སེམས་ཀུན་རིག་གི་གསང་བའི་ལ་མོའི་འདབས་ནས།།

ནང་མཛའ་དུངས་ལ་བརྒྱུས་པའི་ཞེ་རྩ་འདར་ཞོར།།

ངག་སྒྱུ་རྩལ་ལ་བྱང་བའི་ཉམས་སྣང་ཀློང་ནས།།

སྟག་ཤ་ར་ཞིག་སྨྲེང་བའི་རྣམ་པ་མངོན་བྱུང་།།

ཁྲོམ་ཟིལ་གནོན་གྱི་གར་སྟེགས་གློག་ཞུའི་གདན་རེད།།

འབྲོག་སྨན་ཆུང་གི་མི་གཤིས་སྨྱུག་མའི་དྲང་རེད།།

ཡིད་སྨོན་སེམས་ལ་བརྒྱུས་པའི་བཞོ་གླུའི་མཚར་ཉམས།།

ངག་དགོ་དགོ་ལ་དྲངས་པ་སྲིད་པའི་རྒྱན་རེད།།

ནངས་སྔ་ལངས་ཀྱི་སྐྱ་རེངས་བུ་མོའི་འབོད་བརྡ།།

སྒྲ་ཀུན་འཛིན་གྱི་སོར་མོའི་རྩལ་ལས་མཐོང་དུས།།

ཡུམ་དྲིན་ཆེན་གྱི་དུངས་པའི་མཛའ་སེམས་སྨུག་པོ།།

སེམས་གངས་དཀར་གྱི་དཀྱིལ་ནས་དྲན་དུ་བཅུག་སོང་།།

སྒྲ་རྒྱུད་སྐུད་ཀྱི་བརྩེ་བའི་འདར་སྐྱོམ་ཁྲོད་ནས།།

ཆུང་གཞོན་པ་ཡི་སྣང་བའི་དར་སྐུད་ཕྲ་མོ།།

གཞི་ཀུན་བཏགས་ཀྱི་ཞེན་པའི་སྒང་ལ་འཐེན་ན།།

ལས་བག་ཆགས་ཀྱིས་ཆུང་འདྲིས་ཞེ་ལ་འཁོར་ཡོང་།།

གཞོན་སོ་དཀར་གྱི་ལྗོན་པའི་འདབ་ཕྲེང་མུ་ཏིག།

འཛུམ་འོད་གུར་ལ་བསྲེས་པའི་ཨུཏྤལ་མཐའ་ནས།།

སྨན་གནས་འགྲོ་མའི་སྡུག་ཡུས་དབྱངས་ལ་བསྲེས་ན།།

སེམས་གཉོམ་གཉོམ་གྱིས་བརྩེ་བའི་ཨ་ཅེ་དྲན་ཡོང་།།

ངག་བཞོ་དབྱངས་སུ་འཐེན་པའི་རྣམ་ཤེས་དེ་ལ།།

སྲོག་རྩ་ཆེན་གྱི་གསང་བའི་ལམ་ཞིག་མེད་ན།།

སེམས་དྲན་འཛིན་འདི་བསྒུལ་བས་སྐྱོ་ཡུས་ཆེ་ཡོད།།

མིག་མཆི་མ་ཡིས་གང་བའི་ཞེ་རྩ་ཆེ་འདར།།

ངག་སྒྱུ་རྩལ་གྱིས་ཕྱུག་པའི་ནང་སེམས་ཀློང་ནས།།

དབྱངས་སྲོག་ཆེན་ལ་ཞུགས་ནས་ང་རོ་འདྲེན་དུས།།

གཉོམ་ཆུ་ཤིང་ལ་བརྒྱུས་པའི་མཛེས་དཔྱོད་ངོམས་ན།།

ཡིད་བླ་འགུགས་ཀྱི་ནུས་པའི་བྱིན་རླབས་འབར་ཡོང་།།

སྦྲ་བཞི་རྒྱོང་གི་ཕུ་ན་འོད་ཀྱིས་འཚེར་བའི།།

ནང་ཡབ་ཆེན་གྱི་སྨོན་པའི་རེ་བ་ཁེན་ས།།

གཞི་འཁོར་འཛིན་གྱི་མ་ལོའི་ཞེ་རྩ་བརྟེན་ས།།

མ་སྲུ་མོ་ཚོ་ཁ་དྲོ་ཚེ་རིང་ལོ་བརྒྱ།།