ཆུ་འཛིན་དཀར་པོའི་སྒེག་མདངས་རབ་བཀླུབས་འཇམ་མཉེན་སོར་རྩེ་འདར་བ་ཡིས། །

རྒྱུད་མངས་དབྱངས་ཀྱི་སྙན་པ་དཀྲོལ་ཅིང་སྲིད་པའི་མཁར་རྫོང་བསྒུལ་བ་མོ། །

མཛེས་བྱེད་སྟོང་འབར་མྱུར་ལྡེམ་གར་རྩེན་གཟུགས་འཆང་སྲིད་ཞིའི་སྒེག་ལྡན་མ། །

དབྱངས་ཀྱི་བུ་མོ་དེང་འདིར་བྱོན་ཞིག་གསུང་སྙན་གདངས་ཀྱི་དངོས་གྲུབ་སྩོལ། །

བཀྲ་ཤིས་དཔལ་འབར་གཡང་ཀུན་ཆགས་པའི་གནམ་ལོ་གསར་པའི་ཚེས་འགོ་ལ། །

ལོ་སར་སྐྱིད་འཛོམས་བསུ་བའི་སྟ་གོན་དགུ་ཐུག་མཆོད་པ་ལྷ་ལ་འབུལ། །

འདས་དོན་མི་སྡུག་འཆིང་བ་མཐའ་དག་བགྲང་བྱ་གོང་མའི་གསེབ་ཏུ་བརྫངས། །

གདོན་བགེགས་རིགས་ཀྱི་གནོད་འཚེ་དགྲ་ཀུན་རྟིང་རྨང་རྩ་ནས་ཟློག་གྱུར་ཅིག །

སྲིད་པ་གངས་ཀྱི་འདབས་རོལ་འདི་ནས་གནམ་ལོ་བསུ་སྟངས་ཁྱད་དུ་འཕགས། །

མཐོན་མཐིང་དགུང་གི་ཉི་གཞོན་གསར་པའི་གསེར་མདངས་རི་ལ་ཕོག་པ་དང་། །

ལྷ་ཤིང་ཤུག་པའི་ངད་ལྡན་བསང་དུད་ཆུ་འཛིན་ཕྲེང་བའི་རྒྱུན་ལ་བསྲེས། །

དག་གཙང་མཁའ་དབུགས་ཀློང་ན་འབྱར་བའི་དྲི་ངན་རྫས་འགྱུར་འཁྲུད་པར་བྱེད། །

ཡུན་བྲལ་སྤུན་མཆེད་དཀྱུས་སུ་འཛོམས་ཏེ་ཁྱིམ་ཕུག་ཐབ་ཚང་དྲོས་ཉིན་མོ། །

གཉུག་མའི་སེམས་ཁམས་གུ་ཡངས་ཆགས་ཤིང་བཀྲ་ཤིས་ཁ་གཡང་དགུང་ནས་འཐོར། །

ཞིམ་མངར་བཅུད་ཀྱི་ནོམ་ལ་རོལ་གྱིན་བཤམ་བསྒྲིགས་སྣ་མང་མཛེས་པ་འཕྲོ། །

ཞོ་འོ་མར་རྩམ་བྲོ་བཅུད་ཐུད་ཀྱིས་གདོང་དམར་བོད་ཀྱི་ལོ་སར་བསུ། །

སངས་པའི་མགྲིན་ངག་དལ་འགྱུར་ངང་ནས་འབྲོག་གླུ་སིང་སིང་དབྱངས་ལ་འཐེན། །

བོད་གོས་གཙང་མའི་ཤམ་ཐབ་མནབ་ཅིང་རལ་བ་སིག་སིག་གནམ་ལ་གཡུག །

མི་རབས་གོང་མའི་ཤུལ་དུ་བཞག་པའི་དོན་ལྡན་གར་གྱི་ཞབས་བྲོ་འཁྲབས། །

འགྲོས་ལྡན་ཅང་ཤེས་བང་རྩལ་འགྲན་གྱིན་བོའུ་དང་དར་གྱི་རྩེད་དགར་རོལ། །

མཆོག་གྲུབ་བཀྲ་ཤིས་ཉིན་བཟང་འདི་ལ་བདེ་ལེགས་དཔལ་གྱི་ཁ་གཡང་འབོད། །

དབུ་དཀར་བགྲེས་པོའི་ཚེམས་སྒོ་ཐོར་ཡང་འབྲུ་དྲུག་ངག་དང་མ་འབྲལ་ཤོག །

སྟོབས་རྒྱས་དར་མའི་ལུགས་གཉིས་གང་གི་བྱ་གཞག་ཚེགས་མེད་འགྲུབ་པར་ཤོག །

བློ་གསར་གཞོན་ནུའི་རྣམ་དཔྱོད་རྒྱས་ཤིང་རྨོངས་པའི་སྨག་རུམ་་གཏོར་བར་ཤོག །

ཤཱཀྱའི་བསྟན་པས་གླིང་བཞིར་ཁྱབ་ཅིང་ནད་མུག་འཁྲུག་རྩོད་ཞི་བར་ཤོག །

བསྟན་འཛིན་སྐྱེས་བུ་ཐུགས་དགོངས་མཉམ་ཞིང་འགྲོ་ཀུན་བདེ་བའི་དཔལ་གྱུར་ཤོག །

ཁམས་གསུམ་སྐྱེ་དགུ་མཐའ་ཡས་རྣམས་ཀྱང་ཆོས་ཀྱི་བག་ཆགས་ཐོབ་པར་ཤོག །

མདོར་ན་སྲིད་པའི་ཁྱོན་ཡངས་འདི་ནི་འཚེ་མེད་ཞི་བདེར་གནས་པར་ཤོག །

རྩོམ་པ་པོ། རྒོད།

རྩོམ་སྒྲིག་པ། མགར་རྒྱལ་སྲས།