འདི་ནི་སྔོན་བསགས་ལས་ཀྱིས་བཀོད་པ། །

ཡིད་འོང་གཞོན་པའི་ལང་ཚོའི་མེ་ཏོག །

འདབ་སྟོང་གྲོལ་བའི་འཛུམ་མདངས་ངོམ་ས། །

སྟག་ལུང་དཔལ་གྱི་རི་བོའི་ཉེ་འདབས། །

རྐང་འཐུང་འདབ་ལོའི་མགོ་ལྕོག་ལྡེམ་ལྡེམ། །

མཚར་སྡུག་མེ་ཏོག་ཐགས་སུ་བཀྲ་བ། །

ལྷ་ཡུལ་ལས་ཀྱང་ཉམས་སུ་དགའ་བས། །

བདེ་སྐྱིད་དཔལ་ལ་འབད་པ་མི་དགོས། །

ངག་སྙན་ཀྱ་ཀྱུའི་གླུ་ལ་མཁས་པའི། །

བྱ་དང་བྱིའུའི་སྤྲོ་གར་འདི་ལ། །

ངོ་མཚར་ཉམས་ཀྱི་མཛེས་སྡུག་རྫོགས་པ། །

ཡིད་འོང་སྤྲོ་དགའི་སྣང་བ་བདེ་ཨང་། །

ཟིན་མེད་རྣམ་ཤེས་རྒོད་པོ་གཤོག་ཐོགས། །

སྐད་ཅིག་མིག་གི་འབྱེད་འཛུམ་བར་ནས། །

སྙིང་སྡུག་སེམས་ཀྱི་ལྷ་མོ་སྒྲོལ་མ། །

སྒེའུ་ཁུང་འགྲམ་གྱི་ལྗོན་པའི་རྩེ་ལ། །

བྱམས་པའི་ཟུར་མིག་ལན་ཅིག་གནོང་དང་། །

ང་རང་ཁྱེད་ཀྱི་སྒོ་ཁར་སླེབས་ཡོད། །

བརྩེ་བའི་ཞལ་འཛུམ་མིག་གི་བདུད་རྩི། །

ཡིད་འོང་འཇོ་སྒེག་ཉམས་ཀྱིས་ཕྱུག་པ། །

གཞུང་བཟང་འགྲོགས་པའི་ཕྱི་ཐག་རིང་བ། །

བུ་ཆུང་ཁོ་བོའི་སྙིང་གི་ཕྱེད་ཀ །

ཡུན་རིང་ཞེ་འདོད་སྙིང་ལ་བཅངས་པ། །

ལྷན་འཛོམས་བདེ་སྐྱིད་འཕེལ་བའི་དུས་ཚིགས། །

རེ་སྒུག་ཉི་མ་ཕྲེང་བར་བགྲང་ནས། །

ལོ་ཟླ་བརྩེགས་པའི་སྡུག་བསྔལ་འཁོར་ཡོད། །

རྒྱལ་བ་དགྱེས་པའི་སྒྲུབ་ཕུག་དེ་ན། །

གྲོགས་མེད་དཀའ་ཐུབ་བསྟེན་པའི་དྲང་སྲོང་། །

རྩེ་གཅིག་ཏིང་འཛིན་སྒོམ་པའི་ཉམས་ལེན། །

ངེས་འབྱུང་སེམས་བསྐྱེད་ཡིན་ན་དགའ་བ། །

མ་རུང་རྒས་པའི་འཕྲལ་རྐྱེན་ངན་པ། །

གཤིན་རྗེའི་གྲོང་སྒོར་འགྲོ་རན་འདུག་ཀྱང་། །

འཁྲེང་སེམས་འདོད་རྒུའི་ཞེན་པ་མ་ཆོད། །

ཆུ་ཤེལ་སེམས་ཀྱི་མེ་ལོང་དྭངས་མོར། །

ཡིད་འོང་མིག་ཟུང་འཛུམ་པའི་ཞལ་རས། །

འགོག་མེད་འཆར་བའི་ངང་ཚུལ་འདི་ལ། །

གཉེན་པོ་གང་གིས་བཟློག་པར་མི་ནུས། །

མཛེས་མཛེས་མིག་ལ་རན་པའི་གཤིས་ཀ །

ཚུལ་མཐུན་ངུར་སྨིག་དཀྲིས་པའི་སྣང་བརྙན། །

མི་ཚེ་དབེན་པའི་རི་ནས་ཟད་ཀྱང་། །

དགེ་སྒྲུབ་འདི་ལ་སྙིང་བོ་མ་ལོན། །