འཇིག་རྟེན་གྱི་འོད།

གོ་ལ་ཧྲིལ་པོའི་ཁྱོན་དུ་ཁྱབ་དུས།

གནམ་འོག་གི་མཛེས་པ་ཡོད་ཚད།

རླབས་ཆེན་གྱི་མ་ཡུམ་ཉིད་ལས་བྱུང་།

ལོ་ཟླའི་ཁ་ཆར་བུ་ཡུག་གི་ཁྲོད་དུ།

བུ་ཕྲུག་གི་ཁ་ལུད་སྣ་ལུད་ཕྱིས་བཞིན།

འཇམ་པའི་གོས། ཞིམ་པའི་ཟས། སྙན་པའི་གཏམ།

ཐམས་ཅད་ཀྱི་ཡོད་ཚད་བུ་ཕྲུག་གི་ཆེད་དུ་བསམ།

སྔ་མོ་ཞིག་ནས།

ངེད་ཚོའི་ཕ་མེས་ཀྱི་ངག་རྒྱུན་དུ།

ཤེས་རིག་གིས་ཤེས་རྨོངས་ཀྱི་མུན་ནག་ལས་འགྲོལ་ཐུབ།

ཤེས་རིག་གི་ལམ་དུ་བཞུད་ན་བདེ་སྐྱིད་ཀྱི་ཐ་སྙད་ལ་བསྙེགས་ཐུབ།

ཤེས་རིག་ནི་འགྲོ་བ་མིའི་རིགས་ཀྱི་ཆེས་མཛེས་པའི་རྒྱན་ཆ་ཡིན་ཟེར།

ཤེས་རིག་གི་ཆེད་དུ།

བུ་ཕྲུག་རྣམས་རིམ་བཞིན་ནར་སོན་རྗེས།

ཀ་ཁ་དང་འཐབ་པའི་ལོ་ཟླས་བསུ་ཆང་གིས་ཕེབས་བསུ་ཞུས།

འཚར་ལོངས་ཁྲོད་ཀྱི་ལོ་ཟླ།

ཁྱེད་ཀྱིས་བུ་ཕྲུག་ལ་ཞེན་པའི་བརྩེ་བ་དྲོན་མོ་དང་།

ཁྱེད་ཀྱིས་བུ་ཕྲུག་ལ་བཅོལ་བའི་རེ་བའི་ས་བོན་ཡིན།

ལོ་ཟླ་དེ་དག་ནི་ཁྱེད་ཀྱི་རྔུལ་ཆུ་དྭངས་མ་དང་།

བརྩེ་བ་དེ་དག་ནི་ལོ་ཟླའི་གསེབ་ཏུ་གབ་པའི་དཔང་པོ་ཉག་གཅིག་གོ།

རྒས་བཞིན་པའི་ཁྱེད་ཉིད།

དུང་ལྟར་དཀར་བའི་དབུ་སྐྲ་དང་རྔ་གཡུག་ལྟར་གུག་པའི་ལུས་པོ།

ལྡབ་ལྡིབ་སྨྲ་བའི་སྐད་ཆ་དང་དྲན་པ་མི་གསལ་བའི་དབང་པོ།

དེ་དག་ཐམས་ཅད་ནི་ཁྱེད་ཉིད་རྒས་པའི་འདུས་གཟུགས་ཤིག

འཇིག་རྟེན་གྱི་འོད།

གནམ་འོག་གི་མཛེས་པ་དག་དྲིན་ཅན་གྱི་མ་ཡུམ་ཉིད་ལས་བྱུང་།

མ་ཡུམ་ལགས། ནམ་ཞག་རྒྱུན་དུ་ཡིད་ཀྱི་མཚོ་མོའི་ངོས་སུ་འཆར་

བ་ཁྱེད་ཀྱི་བཞིན་རས་ཡིན་ལ།

དྲན་པའི་མེ་ལོང་ངོས་སུ་འཆར་བ་ཡང་ཁྱེད་ཀྱི་ལྷད་མེད་པའི་བརྩེ་བ་

དྲོན་མོ་འདི་ཡིན།

འཁོར་བའི་དབྱིངས་སུ།

རླབས་ཆེན་མ་ཡུམ་གྱི་ངོ་སོ་དགུང་ནས་དགུང་དུ་བསྟོད་དོ།