སྟོན་གསུམ་ནས་ཆང་གི་བཟི་ཁ་བཙན་པོ།།

འཚོ་བའི་དགོད་སྒྲ་དང་འབྲོག་གི་མཚེར་ཐོག།

སེམས་པའི་དབྱར་གཞུང་ལ་རྟ་ཕོ་ཚུར་འོང་།།

སྨིན་མའི་གཞིས་ཀ་ལ་འཁྲབ་གཞུང་བྲིས་ཡོད།།

མཛའ་གཞས་སྙན་མོ་ལ་རྨི་ལམ་ཆགས་འདུག།

ཚངས་དབྱངས་རྒྱ་མཚོ་དང་ཆུང་འདྲིས་བུ་མོ།།

ཆུ་མགོ་གཙང་མ་ལ་སྡིག་སྒྲིབ་བཀྲུས་ཚར།།

དང་མའི་གླུ་སྐད་ཅིག་ཞེ་འདང་དཀར་པོ།།

ཁ་བ་འབབ་བྱུང་ལ་ཡིད་དེ་འཁྱག་ཟེར།།

སྐྲ་ལོའི་ཁུགས་སོ་ན་དགའ་སྐྱོ་བསྣན་ནོ།།

ཚེ་ཡི་ལན་ཆགས་སུ་སྨོན་ལམ་བཏབ་པ།།

རྡོ་བའི་གས་སྲུབས་ལ་མེ་ཏོག་སྐྱེས་ཡོང་།།

ཉལ་ཐུལ་དཀར་པོ་རུ་མི་ཞིག་གཉིད་ཟིན།།

མཚོ་དེའི་ཕྱི་ནང་གཉིས་ཐབ་ཚང་ཡིན་སྐད།།

རྨི་ལམ་འཁྱུག་ཙམ་ལ་ཞྭ་མོ་བསླས་བཞིན།།

ལས་འཕྲོའི་རྩྭ་སྤུང་ནང་འུ་གཉིས་གབ་འདུག།

སེམས་ཀྱི་མཛེས་པ་ལ་སྟོན་ཁའི་མཚན་ནུབ།།

ཞོགས་པའི་མགྲོན་པོ་དག་ཆུ་ཁར་གཤར་སོང་།།

ཆུ་འགྲམ་ཆུ་མིག་ནང་གྲིབ་མ་གཉིས་འགྲོས།།

རྣ་བའི་བུ་གར་ནང་མཛའ་གཞས་བླངས་ཡོད།།

པི་ཝང་ཆུང་ངུ་ལ་དབྱངས་ཤིག་བཀུག་འདུག།

ཉི་ཟླ་མགོ་ཐོག་ནས་བགྲོད་བཞིན་མ་ཚོར།།

ཤ་བ་ཡུ་མོ་གཉིས་ཞེ་ལ་ཐོགས་འདུག།

དགུན་ཁའི་སྙིང་གཏམ་དེ་ཡིད་ལ་ཨེ་དྲན།།