དབུས་ཀྱི་མེ་ཏོག་གོར་གོར་གྱིས།།

འཇའ་ཚོན་ནང་ནས་རེ་སྒུག་བྱེད།།

ཐང་ནས་ཐང་དཀྱིལ་ཉུལ་བ་ན།།

ཐང་གི་མཛེས་ཉམས་ད་གཟོད་རྙེད།།

ཐང་སྟོང་ངུ་ཤུམ་བྱེད་ཤུལ་དབུས།།

པདྨའི་འཛུམ་ཀོང་སྙིང་ལ་སྡུག།

པད་དཀར་འདི་ཉིད་དུས་མཐའ་ཡི།།

དྲན་རྟེན་གསོན་པོ་ཡིན་འཆར་གྱིས།།

པར་ཆུང་ནང་གི་མགུར་རིས་བཞིན།།

ཡང་ནས་བསྐྱར་དུ་དགོད་ཙམ་བྱེད།།

གང་ལྟར་ཁྱོད་རང་བསྐྱུར་ཚིས་སུ།།

སྟོང་ཉིད་གཟུགས་ལ་འགྲོགས་འགོ་བརྩམས།།

སྟོང་པའི་མེ་ལོང་གོར་གོར་ནང་།།

སྟོང་ཉིད་དགའ་མ་ཁྱོད་ལས་དབེན།།

ཕྱི་ནང་གསལ་བའི་དྲན་འཛིན་བཞིན།།

ལོ་བསྙལ་ཟླ་བསྙལ་དགུན་ཆང་ནང་།།

ཕར་ལ་ཧད་ཀྱིས་གཉིད་འདོད་ཀྱིས།།

བརྩེ་བའི་མེ་ཏོག་བཞད་པར་བྱེད།།

ཚུར་ལ་འཛུམ་མ་འཛུམ་ཙམ་གྱིས།།

གསེར་གདུབ་ཨ་ལོང་ཡང་ལོང་འདི།།

བདག་ཉིད་ཁོ་ནར་བྱིན་པར་མཛད།།

ད་ནི་རྣམ་རྟོག་རྦ་རླབས་རིང་།།

ཤུགས་ཀྱིས་འཕྱུར་བའི་བར་གླགས་སུ།།

ལྕགས་ཀྱི་ལྷམ་སྒྲོག་ཐུང་ངུ་དེ།།

མདུད་པའི་ལས་ལ་འབད་སྟབས་ཀྱིས།།

ངུ་སྙིང་ཆེན་པོའི་ངུར་སྨྲིག་གོས།།

རླུང་གིས་བསྒུལ་བར་ཚད་ཅིག་བྲལ།།

ཁྱོད་རང་ཁེར་རྐྱང་ལམ་དུ་བཞུད།།

མགོ་སྤུ་ཆད་པའི་དུས་ཚིགས་ནང་།།

ངོ་གདོང་དམར་པའི་འུ་གཉིས་ཀྱི།།

གཉེར་མ་འགུལ་འགུལ་བྱེད་ཡོང་ཚེ།།

དགའ་བ་སྟོང་གི་སོ་དཀར་དེ།།

ལན་གཅིག་ཡར་མར་ཤོར་དོགས་ཀྱིས།།

མཚན་སྨག་དེ་ཡི་ལས་དབང་ཡང་།།

ཧ་ཅང་ངལ་བའི་དབྱིངས་སུ་ཚུད།།

མིད་པ་ཚ་བའི་རས་གོས་དག།

ཤེལ་སྒོ་གས་པའི་ཚུགས་ཀ་ལྟར།།

བདག་ཡིད་ཆང་གིས་མནར་ན་ཡང་།།

ཧ་ཅང་འགོད་མེད་སེམས་སུ་འཚང་།།

དབྱིན་སྐད་ནང་གི་དྲན་གདུང་དེས།།

སྐྲ་ལོ་རེ་འགའ་དཀར་ལ་ཉེར།།

སྨིན་མ་སྟུག་པོ་དུད་ནས་ཐལ།།

ཚོར་སྣང་སྟོང་པའི་ཕོར་བུ་རུ།།

ལྕགས་ཐབ་ནང་གི་ངོ་རིས་ཟུང་།།

ཡོམ་ཡོམ་འདར་འདར་བྱེད་པ་ན།།

དྲན་པ་རུས་པའི་མིག་ཀོང་ནང་།།

དལ་གྱིས་དགོད་ཙམ་བྱེད་གྲབས་ཀྱིས།།

ཨ་ཕའི་མགོ་བོ་རྙིང་པ་འདི།།

ཡར་མར་ལྷ་ཡི་གོམ་དུ་འཐེན།།

འཐེན་སྟངས་རེ་ལ་དམྱལ་བ་རེ།།

དམྱལ་བ་རླུང་གིས་མནར་བ་ན།།

ཁྱོད་ཀྱིས་བྲིས་པའི་འཕྲིན་ལན་ནང་།།

ང་ནི་དབུས་ཀྱི་གྲིབ་རིས་ཏེ།།

ཉམ་ཐག་ཁྱོད་ཀྱི་དྲུང་དུ་དུད།།

གློ་བུར་དགའ་མདོག་སྟོང་ཞིག་བྱས།།

ད་ནི་ཁྱོད་ཀྱང་ངུ་སྙིང་མང་།།