སྤྲིན་ནག་བྲལ་བའི་དྲི་མིད་རིག་པའི་བློ།།
  འཆད་རྩོད་རྩོམ་པའི་གཞུང་ལུགས་སྨྲ་བའི་རྩལ།།
  མིག་དབང་དགའ་སྟོན་ཙམ་མིན་ཞི་དུལ་ངང་།།
  དམ་པ་གོང་མའི་ཞལ་གསུང་ཨེ་མ་རྨད།།
  
  གངས་དཀར་རྡུལ་བརྩེགས་ཕྲེང་བའི་སློབ་གྲོགས་དག།
  ཤེས་རིག་མཚོ་མོ་འཁྱིལ་བའི་སློབ་གླིང་འདིར།།
  ཤེས་བྱའི་རིག་གནས་བདུད་རྩི་མཐོང་འདོད་ན།།
  རྣམ་གཡེང་ལེ་ལོ་སྤངས་ཏེ་མདུན་དུ་རྒྱུགས།།
 
  ཕྱུགས་ཟོག་རྗེས་སུ་འབྲངས་ནས་མི་ཚེ་ཟད།།
  དབྱངས་གསལ་སོ་བཞི་སྦྱོར་ཀློག་མི་ཤེས་པས།།
  ག་དུས་ཡིན་ཡང་དུད་འགྲོ་ཁྱད་མིད་པའི།།
  མིངས་པའི་མགོ་བོ་མ་འཁོར་ཡར་ལ་ལྟོས།།
  
  ལྷོ་གླིང་འཛིན་མའི་ཚུལ་གྱི་ཕོ་མོ་རྣམས།།
  རང་འདོད་སྤྱི་བདེ་སྤྱོད་པའི་སྐལ་བཟང་འདི།།
  འཕྲལ་ཕུགས་གཏན་བདེ་ཐབས་ལམ་བསྙེག་འདོད་ན།།
  དམ་པའི་ཆོས་ཀྱི་བདུད་རྩི་བཏུང་བར་བྱ།།
  
  འཕགས་པའི་གདུལ་ཞིང་ཆོལ་གསུམ་སྤུན་མཆེད་རྣམས།།
  ཤེས་ཡོན་ཡར་ཟླ་འཕེལ་བའི་དུས་ཚིགས་འདིར།།
  ཁ་བའི་སྐྱིད་སྡུག་ལས་དབང་མཐོང་འདོད་ན།།
  རང་རིགས་དུངས་པའི་ལ་རྒྱ་སྙིང་ལ་ཆོངས།།