2023-02-17
ལོ་འདིར།
ནད་མུག་འཁྲུག་རྩོད་ཀྱི་རྒུད་པ་ཆེ་ཞིང་།
རྐྱེན་དང་བར་ཆད་ཀྱི་བུ་ཡུག་འཚུབས་སོང་།
ལོ་འདིར།
ནང་སེམས་ཀྱི་གདུང་བ་དྲག་ཏུ་འཕྱོས་ཤིང་།
གནོན་ཤུགས་ཀྱི་ཁུར་པོ་རབ་ཏུ་ལྕི་སོང་།
དེ་ལྟར་ནའང་།
ང་ཚོས་ལོ་སར་གྱི་གཏང་རག་ཅིས་ཀྱང་
བཤམ་དགོས།
ཕུན་ཚོགས་སྡེ་བཞིའི་སྡེར་ཁ་ཅིས་ཀྱང་
བསྒྲིག་དགོས།
དེ་ནི་ཅི་ཞིག་ལ་རྗེས་དྲན་བྱེད་ཆེད་མིན་པར།
འབྱུང་འགྱུར་གྱི་ལས་བྱ་མཐའ་དག།
བདེ་ལེགས་སུ་ཡོང་བའི་རྟེན་འབྲེལ་གྱི་
མཆོད་ཆང་ཐོག་མ་དེ་ཡིན།
དེ་ནི་མཛེས་སྡུག་རྣམ་པར་བཀྲ་བའི་
སང་ཉིན་གྱི་ཉི་འོད་ཁོ་ན་བསུ་ཆེད་ཡིན།
ན་ཟླ་ཚོ།
རྫོགས་ལྡན་གྱི་དུས་སྟོན་འདི་ལ།
གསེར་སྐྱེམས་གཙང་མ་ཞིག་བླ་མར་མཆོད་
དང་བྱིན་རླབས་ཀྱི་ཚན་ཁ་འབར་འོང་།
ན་ཟླ་ཚོ།
སེམས་ཀྱི་གཏང་རག་ཅིག་ཕ་མར་ཕུལ་དང་
བྱམས་བརྩེའི་ཉི་འོད་ཀྱིས་འཚོས་འདུག།
ན་ཟླ་ཚོ།
གླུ་སྐད་སྙན་མོ་ཞིག་ནང་མི་ལ་ཕུལ་དང་
ཁྲེལ་གཞུང་གི་དམ་ཚིག་བསྲུངས་འདུག།
ཆུང་དུས་ལོ་སར་ནི་
ཐུག་རྒྱུ་མེད་པའི་དུས་ཚིགས་ཤིག་གི་
ཀ་ར་གོ་རེ་ཞིག་ལ།
ཤོག་སྦག་བག་ཆ་ཞིག །
རྒས་དུས་ལོ་སར་ནི་
ཤིན་ཏུ་མྱུར་བའི་དུས་ཚོད་ཅིག་གི་
ལྷན་འཛོམས་ཐུང་ངུ་ཞིག་ལ །
མིག་ཆུ་སྤར་མོ་གང་།
རྩོམ་པ་པོ། རླུང་སྲས།
རྩོམ་སྒྲིག་པ། མགར་རྒྱལ་སྲས།
རྩོམ་གསར། 10