༡

མིག་གི་མེ་ལོང་ངོས་སུ།

གཙང་བོའི་ལན་བུ་འཆར་བའི་སྐད་ཅིག་མ་དེར།

ཤ་འཁོན་དུ་གྱུར་བའི་ལག་པ་གཉིས་ཀྱིས།

ལན་བུ་དེ་བདག་གིར་བྱས་སོང་ན།

རང་ཉིད་ཀྱང་བག་མི་ཚའམ།

སེམས་ཀྱི་ལྗོན་པའི་ནང་གི་དྲི་ངད།

ཚོར་ཤེས་ལ་དབང་བའི་མི་རབས་འདི།

སྨྲ་བ་མེད་པའི་རོལ་མོ།

གཞན་གྱིས་དཀྲོལ་ན་ཅི་ཞིག་བྱ།

ལག་པས་མི་ཟིན་པའི་གྲིབ་མ།

ཉི་འོད་ལ་སྲིང་བའི་རྣམ་འགྱུར་དག

ས་སྲོས་ཀྱི་དྲན་པ་འོད་ཀྲིག་ཀྲིག་གིས་འཚེར་ཡང་།

ཆར་རླུང་འཚུབ་མས་རབ་རིབ་ཏུ་བཏང་ན་ཅི་ཞིག་བྱ།

ཆོ་འཕྲུལ་གྱི་བསྟན་བཤིག་ཚ་བའི་སྤྱང་ཀི།

སེམས་ཀྱིས་འཚོས་པའི་ལུག་ཁྱུ་ནང་དུ།

གློ་རྡེག་ཏུ་འཇབ་རྒོལ་བྱུང་ན།

ངས་བདག་པོ་ལ་ཚང་རྩིས་ཅི་ཞིག་སྤྲོད།

མིག་གིས་མཐོང་ཡོང་བ་ནི་རབ་རིབ་ཁོ་ན།

སེམས་སྒོར་འཆར་ཡོང་བ་ནི་མག་མོག་ཁོ་ན།

༢

གཏམ་རྒྱུད་ཀྱི་རྐང་ལ་ཉན་ན།

ཚོར་བའི་ཁུ་བྱུག་ལྷང་ལྷང་གྲག

འདུ་ཤེས་ཀྱི་རྟོག་ཚོགས།

རྨི་ལམ་ལ་ཞིམ་པའི་ཁ་བ་འབབ།

ངར་གདུ་བའི་ལོ་དང་ཟླའི་རྔུལ་ནག

རྩིས་མེད་དུ་གྱུར་ན།

ཅི་འདྲས་བཟོད་གླགས་བྲལ་བ་ལ།

ཤ་རུས་ལ་འཐིམས་ཤིང་རུས་རྐང་ལ་སིམ་པའི་ཚེ་སྲོག

དུར་བྱང་ཁོ་ནས་ཡིན་མིན་གྱི་ཁྲུན་ཐག་ལས་མེད་ན་ཅི་མ་རུང་།

མིག་ཤེས་ཀྱི་མྱོང་བས་ཁྱོད་ཤོད་ཀྱིན་འདུག

ཡིད་གཟུགས་ཀྱི་གྲིབ་མས་ཁྱོད་འཛུམ་གྱིན་འདུག