གཙང་བོ་རྒྱང་ལ་བཞུར་བ་འགལ་རྐྱེན་སྣ་ཚོགས་མང་སོང་།།

གྲུ་གཟེངས་འདམ་ལ་ཟུག་པ་རྒྱུ་མཚན་ལུང་ཚིག་ཡོད་སྐད།།

རང་སེམས་རྫ་སྤང་དཀྱིལ་ལ་ཤྭ་བ་ཡུ་མོ་རང་འཁོར།།

ང་ཡི་ལས་འཕྲོར་ཁ་དོག་དབྱིབས་གཟུགས་གང་ཡང་མེད་སྐད།།

མི་ཚེའི་བསམ་དོན་རི་མོ་ལ་ཁའི་ན་བུན་འདྲ་ལེ།།

རེ་སྒུག་འཇག་མའི་ཤུགས་གླུ་ཞོགས་པའི་ཉི་རྡུལ་གཡེང་ས།།

འདས་སོང་གང་ཞིག་དྲན་པའི་ལབ་རྩེ་ལྷབ་ལྷུབ་བསྐྱོད་ན།།

དུང་བ་ཙན་དན་ལོ་མ་ལྷགས་པས་ནམ་ཁྱེར་ཆ་མེད།།

སྟོན་སྤྲིན་ཐོད་ལ་འཆིང་བའི་ཕ་གའི་རྫ་རྒན་ཤོད་ན།།

ང་ཡིས་རི་དྭགས་རྨས་མ་ཁེར་རྐྱང་གདུང་བས་གཉོར་ཡོད།

ད་དུང་ཐོག་མའི་འཛུམ་ཆུང་སྒོར་སྒོར་ཟླ་བ་འདྲ་བོ།།

ཁྱོར་བའི་ཆུ་ལ་བཤམས་ནས་རང་གི་མེ་ལོང་བྱས་ཡོད།།

མི་འགྱུར་དམ་བཅའི་རི་མོ་མ་བྲིས་རང་དོན་ཡིན་དུས།།

མཉམ་འཐུང་འཚོ་བའི་སྐྱིད་སྡུག་སྙིམ་པ་གཅིག་ལ་བླུག་དུས།།

མཚོ་མོ་རང་འཁྱིལ་ཁ་ཡི་མཚོ་བྱ་རང་མཐུན་འདྲ་ཡིན།།

མཛའ་བཅུག་མོ་ཡིའ་མིག་ཟུང་ཞི་བ་བརྩེ་བ་ཡིན་ནོ།།

འུ་བུ་ཅག་གི་ལས་འཕྲོ་ན་ཚོད་ཉི་མར་ལྡེ་དུས།།

ཚ་བས་མ་སྲེག་གྲང་བས་མ་འཁུམ་མ་འདར་སྔོན་དུ།།

ལོ་ཆུང་བྱིས་པའི་རྩེད་ར་དག་པ་ལྷ་ཡི་ཞིང་རེད།།

མ་བཅོས་བརྩེ་བའི་ངང་རྒྱུད་ཡར་ཚེས་ཟླ་གཞོན་འཁྲི་ཤིང་།།

ཕ་ས་ཨ་ཆེན་གངས་རྒྱབ་ཙག་ཁ་བུ་ཡུག་བཙན་ཡང་།།

འཁོར་བའི་སྙིང་བོར་བཞད་པའི་གངས་ལྷ་མེ་ཏོག་ཡོད་ས།།

ལོ་ཡི་ལ་མོར་བརྒལ་ནས་ཅི་ཞིག་རྙེད་པ་འདྲ་ཡང་།།

གང་ཞིག་བོར་བརླག་ཐེབས་པའི་མ་ཤི་དམྱལ་བར་སྐྱེས་ཡོད།།

ཁྱོད་སོང་ཁོ་ར་ཁོར་ཡུག་ཁུར་མོང་ཁ་བ་འབབ་འབབ།།

སྡེ་ལམ་གྱ་གྱུའི་གཞུང་གི་ཁྱོད་རྗེས་རབ་བེ་རིབ་བེ།།

དྲན་རྟེན་ཡིག་འབྲུའི་རྣ་རྒྱན་ཚེ་རབས་འདི་གའི་ལེགས་སྐྱེས།།

ང་རང་རྒྱང་ལ་ལོག་ཁར་བྲིས་པའི་དམ་ཚིག་འདི་ཡིན།།