ཀ་ཁའི་སྙན་རྩོམ།

རྨོག་སངས་རྒྱས་རྒྱ་མཚོ། 2016-09-05

ཀ་ར་སིལ་ཏོག་གི་སྡེར་ཁ་བསྒྲིགས་ཤིང་།།
ཁ་སེམས་མི་གཅིག་པའི་ཁ་ཡག་ཅིག་གིས།།
ག་ལེར་བསླུ་བྲིད་ཀྱི་སྣང་བ་བྱིན་ན།།
ང་ཉིད་དེ་འདྲ་ཞིག་དགའ་བོ་མི་འདུག།
ཅ་ནེ་ཕོར་བ་ཞིག་ལག་ཏུ་བཟུང་ཡང་།།
ཆ་མེད་ལུགས་མེད་ཀྱི་ངོ་གདོང་བསྟན་ཏེ།།
ཇ་མའི་གསོལ་ཇ་དེ་བསྟུད་མར་བླུགས་ཀྱང་།།
ཉ་ཉོག་སྤྱོད་པ་དེར་སྙིང་ནས་སུན་བྱུང་།།
ཏཱ་རེ་འབུམ་འདོན་གྱི་ཁ་ལྕེ་ཟད་ཀྱང་།།
ཐ་ཤལ་ཀུན་སློང་གི་སེམས་པ་བཙོག་ན།།
ད་ཚོད་བདེ་བ་ཞིག་གནས་ནས་འདུག་ཀྱང་།།
ན་བའི་འཆི་བདག་གིས་དེད་ནས་ཡོང་ངེས།།
པ་སངས་ཉིན་དཀར་གྱི་དུས་ཚོད་ཤོར་ཞིང་།།
ཕ་མའི་དྲིན་མཚམས་ཀྱི་ཐིག་ལ་གདའ་བའི།།
བལ་དཀར་འཇམ་པོ་ཡི་གདན་ལ་བཞུགས་ཀྱང་།།
མ་ཤེས་མ་རིག་གི་འཁོར་བ་ཤེས་དགོས།།
ཙ་ཚའི་ཡིག་སྦྱོར་གྱི་སྣང་བ་མཐོ་ཡང་།།
ཚྭ་དྲག་ཐོབ་ཐང་གི་དག་ཆ་མེད་ན།།
ཛ་དྲག་ངོ་གདོང་གི་པགས་པ་ཙམ་ནི།།
ཝ་མོ་གཡོ་ཅན་གྱི་ཚུགས་ཀ་མིན་འགྲོ།
ཞྭ་མོ་ཕུད་སྲོལ་གྱི་གུས་ལུགས་ཆེ་ཡང་།།
ཟ་མའི་འཇིག་རྟེན་གྱི་ཆོ་འཕྲུལ་མཐོང་དུས།།
འ་འ་ཨེ་བདེན་གྱི་སྣང་བ་མཐོང་ན།།
ཡ་ཡ་མི་ཟེར་བའི་གུས་ལུགས་མེད་དམ།།
ར་ལུག་སྐྱོང་མཁན་གྱི་འབྲོག་པ་དག་དང་།
ལ་ཕུག་འདེབས་མཁན་གྱི་རོང་བ་དག་ནི།།
ཤ་ཆང་འདྲེས་མ་ཡི་འཚོ་བའི་ཀློང་ནས།།
ས་ཆེན་ཞབས་རྗེས་ཤིག་གཏན་ནས་མ་རེག།
ཧ་ཧ་དགོད་མཚར་གྱི་འཇིག་རྟེན་འདི་ནས།།
ཨ་མདོའི་འཚོ་བ་ཡི་ཡན་ཞིག་མེད་དམ།།

ཀ་ཁའི་སྙན་རྩོམ།

དོ་སྣང་ཆེ་བའི་རྩོམ།

རྩོམ་གསར། 10

དོ་སྣང་ཆེ་བའི་རྩོམ། 10