ནུབ་ཕྱོགས་སུ།

ཁྲུང་ཁྲུང་གི་ཟོལ་གྱིས་རྒྱུ་བའི་སྤྲིན་པ་ནག་པོས།

ཡུལ་རྩེ་གཞུང་གི་རྟ་ནོར་ལུག་གསུམ་གྱི་སྣང་བརྙན་མ་ལུས།

གསང་སྟབས་ཀྱིས་བསྣམས་ཏེ།

ལ་མོར་རྒྱུ་བ་དང་ཀུན་ནས་མཚུངས་ལ།

ཡང་ན། མི་ཡུལ་ལ་བདེ་མོ་འཇོག་པ་དང་གཉིས་སུ་མ་མཆིས་སོ།།

ལྷོ་ཕྱོགས་སུ།

གཡུ་འབྲུག་གི་དབྱིབས་སུ་འཁྲུལ་བའི་སྤྲིན་པ་ལྗང་ཁུས།

ཡུལ་རྩེ་གཞུང་གི་རྩེ་ཆུ་སྔོན་མོའི་དྭངས་ཤ་ཡོད་དགུ

ཧམ་སེམས་ཀྱིས་རྙོག་སྟེ།

ལྷོད་ལྷོད་སྒོས་གཡོ་བ་དང་དབྱེར་མ་མཆིས།

ཡང་ན།   མི་སེམས་སུ་ཐིག་ནག་འདེབས་པ་དང་ཆ་འདྲའོ།།

ཤར་ཕྱོགས་སུ།

ཨ་ཡིག་གི་མདངས་སུ་འདྲེས་པའི་སྤྲིན་པ་སེར་པོས།

ཡུལ་རྩེ་གཞུང་གི་སྦྲ་ནག་གི་ཆོན་ཐག་ཡོད་ཚད།

བག་ཡོད་ངང་རེ་རེ་བཞིན་བགྲངས་ཏེ།

ཨམ་གཙིགས་བསྡམས་ནས་རྒྱུ་བ་དང་མཚུངས་ལ།

ཡང་ན།   མི་སེམས་ཀྱི་ཡང་སྙིང་བསློག་པ་དང་ཡང་འདྲའོ།

བྱང་ཕྱོགས་སུ།

རྟ་མཆོག་གི་གཟུགས་སུ་སྣང་བའི་སྤྲིན་པ་དཀར་པོ་ཡྰ།

ཁྱོད་ཀྱིས་ཡུལ་རྩེ་གཞུང་གི་ཅི་ཞིག་སྟོན་བཞིན།

ལང་ལོང་དུ་ག་ལེར་བགྲོད་པར་རྒྱུ་མཚན་ག་རེ་ཡོད།

ཡང་ན།   མི་དང་ཡུལ་གྱི་ཧེ་བག་ག་ཙམ་སྟོན་སྙིང་འདུག།