བཙན་པོ་འཁོར་གྱིས་བཞེངས་པའི་རྒྱལ་རབས་དེ་བསམ་ནས། །
ལོ་རྒྱུས་དེབ་ཏུ་འཁོད་པའི་འཁྱུག་བྲིས་ལ་བལྟས་ཚེ། །
སྲིད་བརྟན་ལོངས་སྤྱོད་རྒྱས་པའི་གདུང་འདེགས་ཀྱི་ཀ་བ། །
འབྲོ་བཟའ་ཁྲི་མ་ལོད་དེའི་བློ་གྲོས་རང་མིན་ནམ། །
 
ཆོས་ཁྲིམས་གཙང་མ་གངས་ཅན་བོད་ཡུལ་དུ་སྤེལ་དུས། །
རྒྱ་ཆོས་བོད་ལ་བསྒྱུར་མཁན་མང་པོ་རང་ཡོད་ཀྱང་། །
བོད་ཆོས་གསར་ཏུ་གཏོད་ནས་གཞན་ཡུལ་ལ་སྤེལ་མཁན། །
མ་ཅིག་ལབ་ཀྱི་སྒྲོལ་མའི་གཟི་མདངས་རང་མིན་ནམ། །
 
སངས་རྒྱས་སྟོང་སྐུ་བྱོན་པའི་རྣམ་ཐར་རེ་ཡོད་ཀྱང་། །
ཚེ་གཅིག་ལུས་གཅིག་སངས་རྒྱས་གོ་འཕང་དེ་ཐོབ་མཁན། །
རྗེ་བཙུན་མི་ལའི་ངེས་འབྱུང་སྐྱེས་ཡུལ་གྱི་བཞིན་མ། །
མ་ཡུམ་མྱང་ཚའི་ཁོག་དཔུང་ལ་རྒྱ་དེ་མིན་ནམ། །
 
དཔའ་བོའི་གད་བརྒྱངས་བསྒྲོགས་ནས་དམར་འཛིང་རེ་བྱེད་དུས། །
སུམ་གཉིས་ས་ཡི་དཀྱིལ་འཁོར་རིས་གཟུགས་སུ་ཕབ་ནས། །
གསོལ་སྐྱེམས་མངར་མོ་རྒྱལ་ཁའི་ཞལ་ཟུར་ནས་བཞེས་སྐབས། །
གནམ་གྱི་ཕྱེད་ཀ་འདེགས་པའི་གྱད་མི་དེ་སུ་ཡིན། །
 
མུན་པའི་ཀློང་ནས་ཤྭ་འོད་ཤག་ཤག་ཏུ་རྒྱུགས་ནས། །
ཟླ་བའི་འོད་མདངས་སྤྲིན་ནག་ཕུང་པོ་ཡིས་བསྒྲིབས་དུས། །
འོ་མའི་བཅུད་དང་བརྩེ་བའི་དྲོད་འཁོལ་རང་སྦྱིན་མཁན། །
གནམ་གྱི་ཕྱེད་ཀ་འདེགས་པའི་གྱད་མི་དེ་སུ་ཡིན། །
 
ཨ་ཕོ་ལུག་རྫིའི་དཀའ་སྡུག་ཐོད་ནག་གི་མདུད་པ། །
བུ་ཆུང་སྣབས་ལུག་ལེ་ལོ་རྣམ་གཡེང་ལ་འཁོར་དུས། །
སྦྲ་ནག་གྲུ་བཞི་སྐྱིད་པའི་གཡང་རྟེན་དུ་འགྱུར་མཁན། །
གནམ་གྱི་ཕྱེད་ཀ་འདེགས་པའི་གྱད་མི་དེ་སུ་ཡིན། །
 
རྨོན་དོར་རྗེས་སུ་རྔུལ་ཆུ་ཁྲོམ་ཁྲོམ་དུ་བཞུར་ནས། །
ལྕགས་ཁེམ་འཇོར་གྱིས་ས་བརྐོ་རྡོ་བསློགས་རེ་བྱས་ཀྱང་། །
དེ་ཡི་ཞོར་ལ་ཞིམ་མངར་བཟའ་བཏུང་རེ་འདྲེན་མཁན། །
གནམ་གྱི་ཕྱེད་ཀ་འདེགས་པའི་གྱད་མི་དེ་སུ་ཡིན། །
 
བཙན་གཏམ་ཚོད་མེད་མདུན་ནས་སྤོབས་སེམས་ཀྱི་འགྲེངས་ལ། །
ཉམ་ཆུང་ནུས་མེད་གྲས་ལ་སྙིང་རྗེ་རེ་སྒོམ་ཞོར། །
མྱི་ཁའི་བཙན་རྫོང་སྟུག་པོ་ལང་ཚོ་ཡི་བརྒལ་མཁན། །
གནམ་གྱི་ཕྱེད་ཀ་འདེགས་པའི་གྱད་མི་དེ་སུ་ཡིན། །
 
ཤེས་རབ་སྒེག་མོའི་འཛུམ་ཞལ་ས་གཞི་ལ་འཕྲོས་ནས། །
མི་བུ་སྟོང་གིས་རིག་པའི་ཅང་ཤེས་ལ་བཅིབས་བཞིན། །
གངས་ལྗོངས་ས་ལའི་སྲི་ཞུ་རེ་བསྒྲུབས་དུས། །
གནམ་གྱི་ཕྱེད་ཀ་འདེགས་པའི་གྱད་མི་དེ་སུ་ཡི