གངས་ཟེགས། 2020-07-29
དུང་སེམས་གཙང་མའི་ཟུར་མིག་མདའ་མོ། །
ཡིད་ཀྱི་སྙིང་ཆུང་དཀྱིལ་ལ་ཕོག་དུས།།
ཤ་དང་མཆིན་པའི་བར་གསེང་ཞིག་ནས།།
བརྩེ་བའི་ཁྲག་དམར་ས་ལ་ཟག་སོང་།།
ལས་དབང་རྟ་ཕོའི་བཙན་ཁ་རྒོད་པོས།།
སེམས་ཀྱི་འདུན་པ་ལ་ལུང་འཁྱེར་དུས།།
རྒྱུས་མེད་གསེར་རྟའི་བུ་མོ་ཞིག་ལ།།
དུང་བའི་སྙིང་གཏམ་འཕྲིན་པ་བསྐུར་ཡོད།།
ན་གཞོན་བརྩེ་བའི་བཟི་ཆང་མངར་མོ།།
འདང་བརྩེའི་ཤེལ་གྱི་ཕོར་བའི་ཁ་ནས།།
ཞེ་དང་སྙིང་གིས་ཧུབ་གང་བཏུང་ན།།
འཇིག་རྟེན་སྣང་བ་དུང་བས་བཟི་འགྲོ།།
སྲིད་པའི་སྤང་གཞུང་ཆུ་མོའི་འགྲན་ན།།
གཞོན་པའི་མཛའ་བརྩེ་མེ་ཏོག་བཞད་ཀྱང་།།
ཟུར་མིག་སེམས་ཀྱི་དན་རྟགས་ཡོན་པོ།།
གསེར་རྟ་ཆོས་ཀྱི་ཞིང་ལ་ཤོར་སོང་།།
མ་བཅོས་འོ་མའི་མདངས་དང་འདྲ་བའི།།
དུང་ཞེན་བསྲུབས་པའི་ཉིང་ཐིགས་དམར་པོ།།
མཛེས་ལྡན་གསེར་རྟའི་བུ་མོ་ཞིག་ལ།།
དམར་ཆུང་སྙིང་གི་དབུས་ནས་བྱིན་ཡོད།།
དབྱངས་གསལ་ངག་གི་གྲེ་འགྱུར་རྫོགས་ཤིང་།།
ཚོར་བའི་མེ་ལོང་གླུ་རུ་འགུགས་པའི།།
སྲོལ་རྒྱུན་དག་མའི་གཤིས་ཀ་དྲང་མོ།།
ད་དུང་ཁོ་བོའི་ཡིད་ལ་ཤར་སོང་།།
ལས་ཀྱི་སྲབ་ཁ་རླུང་གིས་བསྒྱུར་འདྲའི།།
སྲིད་པའི་བརྩེ་དུང་མེ་ཏོག་ཚལ་ནས།།
སེམས་ཀྱི་ཆར་རྒྱུན་ཁྱོད་ལ་འདྲེས་ཡོད།།
ཁྱོད་ཀྱི་ཟུར་མིག་ང་ལ་གནང་རོགས།།
རྩོམ་གསར། 10