ཀ་རྡོ་བཞིན་དུ་བརྟན་དགོས།།

ཁ་བཤད་དོན་ལ་གནས་དགོས།།

ག་ལས་འདི་ལས་ཡོད་དགོས།།

ང་ཚོའི་ལྟ་ས་ཉན་དགོས།།

ཅ་ཅོའི་རྫུན་ཚིག་སྤང་དགོས།།

ཆ་ལུགས་ཆོས་དང་མཐུན་དགོས།།

ཇ་མིན་དུད་ཆང་སྤང་དགོས།།

ཉ་གང་བསྟན་པར་དད་དགོས།།

ཏ་ཀུ་ཐོགས་པ་བཀུར་དགོས།།

ཐ་ཤལ་མི་ངན་འདོར་དགོས།།

ད་ལྟའི་གནས་བབས་ཤེས་དགོས།།

ན་མཉམ་མཐུན་སྒྲིལ་བྱེད་དགོས།།

པ་པིར་སྦྲགས་སྐད་འདོར་དགོས།།

ཕ་སྐད་གཙང་མ་སྦྱང་དགོས།།

བ་གླང་བརྟུལ་ཞུགས་འདོར་དགོས།།

མ་གཞི་མི་གཞི་བཟང་དགོས།།

ཙ་ཙིག་དཀའ་ངལ་བསྲན་དགོས།།

ཚ་ཆས་ཡང་དག་བཙལ་དགོས།།

ཛ་དྲག་སྤྱོད་པ་འདོར་དགོས།།

ཝ་ཁྱུའི་རྙི་ལ་འཛེམ་དགོས།།

ཞ་བོ་ཞ་སྒྲེ་མཐོང་དགོས།།

ཟ་ཟའི་དྲིན་ལན་མཇལ་དགོས།།

འ་ཅག་བློ་སེམས་དཀར་དགོས།།

ཡ་རབས་མི་དང་འགྲོགས་དགོས།།

ར་མིན་ལུག་མིན་སྤང་དགོས།།

ལ་རྒྱའི་དོན་སྙིང་རྟོགས་དགོས།།

ཤ་ཞེན་བོད་ལ་ཡོད་དགོས།།

ས་སྟེང་སེམས་ཅན་བསམ་དགོས།།

ཧ་ཅང་མིག་རྒྱང་རིང་དགོས།།

ཨ་གསར་ཞྭ་མོ་འཕུད་དགོས།།

ཧ་ཅང་རིག་པ་གསལ་དགོས།།

ཨ་མེས་ཕུགས་བསམ་འགྲུབ་དགོས།།

ཧ་མ་ཧོན་ངང་མ་འདུག།

ཨ་ཕའི་རེ་བ་སྟོང་འགྲོ།།

ཧ་ཅང་གྲུང་བོ་མ་འཁྲབ།།

ཨ་རོགས་དཔུང་སྡེར་འགལ་འགྲོ།།

ས་རྩོད་ཆུ་རྩོད་མ་བྱེད།།

ཤ་ཉེ་སྤུན་ཟླ་འཐོར་འགྲོ།།

ལ་བཤད་ལུང་བཤད་མ་མང་།།

ར་སྤྲོད་རང་སྡུག་ཉོས་འགྲོ།།

ཡ་མཚན་ཡིན་མདོག་མ་སྟོན།།

འ་ཅག་མིག་ལ་མི་རན།།

ཟ་འཐུང་ཁོ་ནར་མ་བརྩོན།།

ཞ་ཞིའི་གྲས་སུ་བཞག་འགྲོ།།

ཝ་ལྟར་གཡོ་སྒྱུ་མ་མང་།།

ཛ་དྲག་ལས་ཀྱིས་རྒོལ་འགྲོ།།

ཚ་ཞང་ཕྱོགས་ཞེན་མ་བྱེད།།

ཙ་ཙིག་རང་སྡུག་མྱོང་འགྲོ།།

མ་ཤེས་ཤེས་ཁུལ་མ་བྱེད།།

བ་གླང་གྲས་སུ་རྩིས་འགྲོ།།

ཕ་སྐད་མི་མཁོ་མ་ཟེར།།

པ་ཏྲའི་རིག་གཞུང་ཚར་འགྲོ།།

ན་ཚོད་གཞོན་སྣང་མ་སྐྱེ།།

ད་འཆི་ནམ་འཆི་མི་ཤེས།།

ཐ་མལ་མི་དང་མ་འགྲོགས།།

ཏ་ཐཱའི་བསྟན་པར་འགལ་འགྲོ།།

ཉལ་ནས་ཉི་མ་མ་གཏོང་།།

ཇ་སོགས་ཟ་འཐུང་ཆད་འགྲོ།།

ཆ་བྱད་འདྲ་མིན་མ་བྱེད།།

ཅ་ཅོའི་གཏམ་ངན་བརྗོད་ཡོང་།།

ང་རྒྱལ་ཕྲག་དོག་མ་མང་།།

ག་དག་སེམས་ཁམས་དཀྲུགས་འགྲོ།།

ཁ་བའི་དབྱངས་གསལ་མ་བརྗེད།།

ཀ་ཁའི་བདག་པོ་མིན་འགྲོ།།