གཞི་ཚང་ཟླ་བ་གྲགས་པ། 2020-11-09
མི་བྲེལ་ཕངས་ཀྱི་བྲེལ་འཚུབ་རྒོད་ཀྱང་།།
གནས་ས་གཙང་ནི་བསིལ་མོའི་ལྗོངས་ནས།།
དྲིན་ཡབ་ཡུམ་གྱི་བྱམས་བརྩེའི་འོད་ཀྱིས༎
རྟེན་དལ་འབྱོར་གྱི་ནོར་བུ་རྙེད་འདུག།
དབང་གོ་ཐོབ་ཀྱི་ནོམ་ཆེན་དཔོན་པོ།།
རྒྱུ་ལོངས་སྤྱོད་ཀྱི་བདག་ཉིད་མིན་ཡང་།།
དྲིན་ཕ་མ་ཡི་གཅེས་སྐྱོང་རག་པའི།།
ལས་བསོད་ཅན་འདི་ཕལ་བའི་བུ་ཆུང་།།
གཞོན་ན་ཆུང་གི་རྨི་ལམ་སད་རྗེས།།
དུས་ཡོ་ལང་གི་ཙག་སེར་ལྡང་སྐབས།།
ཕོ་ཡང་རབས་ཀྱི་བྱ་སྤྱོད་རྣལ་མས།།
ལས་དཀའ་སྡུག་གི་ལོ་ཟླ་བརྒལ་ཡོད།།
མཚན་མུན་ནག་གི་ལ་མོའི་རྒྱབ་ན།།
ཉིན་འོད་སྣང་གི་རྩྭ་ཐང་མཛེས་པ།།
ལོ་ན་རྒས་ཀྱི་འཚོ་བའི་ཀློང་ནས།།
སྐྱིད་ཉི་མ་གང་སེམས་སུ་ཤར་ཡོད།།
འཆི་བར་དོ་ཡི་ལམ་རྒྱགས་བསམས་ནས།།
ཡུལ་འདུ་འཛི་ཡི་གྲོང་དང་བཀྱེད་ནས།།
ཐུན་དགེ་སྦྱོར་གྱི་ཆུ་རྒྱུན་བར་ནས།།
གནས་དབེན་པ་འདི་སྐྱིད་ངོ་ཟིན་སོང་།།
བཟའ་ཚེ་རོགས་ཀྱིས་དམ་ལ་མ་བཏགས།།
གཉེན་རྩ་ལག་གིས་ཟུངས་ཁྲག་མ་གཞིབ།།
མགོན་མཚན་ལྡན་གྱི་བླ་མར་མཇལ་ནས།།
བོན་དགེ་སྒྲུབ་ཀྱིས་དུས་ཚོད་འདའ་བ།།
དུས་ཡུན་རིང་གི་རྒས་གཉེར་སྤུངས་ཀྱང་།།
ལུས་བདེ་ཐང་གི་སྒོ་གསུམ་བསམ་ཚེ།།
གཤེན་མཁས་གྲུབ་ཀྱིས་ཕྱི་རབས་གདམས་པའི།།
ཁམས་བདེ་ཐབས་ཀྱི་ལེགས་བཤད་དྲན་འོང་།།
སྐྱབས་མཆོག་གསུམ་ལ་ཡིད་ཆེས་ཟབ་ཅིང་།།
ལྷ་བླ་མ་ལ་དད་མོས་བརྟན་པ།།
ལས་དགེ་སྡིག་ལ་གཅེས་སྲུང་གནང་བས།།
གསོན་དལ་རྟེན་འདིར་དོན་སྙིང་ལྡན་ཡོད།།
དོན་བདེན་པ་ཡི་ཚངས་ཐིག་དེད་པས།།
ཚེ་འདི་གནོང་དང་ཕྱི་འགྱོད་མི་དགོས།།
ལོ་བརྒྱད་ཅུ་ཡི་སྐལ་བཟང་དུས་སྟོན།།
ཡིད་དགའ་སྤྲོ་ཡིས་རྟེན་འབྲེལ་ཞུ་འོ།།
ཞིང་འོལ་གླིང་གི་དྲོད་རླངས་འཁྱིལ་བའི༎
གནས་མཆོག་གྱུར་གྱི་ཤར་རྫའི་རི་ནས༎
ལས་དགེ་སྦྱོར་འདི་མཐའ་རུ་ཕྱིན་ཏེ།།
ལྷ་ཀུན་བཟང་གི་རང་ཞལ་མཇལ་ཤོག།
བཀའ་དམ་ཅན་གྱི་གཡུང་དྲུང་ལྷ་ཡིས།།
རྐྱེན་ཕྱི་ནང་གི་བར་ཆད་སེལ་ནས།།
ཚེ་ཕྱྭ་གཡང་གི་དམུ་ཐག་དཀར་པོ།།
ལས་བཀྲ་ཤིས་ཀྱིས་ལོ་བརྒྱར་སྲིང་ཤོག
རྩོམ་གསར། 10