གངས་ཅན་ཆོས་གཞུང་ཤེས་རིག་ནོར་བུ་ཡི།།

རྔམ་ཁ་མཐུག་ཅིང་སྲ་བརྟན་ལྕགས་རིའི་རྫོང་།།

ཡོངས་སུ་སྲུང་ལ་མཐའ་སྲུང་དཔའ་བོའི་ཚུལ།།

ཚུལ་ཁྲིམས་བློ་གྲོས་དོན་གྱིས་དྲིན་ཆེན་ཡིན།།

མི་རིགས་གང་ཞིག་འཆི་བའི་སྲོག་གི་གནད།།

སྐད་དང་ཡི་གེར་གོ་བའི་གཟུགས་རྒྱང་ཅན།།

དུས་ཀྱི་འཚུབ་འགྱུར་རྒོད་པའི་ཕྲག་བར་ནས།།

མ་བོར་ཕྱི་རབས་གངས་ཕྲུག་གཞོན་ནུར་སྤྲད།།

འགའ་རེས་སྲོལ་རྒྱུན་ཡིན་ཞེས་མཐའ་དག་དོར།།

ལ་ལས་སྲོལ་རྒྱུན་རྙིང་པར་མཁྲེགས་འཛིན་བྱེད།།

ཁྱེད་ནི་མཐའ་གཉིས་སེལ་བའི་སྒྲོན་མེ་ཞིག།

གནའ་དེང་ཟུང་དུ་འབྲེལ་བའི་ཤེས་རབ་ཡིན།།

གངས་ཕྲུག་གཞོན་ནུ་སྤོབས་པའི་གད་རྒྱངས་ཅན།།

བདེ་ཐང་འཚར་ལོངས་འབྱུང་བའི་གཞི་མ་སྟེ།།

བྱམས་བརྩེ་གཉིས་ལྡན་སྐྱེ་འགྲོའི་ཡུམ་ཆེན་དེའི།།

བདེ་ཐང་འཕྲོད་བསྟེན་འཆད་ལ་ཁྱེད་ནི་བྲེལ།།

འདས་སོང་ལོ་རྒྱུས་གཡུ་ཡི་མེ་ལོང་དུ།།

མ་འདྲེས་གསལ་པོར་ཤར་བའི་སྐྱོ་གར་ཞིག།

རྟོགས་ནས་བོད་ཡུལ་ཆོས་རྒྱུད་གྲུབ་མཐའ་ཁག།

མཐུན་སེམས་གོང་བུ་གཅིག་ཏུ་འཁྱིལ་བར་བྱས།།

སྐྱེ་འགྲོ་ཀུན་གྱིས་ཀུན་ནས་གཅེས་པ་ཡི།།

ཚེ་དང་སྲོག་ལ་ཕུལ་བའི་རྔུལ་ཆུ་ནི།།

བོད་རྒྱ་ཡིད་ཀྱི་ཞིང་སར་གཏོར་བ་ཡིས།།

གང་ལ་ཕོག་དེར་བྱང་སེམས་ལྗོན་པ་འབུས།།

རིས་མེད་རྒྱལ་བསྟན་ཡོངས་ཀྱི་ཆོས་གཞི་ཆེ།།

དམ་པའི་ལུང་གིས་བསྔགས་པའི་ཆོས་སྡེར་དེར།།

ཁྱེད་སྐུའི་རྣམ་དཔྱོད་འོད་ཟེར་རེག་པ་ཡི།།

སྐྱེ་བོ་གང་དག་འདྲ་འདྲའི་མི་འདྲ་ཡིན།།

མུན་སྤྲུལ་འབྱུང་པོས་མ་བྱས་གླེང་འགེལ་དང་།།

མ་གསུངས་སྒྲོ་འདོགས་ལ་སོགས་འཆལ་གཏམ་ཚོགས།།

སྙན་གྱིས་གསན་ཡང་ཡ་ལན་མི་འདེབས་པ།།

ཞལ་ཆེམས་ཐུགས་ཀྱི་དཀྱིལ་དུ་བཟུང་བས་ཡིན།།

བསྟན་སྲིད་ཟུང་གི་ལས་ལ་རྟག་འགྲུས་པའི།།

དམ་པའི་སྐྱེས་བུ་གང་དག་གཅིག་རེ་བཞིན།།

ཞི་བར་གཟིམས་པའི་སྣང་ཚུལ་འདི་མཐོང་ན།།

བདག་ནི་ཁྱེད་ལ་ལྷག་ཏུ་སེར་སྣ་ཡོང་།།

ཁྱེད་ནི་མི་འགྱུར་སྲ་བརྟན་བྲག་རི་བཞིན།།

དཔག་ཡས་ཚེ་མཐའ་ཡས་པའི་སྐུ་ཚེ་བཞིན།།

འབྱུང་འགྱུར་དུས་ཀྱི་ལམ་སྟོན་སྒྲོན་མེ་རུ།།

དཔྱོད་ལྡན་མཁས་པའི་ཚོགས་དག་ཅིས་མི་སྨོན།།

རྩོམ་པ་པོ། ཁྱབ་གདལ།

རྩོམ་སྒྲིག་པ། མགར་རྒྱལ་སྲས།