ལྡེབས་རིས་ཤིག་ལ་ལྐོག་བཤད།

རོ་མྱག་གི་འདམ་དུ་འབྱིང་བའི་སྐར་མ་ཞིག་གིས།

ཞོགས་པའི་ཉི་འོད་ཀྱིས་རི་རྩེའི་ཟིལ་ཆུ་གཏོར་བར་སྒུག།

ཡིན་ན་ཡང་། སྐར་མའི་དཔྲལ་བར་ཐོག་པའི་མིག་ཟུང་ལ།

ཉི་འོད་ཀྱི་སྤྲིས་མ་བཏུང་བའི་ནུས་པ་མི་འདུག།

རླུང་གི་སྒྲོག་རྩེར་འཁྱིལ་བའི་ཆུ་བོ་དང་མེ་ཏོག་གི་ལྦུ་བ།

ཆུ་བོའི་ཁ་རུ་གཡེངས་པའི་རྣམ་དག་གི་བརྩེ་དུང་།

མིག་མདུན་གྱི་ཤོག་བུ་སྟོང་པ་ཞིག་ཏུ་ཨུ་ཚུགས་ཀྱིས་བྲིས་ན་ཡང་།

དོན་མི་གོ་བ་འདིས་ཁྱོད་ཀྱི་མཚོན་ཚབ་ཡོང་གི་མ་རེད།

2 མིང་མེད།

ང་ཡི་རྟ་ཕོ་རྔོག་དཀར་འདིའི་རྟོད་ཐག།

ཁྱོད་ཀྱི་དོན་ལྔ་སྣོད་དྲུག་གི་རྟོད་ཕུར་ལ་བཏགས་འདུག།

ད་ནི་ང་རང་མཐའ་ཀླས་པའི་ནམ་མཁའ་འདིའི་རྒྱ་ཁྱོན་མིན།

འདི་རུ་ཁྱོད་ཀྱི་གནས་བཅའ་སའི་ས་མིག་ཆུང་ཆུང་ཞིག་ལས།

ཕྱི་རོལ་གྱི་བྱེའུ་ཆུང་དག་གི་གཤོག་ཟུང་རྐྱོང་ས་མེད།

ངས་མཐའ་ཡས་པའི་དྲན་གདུང་གི་མེ་ཕུང་བསྒྲོན་ཏེ།

མུན་ནག་ནང་ནས་ཁྱོད་ཀྱི་གྲིབ་གཟུགས་ལ་བལྟ་ཆོག།

ཡིན་ན་ཡང་། ཉིན་འོད་ལམ་ལམ་ནང་གི་མུན་

ནག་ལ་ང་ཤིན་ཏུ་སྐྲག།

ཆར་པ་དང་ཁྱེད་གཉིས་ལ་ཅི་ཞིག་འབྲེལ་བ་ཡོད།

ཆར་པ་ཟམ་ཟིམ་འབབ་པའི་ཞོགས་པར།

ཁོ་བོ་ཁྱོད་དང་འཕྲད་པར་ལྟ་བུའི་དགའ་སྤྲོ་ཚད་མེད་སྐྱེས།

ལུས་ཀྱི་ཕྱི་ནང་དང་སེམས་ཀྱི་གཡས་གཡོན་དག་

ཆར་པར་སྦང་།

རྗེས་སུ་ང་རང་སྲང་ལམ་གྱི་སློང་མོ་བ་དེ་ཚོས་གྲལ་དུ་ཡོད་སྲིད།

ངས་མིག་ཟུང་གིས་ཁྱོད་ལ་བརྩེ་བ་བསླང་སྲིད།

ངས་ཁྱོད་ལ་བརྩེ་བ་སློང་དུས་ཁྱོད་ཀྱིས་

ང་ལ་དུས་ཚོད་བསླང་ཡང་སྲིད།

དངོས་གནས་དེ་ལྟར་ཡིན་སྲིད་ཚེ།

ངས་སྐྱེ་བ་འདིའི་དུས་ཚོད་ཡོད་དོ་ཅོག་རྩིས་མེད་

དུ་བཏང་ངེས།

བརྩེ་བའི་གྲོགས།

ད་ལྟའི་བདག་གི་ཉིན་ཞག་རེ་རེ་ལ།

དུས་ཚོད་སྟོང་ཕྲག་བརྒྱད་དང་དྲུག་བརྒྱ་བཞི་བཅུ་ཡོད་འདུག།

དངོས་གནས་ཧ་ལས་པ་རེད་བཞག།

རྡོ་བ་ཞིག་གི་མིག་དཔེ།

ཡུལ་ལུང་འདིའི་གཡས་རི་གཡོན་རི་དག་ལ།

ནག་ཉེས་མཚོན་བྱེད་ཀྱི་དར་ལྕོག་ཁ་གང་མ་ཞིག་བསྒྲོན་འདུག།

གདུང་བའི་ང་རོ་བསྒྲགས་ཏེ་རླུང་དམར་གྱི་སོ་ཁ་ན་

འཕྱོ་བཞིན་གདའ།

ད་ནི་འུ་ཚོ་ལ་བཟོད་བསྲན་མི་ཐུབ་པ་ཅི་ཡང་མེད།

སུག་བཞིར་སུམ་སྒྲོག་བརྒྱབ་པའི་ང་རང་ཚོ།

སོ་སོའི་རྐང་ལག་གཡོ་འགུལ་ཙམ་ལ་ཚིག་པ་ཟ་བ་ལས།

བཟོད་བསྲན་མི་ཐུབ་པ་ཅི་ཞིག་འདུག་གམ།

རང་རེ་ཚོ་རྡོ་བ་ཞིག་གི་མིག་དཔེ་ཡིན་འོས།

རྡོ་བའི་ཚོགས་ཀྱིས་རྟ་མཆོག་ཆིབས་ཏེ་ཡོང་།

མེ་མདའི་ཡུ་བ་ནས་མར་འཛར་གྱིན་པ་ནི་རང་གི་ཁྲག་རྒྱུན་ནོ།།

དམར་ལྷང་ངེར། རླན་ནེར་རེར།

དེ་ནི་འཇིགས་སྐུལ་རིང་ལུགས་པ་ཞིག་དང་འདྲ་བོ་འདུག།

སེམས་ཀྱི་ཉི་ཟླ།

ཆུ་ཡི་མདངས་ལྟར་མ་བཞུར།

ང་ཡི་གཉའ་ལྟག་ལ་ལྗིད་ཚད་ཕུད་ས་ཡོད།

སེམས་ཀྱི་ལྕགས་ནག་གི་མདུད་པ།

སོ་སོའི་མིག་ཆུ་ནང་ནས་དགྲོལ་ཆོག།

ནམ་མཁའ་ཡུག་གཅིག་གི་འོག་ནས་འཁྲིས་སུ་ཡོད་

ཀྱང་མེད་ཀྱང་།

ངས་ཁྱོད་ལ་ཉི་འོད་ཀྱི་སྐུད་པ་སླེ་བཞིན།

དུས་ཚོད་ཀྱི་གྲིབ་སོ་བཤམ་ཆོག།

སྙིང་སྡུག་ཨ། ང་ཡི་སྙིང་སྡུག།

ཤ་དང་རུས་པའི་མེ་ཏོག

ཆུ་མོ་མར་མར་བཞུར་སོང་།

རྡོ་བ་ཆ་ཆོའི་ཁྲོད་ན་ང་རང་ལུས་འདུག།

རྒྱང་རིང་བའི་མཛེས་སྡུག་ལྡན་པ་ལགས།

ངས་རང་ཉིད་དུམ་བུར་གཉིས་སུ་བཏང་བཞག།

ད་ནས་བཟུང་ཁྱོད་ལ་ཞེད་སྣང་མེད།

མིག་ཟུང་གཞན་གྱིས་ངའི་ལུས་སྟེང་ནས་ཁྱོད་རང་རྙེད་མི་སྲིད།

ངས་སེམས་ངོགས་ཀྱི་ཁྱོད་ཀྱི་གཟུགས་བརྙན་ལ་རེག་ཐུབ།

དེ་ནི་རྡོ་ལ་བྲིས་པ་བཞིན་ཚུགས་ཀ་མེད་ཀྱང་ཡལ་རྒྱུ་མེད།