རྔ་བ་གྲགས་པ། 2020-11-02
གནའ་བོའི་ཆོས་འབྱུང་རྣམས་དང་ངག་རྒྱུན་ཁྲོད།།
ཆོས་རྒྱལ་སྲོང་བཙན་སྒམ་པོའི་སྐུ་རིང་ལ།།
བོད་ཁམས་ཆགས་དབྱིབས་ས་དཔྱད་བགྱིས་པ་ན།།
བོད་ཡུལ་སྲིན་མོ་གན་རྐྱལ་གཟུགས་མཐོང་བས།།
དེ་ལ་ས་གནོན་ལྷ་ཁང་མང་དུ་བཞེངས།།
སྙིང་ཀའི་ས་གནོན་འཕྲུལ་སྣང་གཙུག་ལག་ཁང་།།
ཡན་ལག་ཉིང་ལག་གནོན་པར་བྱེད་པ་ལ།།
མི་འགྱུར་བརྟན་སླད་གཟེར་མ་བཅུ་གཉིས་བཏབ།།
དཔུང་གཡས་སྟེང་དུ་དབུ་རུ་ན་ཀ་ཚལ།།
དེ་ཡི་འོག་ཏུ་གསེར་ཤ་གྷིརྟི་བཞེངས།།
དཔུང་གཡོན་གཡོ་རུ་ཁྲ་འབྲུག་གཙུག་ལག་ཁང་།།
དེ་ཡི་འོག་ཏུ་བཙན་ཐང་ལྷ་ཁང་བཞེངས།།
དཔྱི་གཡས་གཡས་རུ་གཙང་འཕྲང་གཙུག་ལག་ཁང་།།
དེ་ཡི་འོག་ཏུ་དགེ་དྲུང་གི་ལྷ་ཁང་བཞེངས།།
དཔྱི་འགོའི་གཡོན་དུ་རུ་ལག་གྲོམ་པ་རྒྱང་།།
དེ་འོག་འབྲེའི་ལྷ་ཁང་སྟེ་རུ་གནོན་བཞི།།
གྲུ་མོ་གཡས་སུ་བུ་ཆུ་གཙུག་ལག་ཁང་།
གྲུ་མོ་གཡོན་དུ་ལྷོ་བྲག་མཁོ་མཐིང་བཞེངས།
པུས་མོ་གཡོན་དུ་མོན་བུ་དགེ་གནས་བཞེངས།།
པུས་མོ་གཡས་སུ་པྲ་དུམ་རྩེའི་ལྷ་ཁང་།།
དེ་དག་རྣམས་ལ་ཡང་འདུལ་བཞི་ཞེས་གྲགས།།
ལག་མཐིལ་གཡོན་དུ་ཀློང་ཐང་སྒྲོལ་མ་བཞེངས།
ལག་མཐིལ་གཡས་སུ་ལྷོར་བུམ་ཐང་སྐྱེ་ཆུ།
རྐང་མཐིལ་གཡས་སུ་ཚལ་རིགས་སྒྲོལ་མ་བཞེངས།།
རྐང་མཐིལ་གཡོན་དུ་སྤ་གྲོ་སྐྱེ་ཆུ་སྟེ།།
དེ་རྣམས་མཐའ་འདུལ་ལྷ་ཁང་བཞི་རུ་གྲགས།།
གཞན་ཡང་ཕྱོགས་བཞིར་ཁ་གནོན་མང་པོ་དང་།།
བོད་ཡུལ་སྟོད་སྨད་ཀུན་ཏུ་ས་གནོན་བཞེངས།།
དེ་རྣམས་ཆོས་འབྱུང་ལོ་རྒྱུས་ལ་སོགས་སུ།།
རྒྱལ་པོའི་སྐུ་ལུས་ལྔ་སྟོང་སྤྲུལ་ནས་ནི།།
ལྷ་ཁང་སྟོང་དང་རྩ་གཉིས་བཞེངས་སོ་སྐད།།
རྩོམ་གསར། 10