ཞོགས་ཀ་འདིར།

ངའི་ནང་སེམས་ཞོགས་པའི་ཟིལ་བ་བཞིན།

བྲག་ཐེམ་གྱི་རྒོད་པོ་བཞིན།

སྡོང་མགོའི་བྱེའུ་ཚང་བཞིན།

སྣོད་བཅུད་འཇིག་རྟེན་གྱི་གྲིབ་མ་དང་།

བཤན་ཁང་གི་རྫིང་དྲི་སོགས་ལ་གཡོལ་མགོ་བརྩམས།

རྡོ་བ་དང་བྲག་ལ་རེ་བ་བཅོལ་ཡོད།

རང་གིས་དེ་ལྟར་འདོད་ཀྱིན་དཔེ་ཁང་དུ་ཐོན།

ད་ལྟ་དཔེ་ཁང་དུ་མི་གཅིག་ལས་མི་འདུག

དེབ་ཁ་ཤས་ངའི་རུས་ཀོག་གི་མདུན་དུ་བརྩེགས།

མདུན་ཐད་དུ་བཞུགས་པའི་རྒྱ་མོ་དེས་བསླུ་བྲིད་ཀྱི་འཛུམ་ཞིག་བསྟན།

ངས་ཁ་ལོ་དེ་འདྲ་ཐུལ་མེད་པའི་རྟ་ཕོའི་སེམས་པ།

ཡ་མ་ཡོར་གྱིས་མདུན་གྱི་དེབ་ཀྱི་རྩྭ་ཐང་གི་ཤོག་ལྷེ་རེ་རེར།

རྒྱུག་འདུལ་བྱེད་བཞིན་པ་བརྐུས།

རྒྱ་མོ་དེའི་མིག་མདངས་ལ་འོད་ཅིག་འཁྱིལ།

བདག་གི་ཡིད་ཀྱི་སུན་སྣང་གི་མུན་པ་བརྟོལ།

རྒྱ་མོ་དེའི་ལུས་ལས་དྲི་བཟང་ཞིག་ཁྱབ།

ཡུན་རིང་ཁ་ཕྱེས་མེད་པའི་ཤོག་ལྷེའི་བར་གྱི་ཐལ་དྲི་ཡོངས་སུ་ཕྱགས།

འདི་ལྟར། སྒེག་གཟུགས་ཚ་བའི་རྒྱ་མོ་དེའི་འོ་འཛིན་ཟུང་གིས།

བདག་གི་ནན་ཏུར་རྒྱས་པོ་ཞུས་པའི་དཔེ་ཀློག་གི་ཡི་ག་ཁྱོན་ནས་འགག

ད་དུང་། ཕྲ་ཞིང་བཤན་མོ་ཡིན་པའི་མཛུབ་མོ་གཉིས་ལ་གཅིར་ཏེ།

དམར་ཞིང་བློ་བྲིད་ཁོག་ནས་བསྐྱེད་པའི་བིམ་པའི་མཆུ་ལས་རྔུབས་པའི་དུ་བ།

ཆགས་ཤེད་རབ་ཏུ་འགུག་པའི་ཨོང་ཏོ་གཡུགས་པའི་རྣམ་པ་དེས།

བདག་གིས། སྐབས་སྐབས་སུ་སྒེའུ་ཁུང་ཕྱིའི་གཡོ་འགུལ་གྱི་མི་ཚོགས།

ལྷིང་འཇགས་ཀྱི་རི་བོ། བསིལ་འཇམ་གྱི་སྤྲིན་པར་སེམས་པ་མ་བཅོལ་ཐུ་མེད།

རྒྱ་མོ་ངེད་གཉིས་མདུན་གཏད་ནས་སྡོད་སྐབས།

སེམས་པར་གློ་རྡེག་ཏུ་སྐྱིད་སྣང་ཞིག་གིས་སྙིང་ཁམས་འདེགས་ཡོང་།

སྐབས་སྐབས་སུ་བུ་མོ་དེ་རང་ཉིད་ཀྱི་ཡིན་སྣང་ཤར།

བུ་མོ་དེས་ང་ལ་བལྟས་ཏེ་འཛུམ་རེ་བསྟན་ཏེ་ཆགས་ཉམས་སྟོན།

ཀློག་པར་མི་མོས་པའི་མདུན་གྱི་ཡིག་ཚོགས་དག

སྙིགས་སྒམ་ལྟ་བུའི་རྒྱབ་ཁུག་ཏུ་གཡུགས།

མགོ་བོ་འཕྲེད་དུ་མདུན་ཅོག་ཏུ་བཞག

མིག་གིས་ཕྱེ་བཙུམ་མེད་པར་རྒྱ་མོའི་གདོང་ལ་གྱེར།

སྐབས་སྐབས་སུ་རྒྱ་མོས་ངོ་གནོང་ཞོར།

ཕྲ་ཞིང་སྐམ་དཀར་གྱི་ལག་མཛུབ་དག་གིས་སྒྲིབ་པར་བྱེད།

ཡིན་ཡང་། མིག་མདངས་དང་ཆགས་ཉམས་སྟོན་སྟངས་ཀྱིས།

མོའི་བྱ་བྱེད་དེ་དག་ཚུལ་འཆོས་ཡིན་པ་ར་འཕྲོད།

མ་གཞི་ནས་མི་ནི་བརྟན་ཚུགས་མིན་པའི་སྲོག་ཆགས་ཤིག

དེ་ལས་ཀྱང་བུད་མེད་ནི་གྱང་ཁའི་རྩྭ་ལས་ཀྱང་གཡོ་སླ།

རང་ཉིད་སེམས་ཀྱི་མེ་ཏོག་ཕྱིར་དུ།

ཁས་ལེན་དང་བློ་ཚུགས་ཇི་འདྲ་བརྟན་ཚུལ་ཡོད་ཀྱང་།

ཐམས་ཅད་འགྱུར་བའི་རང་བཞིན་ནོ།།