གངས་ཐིགས། 2023-11-21
སྣང་བ་རི་ལ་ཡན་པའི་ས་སྲོད་ཅིག་ལ།།
དྲན་པའི་ལྡེབས་རིས་ངོས་སུ་རི་མོ་བྲིས་ཤིང་།།
སྐྲ་ལོ་རྒྱ་ལྕང་ཤམ་པའི་སྙིང་ཉེ་ཞིག་གིས།།
ལས་ཀྱི་རྣམ་ཤེས་ཁུར་བའི་སྣང་བ་བྲིས་ཡོད།།
ཚོར་བ་ཚིག་ལ་བརྒྱུས་པའི་བར་སྐབས་ཤིག་ལ།།
ཞེ་སེམས་འཁྱག་གིས་བཟུང་བའི་ལོ་ཟླ་བྲིས་ཤིང་།།
ལས་ཀྱི་གཏིང་དུ་འཁྲུངས་པའི་སྙིང་ཉེ་ཞིག་གིས།།
ཐ་སྙད་འདང་ལ་བརྒྱུས་ནས་མེ་ཁ་གསོས་ཡོད།།
འཇིག་རྟེན་སྣང་བ་གླེང་སའི་སྡེ་གྲོང་ཞིག་ནས།།
དྲན་པའི་རི་ཟོམ་ངོས་སུ་སྨུག་པ་འཐིབས་ཤིང་།།
བརྩེ་བ་དགུ་མདུད་རྒྱག་པའི་སྙིང་ཉེ་ཞིག་གིས།།
ལས་ཀྱི་སྣ་གླུ་འཐེན་པའི་སྣང་བ་བྲིས་ཡོད།།
སེམས་ཀྱི་དྲན་པ་གཡོ་བའི་ད་ཚོད་ཅིག་ལ།།
རྨི་ལམ་ཁུད་ཀྱི་ལས་འཕྲོ་ལག་པས་ཟིན་ཞིང་།།
བརྩེ་བ་ཞེ་ལ་འཕྲོད་པའི་སྙིང་ཉེ་ཞིག་གིས།།
ལས་ཀྱི་རྣམ་ཤེས་ཁུར་བའི་སྣང་བ་བྲིས་ཡོད།།
པའི་ས་སྲོད་ཅིག་ལ།།
ཚོར་བས་ཟིན་པའི་ཡིག་འབྲུ་རྡང་ལ་བཏབ་ཡོད།།
ཡིད་ཀྱི་དྲན་པ་རྐུ་བའི་སྙིང་ཉེ་ཞིག་གིས།།
ཞེ་ལ་གྲིབ་གཟུགས་ཆགས་པའི་སྣང་བ་བྲིས་ཡོད།།
ཡིད་ཀྱི་རྨི་ལམ་འཚོ་བའི་ཤོག་དཀར་ངོས་སུ།།
བརྩེ་བས་གདུང་བའི་ཡིག་འབྲུས་འཕྱོར་ལྭ་བཟོས་ཤིང་།།
གནག་སྣུམ་རིང་དུ་འཕྱང་བའི་སྙིང་ཉེ་ཞིག་གིས།།
འཁོར་བའི་མེ་ཁ་གསོས་པའི་སྣང་བ་བྲིས་ཡོད།།
དྲན་པ་གདུང་བས་གཙེས་བའི་ཉིན་མ་འདི་ཚོར།།
ལས་ཀྱི་རྨི་ལམ་ངོས་སུ་རྒྱབ་གཟུགས་སྣང་ཞིང་།།
ཚོར་བའི་མེ་ཏོག་འདེབས་པའི་སྙིང་ཉེ་ཞིག་གིས།།
སེམས་ཀྱིས་སྨྲེང་བ་ཁུར་བའི་དྲན་པ་བྲིས་ཡོད།།
རྩོམ་གསར། 10