ཆུང་མ་གཉིད་ཟིན། ངས་སྙན་ངག་འབྲི་བཞིན་ཡོད་ཅེས་ པའི་སྙན་ངག་ལ་བལྟས་པའི་མྱོང་ཚོར།

ཆུང་མའི་རྨི་ལམ་གྱིས་ཁྱོད་ཀྱི་མཚན་མོ་དང་སྙན་ངག་སྒུལ།

ཁྱོད་ཀྱི་སྙན་ངག་གིས་ངའི་འཚོ་བ་དང་དྲན་པ་སྒུལ།

ཁྱོད་ལ་དུ་བ་དང་ཨ་རག་ཁམ་གང་གིས་འདུག་གྲོགས་ཡོད་ཀྱང་།

ང་ལ་སྐྱ་ཤུར་ཤུར་དུ་ལུས་པའི་རྣམ་ཤེས་ལྡོམ་པོ་གཅིག་ལས་ཅི་ཡང་མེད།

ཁྱོད་ཀྱིས་ཆུང་མའི་རྨི་ལམ་ལ་ལྟ་བཞིན།

ཚ་ལམ་ལམ་དང་འཁྱག་སོབ་སོབ་ཀྱི་ཐ་སྙད་མང་པོ་བྲང་ལ་སྦྱར།

ངས་རང་གི་འཚོ་བའི་ངོ་གདོང་ལ་ཅེར་བཞིན།

སབ་སོབ་དང་མག་མོག་གི་ཐ་སྙད་མང་པོ་རུམ་ལ་བཅུག

ཁྱོད་ནི་ཆུང་མ་དང་མི་འདྲ་བའི་སྟག་ཤར་ཞིག་སྟེ།

མཚན་མོའི་ལྷིང་འཇགས་གྱོན་ནས།

བསམ་བློ་ཡོད། བསམ་བློ་གཏོང་།

ང་ནི་རང་གི་འཚོ་བ་ལ་ཁ་འབྲལ་མི་བཟོད་པའི་འཁོས་མེད་ཅིག་སྟེ།

ཉིན་མཚན་ཀུན་གྱི་ལྷིང་འཇགས་ལ་བྲེད།

བསམ་བློ་ཡོད། གཏོང་མི་ཕོད།

ཕ་ཡུལ་ལ་ཁ་བ་འབབ་ཀྱིན་མེད་པ་འདྲ།

མིང་སྲིང་རྣམས་ཀྱང་བདེ་བར་འཚོས་ཡོད་པ་འདྲ།

ངའང་ཁྱེད་ཀྱི་ཆུང་མའི་རྨི་ལམ་དུ་འཛུལ་ནས།

ཉི་འོད་དང་རྩྭ་ཐང་། འོ་ཞོ། ལུ་གུ།

ངའི་འཚོ་བའི་ནང་དུའང་ཅི་ཡང་འཛོམས་པར་སྨོན།

ཁྱོད་ཀྱི་ཆུང་མ། ང་ཡི་འཚོ་བ།

ལྟ་ཡིན་ལྟ་ཡིན་ཅི་འདྲའི་མཚུངས་ཨང་།