སྤང་ལྗོངས་སྟེང་ལ་སྤང་རྒྱན་མེ་ཏོག་མཛེས།།
　　སྤང་རྒྱན་ཞལ་ཁ་ཕྱེ་དུས་དེ་བས་མཛེས།།
　　མི་ཚོགས་ཁྲོད་ནས་དྲིན་ཆེན་ཕ་མ་མཛེས།།
　　དྲིན་ཆེན་ཕ་མའི་བཀའ་དྲིན་ལྷག་པར་མཛེས།།
　　འཛམ་བུའི་གླིང་དུ་ཁ་བའི་ལྗོངས་དེ་མཛེས།།
　　ཁ་བའི་ལྗོངས་ཀྱི་རིག་པའི་གཏེར་དེ་མཛེས།།
　　ཤེས་བྱའི་དཀྱིལ་ནས་རང་རིགས་རིག་གནས་མཛེས།།
　　བཅུ་ཕྲག་རིག་པའི་སྙིང་པོ་ཤིན་ཏུ་མཛེས།།
　　སྐྱེ་བོའི་ཁྲོད་ནས་བོད་མིའི་རིགས་དེ་མཛེས།།
　　ཡ་རབས་གུས་ཞབས་བོད་མིའི་སྤྱོད་བཟང་མཛེས།།
　　ཆོས་ལུགས་ཁྲོད་ནས་ནང་པའི་ཆོས་དེ་མཛེས།།
　　བོད་བརྒྱུད་ནང་བསྟན་སྙིང་པོ་ལྷག་པར་མཛེས།།
　　རི་ཚོགས་དཀྱིལ་ནས་ཇོ་མོ་གླང་མ་མཛེས།།
　　ཇོ་མོ་གླང་མའི་བརྗིད་ཉམས་ཤིན་ཏུ་མཛེས།།
　　དུས་རབས་དཀྱིལ་ནས་ཉེར་གཅིག་དུས་དེ་མཛེས།།
　　ཉེར་གཅིག་དུས་སུ་དྲང་བདེན་ཁོ་ན་མཛེས།།