དབྱངས་ཅན་རྨི་ལམ་ནང་ལ་ཐེངས་མང་བྱོན།།

སེམས་སུ་སྙན་པའི་དབྱངས་ཀྱི་དངོས་གྲུབ་སྩོལ།།

དབྱངས་སྙན་རེ་རེས་ང་ཡིས་ནམ་མཁའ་གཤགས།།

འོད་དུ་འཚེར་བའི་ལམ་ཞིག་ཡོད་དམ་ཀྱེ།།

མཚན་གྱི་ཟླ་བ་སྔར་བཞིན་འོད་འཁྱིལ་འཁྱིལ།།

དབྱངས་ཅན་ཕྱག་གི་པི་ཝང་དཀྲོལ་བར་གནང་།།

རྒྱང་རིང་གནས་སུ་སྐར་ཚོགས་འོད་ཆེམ་ཆེམ།།

དེ་ན་བདེ་སྐྱིད་ཕྲན་ཚེགས་ཡོད་དམ་གང་།།

ཁྱོད་ནི་ང་ཡི་སྐྱོ་གྲོགས་ཁོ་ན་བྱེད།།

དམིགས་པ་གཅིག་ཏུ་གཏོད་ཅིག་སྲོག་གི་ཟླ།།

འཇིག་རྟེན་འདི་ནས་གསོན་པ་དཀའ་ནའང་།།

དམིགས་ཡུལ་འཚོལ་ཕྱིར་རྒྱང་རིང་གནས་སུ་ཕྱིན།།

ས་ཚུགས་རེ་ནས་ངལ་གསོ་ཨེན་ཙམ་བྱོས།།

དེ་ནི་ལས་ཀྱི་ལམ་ཕྲན་དངོས་མ་ཡིན།།

དེ་ན་བསམ་ཕྱོགས་གཅིག་པའི་འོད་ཁྱུ་ཡོད།།

རྣམ་དག་སྙིང་གི་གཏམ་ཡང་སྐྱེས་སུ་ཕུལ། །

མི་ཚེའི་དུས་ཡུན་ཐུང་བ་ཤེས་པར་གྱིས།།

འཁོར་བའི་འཆིང་ཐག་རྒོད་པའི་གྲུ་ཁ་ནས།།

བྱམས་པའི་མི་ལ་བརྩེ་བའི་ལག་ཟུང་སྐྱོངས།།

ལས་སྐལ་དགོས་འདོད་ནོར་བུ་ཧ་ཅང་དཀོན།།

བདེན་པ་གཙུག་ཏུ་བཀུར་ཏེ་གཅེས་པར་གྱིས།།

སྤྱིར་ན་ཞེ་སེམས་དལ་ལྷོད་ངང་བྱས་ཏེ།།

སྙིང་གཏམ་འགའ་ཡང་ལྐོག་ནས་གློད་འདོད་མོད།།

གནས་སྐབས་དུས་ཚོད་མེད་སོང་ཟེར་སྐད་ན།།

ཞེ་སེམས་འཁྱག་མོད་མེད་པར་གཏོང་བར་བྱེད།།

ཡིད་ཀྱི་དགའ་སྐྱོ་དུ་མའི་མངའ་ཐང་ནས།།

སྒོ་གསུམ་དད་པའི་ཡང་སྙིང་ཁྱོད་བྱས་ཏེ།།

བརྩེ་བའི་དྲོད་དང་གློ་བ་ཁྱེད་ལ་གཏད། །

འདི་ཡིས་ཆོག་གམ་སེམས་ཀྱི་མགྲོན་པོ་ལགས།།

འདི་ཡིས་ཡོང་ངམ་དམིགས་ཀྱི་གཏད་སོ་ལགས།།