སྡོང་རློན་དང་ལོ་སེར།

སོས་ཀས་གཉེན་འཕྲད་ལ་བཀུག་པ།

ཆར་ལྡན་གྱི་རྡུང་རྡེག་ཆ་ལ་མྱངས།

སླར་ཡང་།

སྟོན་རླུང་གིས་ཁ་ཁ་བྱས་སོང་།

འདུ་འབྲལ་གྱི་དབང་ཆ་དུས་ཚིགས་ལ་མཆིས།

ཕོ་གཞོན་དང་ན་ཆུང་མ།

འདོད་ཞེན་གྱི་ཐག་སྣེར་འཛིངས་པའི་ཁ་ཚར་ཏེ།

ཞིང་གའི་ནང་དུ་གྲེས་ཐག་ལ་འཁྱུད།

སྤང་གའི་ངོས་སུ་འབྲེང་ཐག་ལ་འཁྲིལ།

ཐག་ཉེར་གཏུག་པའི་རང་འདོད་མིས་བཀང་ན།

རིང་ལམ་སྙེག་པའི་གཞན་འདོད་ཅིས་མི་སྐོང་།

འཛུམ་འཚེར་འཚེར་དུ་མགོ་བརྗོད་འབྲི་ཚུལ་དེའི།

འབྱུང་རིམ་རྙོག་དྲ་ཚ་པོ་ཡོང་བཟོ་འདུག་ག

གོ་འཛོལ་དང་ཁ་འཁྲུག

ཕྲ་མ་དང་དོགས་སྣང་།

མཁའ་དབུགས་བཞིན་ཁོག་ལ་འཚངས་ཤིང་།

གྲུ་གུ་ལྟར་རྡོག་སྣེར་འགྲིལ་བས།

བསམ་ཤེས་དང་བཟོད་སེམས།

རྒྱབ་དཔུང་མེད་པའི་གདོང་མཆོང་ངར་མའི་སྤུན་ཟླ།

འཚོ་བའི་མེ་ལོང་གི་སྲིབ་སར་ཁྱུ་ཡན་དུ་སོང་བས།

བརྩེ་དུང་གི་དྲོད་རླབས་ཁད་ཀྱིས་འཇགས།

ནང་སེམས་ཀྱི་གྲང་ངར་ཧོབ་ཀྱིས་མཆེད།

ལག་པ་འཁྱགས་ཏོས་ངུ་ཤིག་ཤིག་ཏུ་འུ་ཐུག་པའི་མཇུག་བྱང་འབྲི་དགོས་བྱུང་།

མཇུག་བྱང་གིས།

ཐུན་མོང་ལམ་བུ་ཕྱེད་གཤགས་བཏང་ཁར།

བར་བཅད་རི་བོའི་ཚད་ཙམ་བརྒྱབ་རུང་།

སྣང་བརྙན་དེ།

སེམས་ལ་འགོས་པའི་ཉོན་མོངས་ནང་བཞིན།

བཅུན་ཐུབ་མེད་པའི་དྲན་པ་འདྲ་བོ།

ལོགས་བཀར་གཞག་རྒྱུ་ལས་སུ་སླ་པོ་མི་འདུག་ཨང་།