ཀ་ཕྲེང་སྙན་ངག་འབྲི་བའི་དུས་ནས་བཟུང་།།

ཁ་གཏམ་ཡིད་འོང་པད་མ་ཁྱེད་ལ་བརྗོད།།

ག་ས་གང་ནས་དོན་དག་མང་ན་ཡང་།།

ང་དང་ཁྱོད་ནི་ཟེར་བའི་ཉིན་ཞིག་དབེན།།

ཅ་ཅོལ་དོན་བྱ་འབེལ་བ་འཇིག་རྟེན་ལས།།

ཆ་ཚང་ཐམས་ཅད་གྲུབ་པའི་ཉིན་ཞིག་དཀའ།།

ཇ་ཆང་ཁམ་གང་འཐུང་བའི་དུས་ཡིན་ཡང་།།

ཉ་རྒྱས་ཟླ་བ་འདྲ་བའི་བརྩེ་དུང་དྲན།།

ཏ་ལེར་ཡིད་བཟང་སྒེག་མོའི་སེམས་རྒྱུད་དང་།།

ཐ་དད་མ་གནས་མཉམ་འཛོམས་བྱུང་བ་ནི།།

ད་ཐེངས་མི་ཚེ་འདི་ཡི་ལས་སྐལ་རེད།།

ན་ཆུང་ངེད་གཉིས་སྐྱིད་འདི་ཨེ་མ་རྨད།།

པ་ཏྲ་འདྲ་བའི་ཀྱག་ཀྱོག་ཆེ་ན་ཡང་།།

ཕ་མ་ལྷན་འཛོམས་ཡོང་ཉིན་ལོས་ཡོད་དེ།།

བ་མ་གཅིག་ནང་གཟན་ཆས་བསྐོལ་དུས་སུ།།

མ་འཛོམས་བུ་འཛོམས་ཁྱིམ་ཚང་མིན་ནམ་ཅི།།

ཙ་རེ་བསྐོར་འདྲའི་སྙན་གྲགས་མེད་ན་ཡང་།།

ཚ་གདུང་ཉི་མའི་འོག་གི་འཚོ་བ་འདི།།

ཛ་དྲག་མེ་རླུང་ཁྲོད་ནས་བསྐྱེལ་དགོས་པས།།

ཝ་ཏ་དར་གོས་མཉམ་གྱོན་བྱས་ནས་རོལ།།

ཞ་ཞ་བཀུར་བཀུར་ལེགས་འཛོམས་དགའ་མའི་གཤིས།།

ཟ་ཟས་མངར་ཁ་ལྡུད་མཁན་ལུས་ཕྲ་མ།།

འ་འུར་འདུ་འཛི་འདི་ནས་ཁྱོད་ཉིད་འཚོལ།།

ཡ་ཡོར་ཅུང་ཙམ་མེད་པ་ངེད་གཉིས་འདང་།།

ར་སྐོར་ལྷས་ར་གྲུ་གཞིའི་འདབས་རོལ་ནས།།

ལ་དང་ལུང་བ་གསུམ་མདོའི་དཀྱིལ་དབུས་ནས།།

ཤ་མར་འོ་ཞོ་འཐུང་ནས་འཛུམ་མདངས་བསྟན།།

ས་གཙང་འབྲོག་པའི་གནས་ནས་སྐྱིད་གླུ་བླངས།།

ཧ་ཅང་སྐྱིད་པའི་རང་ཡུལ་གནས་མཆོག་ནས།།

ཧ་ཅང་དགའ་སའི་སྒེག་ལྡན་བུ་མོར་འགྲོགས།།

ཨ་ཀྱོག་པ་ཀྱོག་ལམ་འདི་རིང་ན་ཡང་།།

ཨ་རོགས་མདའ་དང་མཉམ་དུ་ལམ་ལ་ཆས།།