ཕ་ཡུལ་དུ་ཁ་བ་འབབ་པར།

དུས་ཚིགས་དང་འབྲེལ་བ་གཏན་ནས་མེད།

དཔྱིད་ཀར། ལྗང་ལོའི་སྐྱེས་སྟོབས་དང་།

མེ་ཏོག་གི་བསུང་ཞིམ་ཁྱེར་ནས་འབབ་ཡོང་།

དཔྱིད་ཀའི་ཁ་བ་ནི་མེ་ཏོག་ལྟར་མཛེས་ལ།

དཔྱིད་ཀྱི་བུ་མོའི་མཆུ་སྒྲོས་ལྟར་ཞིམ་

མངར་ལྡན།

དབྱར་ཁར། སྔོན་བརྡ་མེད་པར།

གློ་རྡེག་ཏུ་བབས་ནས།

རྩྭ་སྔོན་དང་མེ་ཏོག་བཀླུབ་འགྲོ།

དབྱར་ཁའི་ཁ་བ་ནི།

སྙན་ངག་གིས་བཏེགས་པའི་ལྷ་རྫས་ཤིག་ཡིན།

སྟོན་ཁར། སྟོན་རླུང་གི་སྨྲེ་སྔགས་ཁྲོད།

སེར་ཐིག་ལྷུང་བའི་ལོ་མ་རེ་རེའི་སྟེང་གི།

མཛའ་མོའི་ཕྱིར་མིག་ལྟ་བུའི་ཁ་བའི་འདབ་

མ་རེ་རེས།

བདག་སེམས་ལ་མིག་ཆུ་དང་ན་ཟུག་སློང་འོང་།

དགུན་ཁར། ནོར་ཁྱུའི་རྗེས་སུ་སྙེག་པའི།

འབྲོག་ཕྲུག་གི་གོམ་སྟབས་ཁྲོད་ལྷུང་བའི།

སྙན་ངག་གི་མངར་སྐྱུར་འདྲེས་པའི་ཁ་ལེབ་མོ།

རུས་རྐང་གིས་བཀྱགས་པའི་ལྗིད་ཚད་ཅིག་ཡིན།