ལ་སྟོད་མཚོ་མོའི་འགྲམ་གྱི་རྨི་ལམ་དེ། །

དེ་རིང་འབྱུང་བཞིའི་གནོད་འཚེས་དཀྲོགས་པས་ན།།

དྲིན་ཆེན་ཨ་མ་རྒན་མོའི་རུམ་པང་དུ། །

བརྩེ་བའི་བུ་ཆུང་གཉིད་ལོང་མ་བྱུང་ཐལ། །

ཉི་ཟེར་ཆུ་རྡུལ་སྤྱོད་པའི་གངས་དཀར་དེ། །

དེ་རིང་གངས་དང་ཆར་པས་དེད་པས་ན། །

དལ་འབབ་ཡར་ཀླུང་གཙང་པོའི་བཞུར་སྒྲ་ཡང་། །

མུ་མེད་དབྱིངས་སུ་མ་གྲགས་རེ་ཞིག་འཇགས། །

ཁྱེད་དང་ང་ཡི་ལས་དབང་སྐྱ་མོ་ལ། །

ཞེན་ཆགས་ཆེ་རུ་མ་སོང་ཡིད་སེམས་ཀྱི། །

དད་པ་བརྟན་པོ་ཞིག་གི་སྨོན་སེམས་ཀྱིས། །

གངས་རིའི་གདུང་དབྱངས་ང་ཚོས་མཉམ་དུ་གྱེར། །

རི་རྒྱུད་ཧི་མ་ལ་ཡའི་གངས་འདབས་སུ། །

ང་ཡི་ཁ་བའི་མི་རིགས་དིང་རི་བ། །

འབྱུང་བཞིའི་གནོད་འཚེ་ཇི་ལྟར་ཡོད་ན་ཡང་། །

ཁ་བའི་སེམས་འདུན་ནམ་ཡང་མཉམ་དུ་ཡོད། །

མཐོན་པོ་གངས་དཀར་རི་བོའི་གཡས་གཡོན་ནས། །

སྐྱོ་བ་ཚིག་ཏུ་ཕབ་པས་རིགས་མཐུན་གྱི། །

སྤུན་ཟླ་རྣམ་པའི་ཡིད་ཀྱི་མུན་པ་ཡི། །

སྐྱོ་བ་བསལ་བར་བྱེད་པ་ཉིད་གྱུར་ཅིག །