མཚན་དཔེའི་ཡོན་ཏན་ཀུན་རྫོགས་མིག་འཁྲུལ་གྱི་སྒེག་མ།།

སྙན་དབྱངས་འགྱུར་ཁུག་བདག་མོ་མཚོ་བྱུང་གི་ཡི་དམ།།

སེ་གོལ་གཏོགས་སྒྲའི་ཡུན་ཙམ་བདག་བློ་ལ་གཟིགས་ནས།།

དངོས་གྲུབ་ཛ་ཧུའི་བུ་མོའི་ཆུ་ཐིགས་ཙམ་གསོལ་གྱུར།།

བཞི་མདོའི་ལམ་ན་གཟི་ཚོང་ཁ་གདངས་ཀྱི་ཕུག་ནང་།།

རྐང་དྲུག་ལྡིང་འཁོར་རྩེན་པ་མདོ་མེད་ཀྱི་འཁྱམ་པོ།།

ཚངས་སྲས་བཞད་སྒྲ་རྣ་བའི་བུ་རམ་དེ་མུར་བཞིན།།

ཧྲག་ཧྲག་སོར་སྨྱུག་མེ་ཏོག་ཕ་མ་ལ་ཕུལ་ལོ།།

གཡུ་ལོ་འདབ་སྟོང་གྲོལ་བ་མཚར་སྡུག་གི་མེ་ཏོག།

ལོ་ཟླའི་སད་སེར་དཔུང་གིས་བཙན་འཛུལ་རེ་བྱས་ཤིང་།།

སྐྱ་ཆིལ་དུང་ཟླ་ཚེས་པའི་སྐྲ་དཀར་གྱི་ནམ་མཁར།།

གཉེར་པའི་གཤོག་རླབས་འགྱུར་བའི་གླག་རྒོད་ཀྱང་མང་ངོ་།།

དབྱངས་བྱ་ཀ་ལ་པིང་ཀའི་རྣམ་སྤྲུལ་ལ་འཁུམས་པའི།།

སྙན་འཇེབས་གྲེ་བའི་སྒྱུ་རྩལ་ངོ་མཚར་གྱི་གཞས་དཔོན།།

སིམ་གདུང་བར་གསུམ་ཚོར་བ་ཟང་ཟིང་གི་ཀློང་ནས།།

ག་ལེར་གཞས་རའི་མཐར་སྤྱུགས་ངག་དིག་གི་ཕ་མ།།

སྐྱེ་དགུའི་བཀའ་དྲིན་མཚུངས་མེད་ཕ་ལོ་དང་མ་ལོ།།

ཙིཏྟ་སྲིད་པའི་གངས་རི་དཀར་པོ་ཡི་གདུང་རྟེན།།

ངག་རྒྱུད་གཙང་ཆབ་སྔོན་མོའི་འདུ་འཛོམས་ཀྱི་ཕ་ས།།

གཤིས་བཟང་གཡང་མོ་ལུ་གུའི་བལ་འཇམ་གྱི་ན་ཟླ།།

དཀར་དམར་ཁམས་ཀྱི་ས་བོན་ལས་དབང་གི་ཤག་ན།།

ཟླ་དགུ་ཞག་བཅུའི་དྲོ་སྐྱིད་སྒོམ་སྒྲུབ་ནས་གྲོལ་ཏེ།།

ན་ཟུག་ཚ་ཟུག་རྔུལ་ཆུའི་རྦ་རླབས་རེ་འཕྱུར་ཞིང་།།

ཕ་མ་སྔུག་བསྔལ་རྒྱ་མཚོར་ཆམ་ཆམ་ལ་རྩོམ་མོ།།

བསམ་མེད་དྲན་མེད་ལག་ཆུང་ཟོལ་མེད་དུ་གཡུགས་དུས།།

དངངས་སྐྲག་བྱ་སྒྲོ་བསིར་བུས་སྣང་མེད་དུ་འཁྱེར་ཡང་།།

འཛེམ་མེད་མཇེད་མེད་འཛུམ་མདངས་སྙིང་ནོར་ལ་བསྟན་ནས།།

ཨ་ཕ་ཨ་མ་ཟེར་བཞིན་སྨྲ་སྒོ་དེ་ཕྱེས་ཐལ།།

འཇམ་མཉེན་ཡ་ངའི་རྐང་ཆུང་ཀ་བ་ཞེས་ཟེར་ན།།

རང་འགན་ལུས་པོའི་གདུང་མ་མ་ཐེགས་པར་འཁྱོར་དུས།།

བྱམས་བརྩེའི་དྲོད་ཁོལ་ཕྱག་ཟུང་གཅེས་ཕྲུག་ལ་སྤྲད་ནས།།

ཡར་རྒྱས་འཕར་རྩ་ལྡིང་བའི་གསོན་ཤུགས་ཀྱི་གཞི་མ།།

འཛར་འཛར་རྦབ་ཆུར་བསྒྲུན་ནུས་ཞེ་ལོག་གི་སྣབས་རྟུག།

འཚུབ་འཚུབ་གསེར་མདོག་བསེ་རུའི་རྭ་ཅན་གྱི་ཕྱི་ས།།

ཅི་ཚོད་བློད་ཀྱང་ངང་མོ་པད་མཚོ་ལ་འཇུག་འཇུག།

བཙོག་མེད་བྱི་དོར་ལས་མཁན་དྲིན་ཆེན་གྱི་ཕ་མ།།

བཟའ་མཁས་བཏུང་མཁས་ལས་ཀྱི་སྐལ་རྫོངས་སུ་འཛིན་ཞིང་།།

དཀའ་སྤྱད་འབད་ཐབས་འཚོ་བའི་ལེགས་བཤད་དུ་སྒོམ་ལ།།

བུ་བཟང་བུ་མཛེས་མི་ཚེའི་སྙིང་པོ་རུ་འཐེན་མཁན།།

སངས་རྒྱས་སྐུ་ཤ་སློན་པ་དྲིན་ཅན་གྱི་ཕ་མ།།

ལྟོ་གོས་གཏམ་གསུམ་ཡོད་ཚད་བུ་ཆུང་གི་སླད་དུ།།

བདེ་བའི་བཞིན་རས་སྡིག་པའི་འདྲེ་མོ་ཡིས་བཤུས་ལ།།

སྐྱེ་རྒ་ན་འཆི་འཇིག་རྟེན་ཆུ་ཚོད་ཀྱི་སྦུབས་སུ།།

སྙིང་ཕྲུག་ཤ་ལྟར་གཅེས་མཁན་དྲིན་ཅན་གྱི་ཕ་མ།།

ཨེ་མ་མ་འགྱུར་རིགས་དྲུག་སེམས་ཅན་གྱི་ཕ་མ།།

ཀྱེ་ཧུད་སྔུག་བསྔལ་ཁྲག་དང་ཆུ་སེར་གྱི་གན་མཛོད།།

ཨ་ཧོ་བྱམས་བརྩེའི་བདག་ཉིད་ཡབ་ཆེན་དང་ཡུམ་ཆེན།།

ཁྱེད་ཀྱི་མཛད་པ་སྲིད་པའི་རྩེ་མོ་ན་རྒྱལ་ལོ།།