ཚེ་སྔོན་ལས་ཀྱིས་སྦྲེལ་བའི།།

མཛའ་གཅུགས་ཡིད་ཀྱི་ལྷ་མོ།།

ང་ལ་གནང་བའི་དཀོན་ཅོག།

ཁྱེད་ཉིད་ཡིན་པ་བསྒོམས་ཡོད།།

འཁོར་བ་རི་མོ་ཇི་བཞིན།།

ཚོན་མདོག་སྣ་ལྔས་བྱུགས་རུང་།།

ཁོ་བོའི་མིག་ལ་འཕྲོད་པ།།

ཁྱེད་ཉིད་གཅིག་པུ་ཡིན་སོང་།།

ཁྱེད་དང་ང་ཡི་བར་ཐག།

ལེ་དབར་སྟོང་གིས་བཅད་ཀྱང་།།

སེམས་དང་སེམས་པ་འདྲེས་པས།།

དེ་ཡིས་གཅོད་ཐབས་བྲལ་ལོ།།

ནམ་ཞར་ལས་ལ་བྲེལ་ཡང་།།

ཡིད་ལ་སྒོམ་པའི་ཞལ་རས།།

མཛའ་མོ་ཁྱེད་ཉིད་ཡིན་གཤིས།།

རྟག་ཏུ་ཡིད་ལ་རང་འཁྲུངས།།

ཁྱེད་ནི་སེང་ལྕམ་འབྲུག་མོ།།

གཉིས་སུ་མེད་པར་དྲན་ཡོད།།

ང་ནི་བསོད་ནམས་ཆེ་སྟབས།།

ཁྱེད་དང་ཕྲད་པ་བཟང་ངོ།།