་ཉིད་བཅུད་དེ་འཐུང་འདོད། །
     མི་འགྱུར་དམ་བཅའ་གོར་མོ་རྡོ་སྟེང་དུ་འབྲི་འདོད། །