ཁ་བ་ནི་གནམ་རྒན་མས་བྱིས་པ་བསམ་མེད་ཚོར་གནང་བའི་རྩེད་ཆས་ཤིག
ཁ་བ་ཡོད་པའི་དབང་གིས།
གནམ་ངོ་ཇི་ལྟར་གྲང་ཡང་དགོད་སྒྲ་དེ་བས་འཇགས་མྱོང་མེད།
ཁ་བ་ཡོད་པའི་དབང་གིས།
ལུས་པོ་ལ་འཁྱག་འདར་ཡང་རྒྱག་མྱོང་མེད།
ནར་སོན་དུས།
ཁ་བ་ནི་དྲན་སྟངས་རུམ་གང་ཉར་བའི་གནམ་གྱི་ཕོ་ཉ་ཞིག
ཁ་བ་ཡོད་པའི་དབང་གིས།
གནམ་ངོ་ཇི་ལྟར་གྲང་ཡང་།
བརྩེ་སེམས་ཀྱི་དྲོད་འཁོལ་དེ་བས་ཡལ་མྱོང་མེད།
ཁ་བ་ཡོད་པའི་དབང་གིས།
དྲན་གདུང་གི་སེམས་པ་དེ་བས་འཁྱགས་མྱོང་མེད།
དེ་རིང་ཁ་བའི་ཁྲོད་ནས།
དྲན་པ་རབ་རིབ་ཅིག་ངའི་ལུས་སེམས་ཀྱི་ཕྱི་ནང་ཡོངས་ལ་ཁྱབ་ཅིང་།
དྲན་པ་འདི་ཁ་བས་ང་ལ་གནང་བའི་གསོལ་རས་བཞིན།
ངའི་ཞེ་སེམས་ཀྱི་གཏིང་རུམ་ན་མེ་ལྕེ་བཞིན་འབར་གྱིན་འདུག
དྲན་པ་འདི་ཁ་བས་ང་ལ་གནང་བའི་ལག་རྟགས་ཤིག
སེམས་ཀྱི་ཟབ་ས་ན་མཛེས་སྡུག་གིས་ཉར་བཞིན་ཡོད།
དྲན་པ་འདི་དད་པའི་སྟོབས་དང་མཚུངས་པའི་མཐུ་ནུས་གཞན་ཞིག
དྲན་པ་འདི་ཁ་བས་ང་ལ་གནང་བའི་གསེར་གྱི་རྒྱ་ཕིབས་ཤིག
དྭངས་གཙང་དང་ལྷད་མེད་ངང་ལྷ་ལྡན་གྱི་ཞིང་ཁམས་ན།
མི་ཚོགས་ཀྱི་སྙིང་དབུས་ན་འོད་ཟེར་བཞིན་འཕྲོ་བཞིན་འདུག