ངས་བལྟས་ན།

གངས་ཆར།        2017-08-28

ལུས་ཀྱི་ལང་ཚོ་སྨིན་ཡང་། །

སེམས་ཀྱི་ལྟ་བ་མ་སྨིན། །

སེམས་ཀྱི་ལྟ་བ་སྨིན་ཡང་། །

ལུས་ཀྱི་འགྲུལ་བཞུད་མ་སྨིན། །

གང་ནས་ཡོང་བ་ཤེས་ཀྱང་། །

གང་དུ་བཞུད་དགོས་མི་ཤེས། །

གང་དུ་བཞུད་དགོས་ཤེས་ཀྱང་། །

བཞུད་རྒྱུའི་ལམ་ལ་མི་དགའ། །

སྨྲ་བ་ཉུང་ན་ལེགས་ཀྱང་། །

སྨྲ་བ་མང་བར་མཁས་སོང་། །

སྨྲ་བ་མང་བར་མཁས་ཀྱང་། །

དགོས་ངེས་གཏམ་འདི་དཀོན་འདུག །

རང་སྐྱོན་རང་གིས་མཐོང་དཀའ། །

གཞན་སྐྱོན་རང་གིས་མཐོང་སླ། །

གཞན་སྐྱོན་གཞན་གྱིས་བཅོས་ཀྱང་། །

རང་སྐྱོན་རང་གིས་བཅོས་དཀའ། །

ན་གཞོན་འདུ་འཛིར་དགའ་བས། །

ལང་ཚོ་བརླགས་པ་ཤེས་ཀྱང་། །

ལང་ཚོར་དམ་འཛིན་བྱེད་དུས། །

ལང་ཚོའི་མེ་ཏོག་རྙིད་ཟིན། །

གཟུགས་པོར་དོ་སྣང་བྱ་རྒྱུ། །

གཞོན་ནུའི་དུས་ནས་ཤེས་ཀྱང་། །

དངོས་སུ་དོ་སྣང་བྱེད་དུས། །

རྒན་རྒོན་དུས་ལ་སླེབས་ཟིན། །

ཤེས་རིག་ཡོན་ཏན་སྦྱང་རྒྱུ། །

སློབ་ཕྲུག་དུས་ནས་ཤེས་ཀྱང་། །

དངོས་སུ་སྦྱོང་བའི་དུས་ན། །

སློབ་གྲྭ་མཐར་ཕྱིན་ཟིན་བཞག །

ཕ་མའི་བཀའ་དྲིན་འཇལ་རྒྱུ། །

གཞོན་ནུའི་དུས་ནས་ཤེས་ཀྱང་། །

དངོས་སུ་བཀའ་དྲིན་འཇལ་དུས། །

ཡབ་ཡུམ་དགུང་ལོ་བགྲེས་སོང་། །

མི་ཡིས་མི་ལ་བལྟས་ན། །

མི་དང་མི་རྣམས་མི་མཚུངས། །

ཐ་སྙད་ཚད་མས་བལྟས་ན། །

ཤ་རུས་ཁྲག་གི་ཕུང་པོ། །

སྐད་དང་ཡི་གེའི་རིན་ཐང་། །

གླེང་མཁན་ནམ་མཁའི་སྐར་ཚོགས། །

ཁ་ནས་གླེང་བ་མ་གཏོགས། །

བཀོལ་སྤྱོད་བྱེད་མཁན་ཉུང་བ། །

དེ་རིང་བྱ་བ་དེ་རིང་། །

ངེས་པར་བསྒྲུབ་དགོས་ཟེར་གྱིས། །

ཉིན་མོ་དེ་རིང་འཆར་དུས། །

ལས་ཀ་སང་འགྱང་གནངས་འགྱང་། །

སེམས་པ་མི་སྐྱིད་ཟེར་ནས། །

ཨར་ཁང་ནང་དུ་ཕྱིན་སོང་། །

ཨར་ཁང་ནང་ལ་ཕྱིན་ན། །

སེམས་ནད་སྨན་པ་ཨེ་ཡོད། །

སེམས་པ་སྐྱོ་བའི་དུས་སུ། །

རང་ལ་འཁང་ར་མ་བྱེད། །

རང་ཉིད་རང་གི་བདེ་བ། །

སུས་ཀྱང་བཙོང་མཁན་མེད་དོ། །

བསམ་མནོ་སྔོན་དུ་བཏང་ན། །

མཁས་པ་ཡིན་ནོ་ཟེར་ཡང་། །

བསམ་བློ་རྗེས་ལ་འཁོར་དུས། །

བླུན་པོའི་ཚུལ་ཞིག་མཐོང་བྱུང་། །

རང་གི་བྱས་པའི་ལས་ལ། །

གནོང་འགྱོད་སྐྱེས་པ་གྲངས་མེད། །

མ་མཐའི་ཀུན་སྤྱོད་མེད་ན། །

གནོང་འགྱོད་སྐྱེས་ཀྱང་ཅི་བྱེད། །

སྐད་ཆ་ཁ་ནས་བཤད་ཀྱང་། །

གང་བསམ་སེམས་ལ་ཡོད་དོ། །

ཁ་སེམས་མཐུན་པོ་མེད་ན། །

ཁ་འདི་འོ་བརྒྱལ་ཆེ་རོགས། །

འགྲོ་བ་མིའི་རིགས་ཡིན་ན། །

མི་ཡི་ཆ་ལུགས་ཚང་དགོས། །

སྐྱེ་བ་མི་རུ་བླངས་ཀྱང་། །

མི་གཞི་ངན་ན་ཅི་བྱེད། །

ཟང་ཟིང་འཁོར་བ་འདི་རུ། །

ཡོད་ཚད་ཟང་ཟིང་འགྱུར་དུས། །

རང་ཉིད་རང་གི་སེམས་པ། །

ཅིས་ཀྱང་ལྷིང་འཇགས་དགོས་ངེས། །

ལུས་ཀྱི་བདེ་བ་སྐད་ཅིག །

སེམས་ཀྱི་བདེ་བ་ནམ་ཞར། །

ལུས་སེམས་གཉིས་ཀ་བདེ་ན། །

བདེ་བའི་ནང་གི་མཆོག་ཡིན། །

རང་ཉིད་རང་གི་མགོན་ཡིན། །

རང་ཉིད་དགྲ་ནི་རང་ཡིན། །

རང་ལ་བདེ་བ་དགོས་ན། །

རང་རང་སོ་སོས་འཚོལ་དགོས། །


  • ལེ་ཚན་སྔོན་མ།:རླུང་བསིལ་མོ་དེ་ང་ཡིན།
  • ལེ་ཚན་རྗེས་མ།:འཇིག་རྟེན་གྱི་འོད། གནམ་འོག་གི་མཛེས་པ།