དཀར་མཛེས་ལ་བསྟོད་པ།

མདང་ནུབ་རྨི་ལམ་ཞིང་གི་ལྟེ་བ་ནས།།

ཤེལ་གྱི་ཕྲེང་བ་བརྒྱུས་པའི་གངས་རིའི་ཚལ།།

གཡུ་ཡི་མེ་ལོང་བཀོད་པའི་རྩྭ་ཐང་དཀྱིལ།།

མེ་ཏོག་དྲི་བསུང་འཐུལ་བའི་ཕ་ཡུལ་ཞིག།

བདེ་ཆེན་ལྷ་ལས་འབབ་པའི་ཡུལ་ཞིག་རྨིས།།

རྨིས་ཤིང་རྨིས་ན“གནས་མཆོག་དཀར་མཛེས”རྨིས།།

རླུང་འདི་ལྡང་ཐེངས་མང་བའི་ལྗོན་པའི་འོག།

སེམས་པ་དལ་གྱིས་སོང་བའི་སྡེ་འདབས་ནས།།

རྟ་ཕོ་གཡུང་མོ་ཞིག་དང་གདོང་ཐུག་བྱུང་།།

ཟག་བཅས་ཕུང་པོ་འདི་ཡི་རྣམ་རྟོག་སྟེ།།

རང་དབང་ཡེ་ནས་མ་བྱུང་བཞོན་ནས་སོང་།།

སོང་ཞིང་སོང་མཐར་ཡར་ཀླུང་ཆུ་བོའི་འགྲམ།།

རྟ་ཕོ་ཁམ་པ་ངེད་གཉིས་ངལ་ཞིག་གསོས།།

རྩེ་མོ་དགུང་ལ་བསྙེགས་པའི་མཆོད་རྟེན་ཞིག།

བྱམས་པ་ལྷ་ལས་དྲངས་པའི་གཟུགས་རིས་ཤིག།

མིག་ནས་འཁྲུངས་ཤིང་བརྩེ་བའི་གཞོང་བ་རུ།།

ཆུ་མིག་དྭངས་མོ་གཡས་སུ་འཁྱིལ་གྱིན་འདུག།

“གནས་མཆོག་དཀར་མཛེས”ལྗོན་པའི་འོག་ནས་མཇལ།།

མཚན་མོ་རྨི་ལམ་གྲོང་དུ་འགྲིམས་ཐེངས་ཤིག།

ཆར་བསིལ་སེམས་སུ་ཕོག་པའི་མཚན་གཞུང་ལ།།

དཀར་མཛེས་གྲོང་ཁྱེར་མིག་ཏུ་དལ་གྱིས་མཇལ།།

ཨེ་མ་འདི་འདྲའི་གྲོང་ཁྱེར་ཉམས་དགའ་ཅན།།

སུམ་རྩེན་ལྷ་ལས་གཞལ་བའི་སྐྱེད་མོས་ཚལ།།

རྐང་དྲུག་བུང་བ་འཁོར་བ་ལོས་ཡིན་མོད།།

མཛེས་སྡུག་རྣམ་པར་བཞད་པའི་མེ་ཏོག་ཚོགས།།

རྣམ་གསར་གྲོང་ཁྱེར་བསྒྱུར་བའི་དུས་རྟེན་འདི།།

མི་རྣམས་སེམས་སུ་དགའ་དད་དཔལ་ལ་དགྱེས།།

ཁམས་བྲིས་མཁན་པོ་ལ་བསྟོད་པ།

ཨེ་མ་ཧོ།

དབྱངས་གསལ་གཟུགས་སུ་ཕབ་པའི་ཨ་ཕ་སྟེ།།

ཕ་ཤུལ་བུ་ཡིས་འཛིན་པའི་ཚོར་སྣང་བརྟས།།

དབྱངས་གསལ་ངོགས་སུ་སྨྱུ་གུས་ལམ་བྲིས་ཏེ།།

ཁམས་ཀྱི་ཕྱོགས་སུ་ཡིག་གཟུགས་སྣ་ཚོགས་ལ།།

འབྱུང་འགྱུར་ཞིག་ལ་དམིགས་པ་ཡུན་དུ་བཅོལ།།

ཡིག་རིས་མང་ཞིག་ཁང་ཆུང་གཅིག་ཏུ་བཏུས།།

ཁམས་པའི་བྲིས་ལུགས་འདི་ལ་སྲོག་ལྟར་གཅེས།།

སྒྱུ་རྩལ་ངོས་ཀྱི་ང་ཡི་ལམ་སྟོན་པ།།

བརྩེ་བའི་ངོས་སུ་བྱམས་པའི་རི་མོ་འབྲི།།

སེམས་སུ་ཟུག་པའི་བདེ་སྐྱིད་གྲོང་དུའང་།།

ལོ་རྒྱུས་ཨི་ཁུང་རལ་བའི་དུས་ཚོད་ཅིག།

མི་རྣམས་ངོས་སུ་ཤར་ཞིང་ཉེ་བར་གཅར།།

ང་ཡི་དབྱངས་གསལ་བཞོན་པའི་དགེ་བའི་བཤེས།།

མེས་པོའི་དམ་པའི་ཕྱག་གིས་འབྲི་བ་སོགས།།

ཡང་ནས་བསྲངས་ཤིང་སློབ་བུའི་རྒྱུད་དུ་སྦྱར།།

ཨེ་མ་འདི་ནི་གང་གི་འབྲས་བུ་འམ།།

བསོད་ནམས་གང་ནས་བསགས་པ་ཨེ་ཤེས་ལགས།།

གཉུག་མའི་རང་གཤིས་ཚུགས་པའི་ཤེས་རབ་ཅན།།

“ཁམས་བྲིས་དཔག་བསམ་དོན་འགྲུབ་”ཅེས་བྱའོ།།

དགེ་རྒན་ལ་བསྟོད་པ།

མཐོ་རིས་འོད་སྣང་འབར་བའི་གྲོང་འདི་ན།།

སྔུན་ཆད་རིག་འབྱུང་མང་ཞིང་འདི་ནས་དར།།

དབྱངས་གསལ་སོ་བཞིའི་ངོ་བོ་མ་ཡལ་ཞིང་།།

སྲིད་གསུམ་སྒྲོན་མེའི་ལམ་གྱི་གཡས་གཡོན་དུ།།

བཅུ་ཕྲག་རིག་པའི་འདབ་མ་ཕྱོགས་བཞི་འཐིམས།།

ཀྱེ་མ་དགེ་རྒན་དྲིན་འདི་སུ་ལ་བཤད།།

གཡུ་སྦྲང་བུང་བ་མེ་ཏོག་ནང་ནས་འཁྲུངས།།

གཡུ་སྦྲང་བུང་བ་གེ་སར་བཅུད་ཀྱིས་གསོས།།

ཞེས་པ་ལྟར་དུ་ཡང་དུ་དྲན་གྱིན་ན།

ང་ཡི་དགེ་རྒན་ཉིན་མཚན་དུས་དྲུག་ཏུ།།

སློབ་བུའི་ཕྱོགས་སུ་ཅང་ཤེས་སེམས་དེ་ཡིས།།

བྱམས་བརྩེ་དྲོད་ཀྱིས་སློབ་གྲྭའི་ཐོག་ཁང་སྐྱིད།།

གཤིས་ལ་འཛུམ་གྱིས་ཕྱུག་པའི་དགེ་རྒན་མཆོག།

ལང་ཚོའི་སྙེ་མ་སློབ་བུའི་ཕྱོགས་སུ་གཡོ།།

ངག་ལ་ཁུ་བྱུག་ལྟ་བུའི་སྙན་འཇེབས་མངའ།།

འབྱུང་འགྱུར་ལོ་ཟླ་དེའི་ནང་རྒྱལ་གྱུར་ཅིག།

“དཔྱིད་མགོ་མ་སླེབས་གོང་ནས་ཁུ་བྱུག་སླེབས།།

སློབ་མགོ་མ་ཚུགས་གོང་ནས་དགེ་རྒན་མཇལ།།”

དྲན་གཞས་དཀྱིལ་འཁོར་སྟེང་གི་དབྱངས་རྟ་རེར།།

དྲིན་ཆེན་དགེ་རྒན་ཞིག་ལ་བསྟོད་གླུ་ཕུལ།།

སློབ་གླིང་ཁོར་ཡུག་དེ་ཡང་དྭངས་ཤིང་གཙང་།།

དབྱངས་རྟ་ངག་ཏུ་གྱེར་བའི་ཐོག་ཁང་དུ།།

དབྱངས་གསལ་ངག་ནས་འཚོལ་བའི་སློབ་མ་ཚོས།།

དྭངས་གཙང་སེམས་པའི་ངོས་ཀྱི་ཡབ་ཆེན་ལ།།

བསྟོད་གླུ་ངག་ཏུ་གྱེར་ཞིང་དཔལ་ཡོན་ཤར།།

གསེར་བྲིས་ཚང་གི་ཡིག་མཁན་ལ་བསྟོད་པ།

སེམས་འདི་གཞོན་པའི་གཡས་གཡོན།།

སྣང་བ་ཞིག་ལ་བཅོལ་ཡོད།།

སྒྱུ་འཕྲུལ་གསེར་ཡིག་དཀར་པོ།།

གཞོན་པའི་ཁམས་སུ་ཟུག་ནས།།

དབྱངས་གསལ་ཕོ་བྲང་ངོས་སུ།།

སྒྱུ་རྩལ་ལེགས་ཞེས་སྨྲས་ན།།

མི་ཆོག་གང་ཡང་མེད་པའི།།

ཡིག་མཁན་ཉི་མ་རང་ཤར།།

འཁྲུངས་ལོ་ཅི་བསམ་དོན་འགྲུབ།།

ཚིག་ཚོགས་ཁམས་སུ་སྨྲས་ན།།

གཞོན་པ་བསྟན་བཤིག་ཚ་བོ།།

ཚོར་བའི་གཏིང་ལ་ཟུག་ཅིང་།།

མ་འོངས་འབྱུང་འགྱུར་ཁྲོད་དུ།།

ཁ་དགེ་བཀྲ་ཤིས་གྱུར་ཅིག།

སེང་ལྕམ་འབྲུག་མོ་ལ་བསྟོད་པ།

ཆོ་འཕྲུལ་མིག་དེ་དལ་གྱིས་ཕྱེས།།

སྣང་བ་བཏེགས་པ་དེ་ཡང་ཕྱེས།།

དལ་གྱིས་ཁྱོད་ཀྱི་མིག་མདངས་ལས།།

སེམས་ཅན་བྱེ་བའི་ཁ་དོག་ཏུ།།

སྣང་བ་རྒྱང་བའི་སྐུད་པ་བསླེས།།

མུན་པ་ཡོལ་བའི་ཞོགས་པ་རུ།།

སྣང་བའི་མེ་ལོང་ཀེར་དུ་ལངས།།

འོད་ཀྱི་གམ་དུ་ལང་ཚོ་བཙུགས།།

བྱུ་རུ་རྒྱན་སོགས་མེ་ཏོག་བཞེངས།།

ཉིན་སྲིབ་གཉིས་ཀའི་ནམ་མཁའ་རུ།།

སེང་ལྕམ་འབྲུག་མོའི་དྲི་བསུང་འཐིམ།།

ཕྱོགས་ནས་ཡོང་བའི་རླུང་བུ་རུ།།

སེམས་ཀྱི་བས་མཐའི་བུང་བ་དེས།།

ནང་སེམས་ཤིག་ལ་བབས་ཏེ་འོང་།།

འཕགས་མ་ཞིག་ལྟར་མཛེས་པས་ཁྱབ།།

མཚོ་ཁའི་ངང་བའི་འཕུར་ལྡིང་ནང་།།

བདག་སེམས་འགོ་མ་དེ་རུ་འབུལ།།

སྐར་ཆེན་ཕྲ་མོའི་འོད་བཙལ་པས།།

ལང་ཚོའི་སྙེ་མའི་མགོ་བོ་མཐོ།།

གཞུག་ཏུ་ལྷུང་བའི་སེམས་པའི་ནང་།།

ཆ་ཙམ་མ་མཐོང་གྱེས་དགོས་བྱུང་།།

གསལ་སྒྲིབ་བྱུང་བའི་མཚན་མོ་རུ།།

ཡལ་འདབ་ཆུ་ཐིགས་སྒྲ་ཙམ་ལས།།

སེམས་སུ་འཐིམ་པའི་ཇག་པ་དེ།།

མི་མཐོང་ས་ནས་ཆ་ཤས་བོར།།

ལས་ཀྱིས་བཀྲུས་པའི་སྒོ་ལྔའི་ནང་།།

བདག་ལ་དབང་པའི་ལས་སྣང་བསལ།།

བདེ་ཆེན་གླུ་དང་མགུར་མའི་གཏམ།།

ནང་སེམས་ཤིག་ཏུ་ཕབ་དུས་ན།།

སྙིང་སྡུག་འོད་ཀྱིས་སྣང་བ་འདི།།

རི་མོའི་དབྱིངས་སུ་བསྐྱར་བྲིས་ཏེ།།

སྟོང་བའི་ཁམས་སུ་འཇོ་སྒེག་ངོམ།།

མི་ཡིས་བྲིས་པའི་ནམ་མཁའ་ཡང་།།

ཁྱོད་ཀྱི་དྲི་བསུང་དལ་གྱིས་འཐིལ།།

ཕ་ལམ་དམར་པོའི་འོད་གཡར་ཏེ།།

བདེ་ཆེན་ཟབ་མོའི་གླུ་གཞས་གསོན།།

ཀྱེ་མ་གསོན་དང་བདག་གི་ལགས།།

ཟང་ཟིང་བྱུང་བའི་སྲང་དེའི་དབུས།།

བྱུང་དང་མ་བྱུང་མ་ཟེར་རོགས།།

རང་གི་གྲིབ་མའི་ལམ་དེད་དེ།།

འཛུམ་གྱིས་ཕྱུག་སྟེ་བསླེབ་ཐུབ་བམ།།

སེམས་པའི་མེ་ལོང་གང་དུ་བདོག།

གསེར་ལས་སྐྱེས་པའི་མེ་ཏོག་ཀྱང་།།

གང་ནས་ཡོང་དུས་གང་ན་བདོག།

སེམས་ངོར་བྱོན་པའི་དབྱངས་ཅན་མ།།

བརྩེ་བའི་ཕྱག་རྒྱར་འོད་འཕྲོས་ནས།།

མེ་ལོང་ནང་གི་རང་ཉིད་ལ།།

བརྩེ་བའི་རླབས་སུ་རྒྱ་མཚོ་བརྒལ།།

སྣང་བ་ཞོགས་པའི་སེམས་པ་འདི།།

ཐོལ་གྱིས་བྱུང་བའི་ཚོར་བའི་སྟེང་།།

ཡིག་འབྲུ་སྐྱ་བོའི་ལམ་ཁྲིད་དེ།།

འཕགས་མ་ཞིག་གམ་དབྱངས་ཅན་མ།།

སེང་ལྕམ་འབྲུག་མོ་དེ་དང་གསུམ།།

རང་བཞིན་གཅིག་པའི་སྣང་ཚུལ་ཤོད།།

༼ སྦྲང་བུ། ༽