རི་བོའི་སྤོ་ཡི་དར་ལྕེ་རླུང་གིས་ཁྱེར།།

ཆུ་བོའི་ལང་ཚོ་ཙག་དང་རླུང་གིས་གཅུན།།

ཉི་ཟླའི་ཟེར་བ་སྤྲིན་པར་ཡིབ་སྟངས་དེས།།

མི་རྟག་སྐད་པའི་དོན་དེ་སྙིང་ལ་ཕིགས།།

སྐྱོ་བའི་ཙག་གིས་ལུས་འདི་བརྟོལ་ནས་ཡོང་།།

མགྲིན་པའི་གསེབ་ཏུ་སྨྲེང་བའི་ལུད་པ་ཐོགས།།

སེམས་ཀྱི་མཁའ་ལ་སྤྲིན་པས་སྒྲིབ་པ་དེ།།

བདག་གི་འཁོར་བར་སྨྲེང་བ་འཐིབས་ཚུལ་ཡིན།།

ཞེ་ཡི་ཉི་མ་མུན་པའི་དབྲག་ཏུ་ཡིབ།།

ལོ་ཟླའི་ཁུད་དུ་གནག་མེད་རེག་ཟིག་བྲིས།།

སྨྲེང་བའི་མཚོ་མོ་སྐྱོམས་པའི་གྲུ་ཁ་འདིར།།

ང་རང་ཉིན་གཅིག་གསོན་པར་ཞེད་སྣང་མོད།།

ཕྱི་ཡི་རླུང་བུས་སྐྱོ་བའི་ཤུར་སྒྲ་འབྱིན།།

ནང་གི་ཉེ་དུ་ཀུན་གྱིས་སྨྲེ་སྔགས་འདོན།།

ཀྱེ་ཧུད་ང་ཡི་ནམ་མཁའི་ལྷ་ཚོགས་དག །

སྡུག་ལ་སྡུག་བསྔལ་འདི་འདྲ་བརྩེགས་དོན་ཅི།།

བསྐྱུད་དུ་མེད་པའི་གཏམ་རྒྱུད་ཞེ་ལ་བརྐོས།།

ན་ཟུག་སྟག་ཟླའི་གྲང་ངར་བཞིན་དུ་གཙེས།།

སེམས་འདི་འཁུམས་སོ་སྡུག་གི་མཚོ་མོར་འཐིམས།།

ཀྱེ་ཧུད་ཕ་ལོ་དྲན་པའི་ཉིན་ཞག་རིང་།།

སེམས་འདི་བློང་བློང་གྱུར་པས་དྲན་པ་ཐོར།།

ལུས་འདི་ཨ་ཐང་ཆད་པས་ཚོར་འདུ་ཉམས།།

སྡུག་གི་རབ་མེད་བརྒལ་བའི་ལོ་ཟླ་འདི།།

ཆུ་དང་ཆར་བས་བཀྲུས་ཀྱང་དག་ཐབས་དབེན།།