ཕ་ཡུལ་གྱི་མགྲིན་པའི་ནང་ན་ཤང་ཤང་བབས་ཤིང་།

མི་རབས་ཀྱི་རྩ་རྒྱུད་ནང་དུ་ལྟེམ་མེར་འདྲེས་ཏེ།

ཁྱེད་དང་ང་ཡི་དྲན་འཛིན་གྱི་མེ་ལོང་ངོས་ནས།

ལྷུང་ལྷུང་དུ་བཞུར་ཞིང་མཛེས་སྡུག་གིས་བསྲིངས།

འོག་མ་ཀླུ་ཡུལ་ནས་ཞིམ་མངར་གྱི་ཆུ་མིག་བརྡོལ་ཞིང་།

བར་མ་མི་ཡུལ་གྱི་སྐོམ་པའི་གདུང་བ་སེལ་ཏེ།

གོང་མ་ལྷ་ཡུལ་ལ་དྭངས་གཙང་གི་མཆོད་པ་ཕུལ་བ་དེ།

ཁྱེད་ཀྱི་ལྷན་སྐྱེས་ཀྱི་ཡོན་ཏན།

སྦྱངས་སྟོབས་ཀྱི་བརྩོན་པ།

གཞན་ཕན་གྱི་ལྷག་བསམ།

ལྷད་མེད་ཀྱི་རང་མདངས་ཡིན།

ཁྱེད་ཀྱི་ལང་ཚོ་དར་བའི་ཡིད་འོང་གི་རླབས་ཕྲེང་རེ་རེ་ནི།

བདག་གི་བྲང་གཞུང་ན་ཟགས་པའི་སྦྲང་ཆར་སིལ་མ་ཡིན།

ཁྱེད་ཀྱི་བཞུར་རྒྱུན་རྒོད་པའི་ཉམས་མེད་ཀྱི་སྟོབས་ཤུགས་དེ་ཡང་།

བདག་གི་མི་ཚེའི་གཟི་བརྗིད་ཅིག་ཏུ་བསྒོམ་ཆོག

མཐས་ཡས་ཤིང་གཏིང་ཟབ་པའི་རྫ་ཆུ་ལགས།

ཁ་དོག་དམར་པོས་ལོ་རྒྱུས་ཀྱི་གསང་བ་མཚོན་ནམ།

བཞུར་སྒྲ་རྣ་བར་ལྷོད་པས་སྙན་གྲགས་ཀྱི་བ་དན་མཚོན་ནམ།

དགོང་ཨ་སྔོན་གྱི་རྒྱ་ཁྱོན་དེ་ཁྱེད་ལ་ངོས་བཟུང་ཆོག་གམ།

ས་དོག་མོ་ཡི་ལྟེ་བ་དེ་ཁྱེད་ལ་ངོས་བཟུང་ཆོག་གམ།

བདག་གི་དྲན་པའི་རླབས་རྩེ་ན་འཕྱོ་བའི་རྫ་ཆབ་ཟིལ་མ།

ཁྱོད་ཀྱི་བཞུར་རྒྱུན་ནང་དུ།

ཕ་ཨ་ཁུ་དགྲ་ལ་སོང་བའི་དཔའ་ངར་གྱི་དཔུང་པ་བརྫེས་ནས་ཡོད།

ཁྱོད་ཀྱི་འབབ་རྒྱུན་ཁྲོད་དུ།

མ་སྲུ་མོས་ལས་ལ་བརྩོན་པའི་མཛངས་མ་ཡི་ཁྱད་ཆོས་

མངོན་ནས་ཡོད།

ཁྱོད་ཀྱི་བཞུར་རྒྱུན་དང་འབབ་རྒྱུན་སྲུབས་ན་ང་ཚོ་ཡུན་

གྱིས་འཚོས་ནས་ཡོད།

དེ་བས།

གང་དུ་ཡོད་ཀྱང་། གང་ལ་ཆས་ཀྱང་།

བདག་ནི་ཁྱེད་ཀྱི་ཟིལ་གནོན་གྱི་རྔམ་བརྗིད་ལ་འཁྲེང་ཞིང་།

བཟློག་མེད་ཀྱི་སྙིང་སྟོབས་ལ་ཡང་དེ་བས་ཀྱང་དུངས།

ང་ཡི་རྫ་ཆུ་ལགས།

སྔོ་ལྟེམ་ལྟེམ་གྱི་དྲན་པའི་གཞོང་ཆེན་ན།

ཁྱེད་རང་སྔར་བཞིན་གསོན་ཤུགས་ཀྱིས་བཞུར་གྱིན་ཡོད།