རང་གི་ལེའུ།

བཀྲ་ཤིས་ཆོས་ལྡན།        2017-06-21

རང་ལྟ་མཆོག་ཏུ་འཛིན་པ་དུག་དུ་མཐོང་། །

རང་དང་གཞན་གྱི་དོན་ཆེན་ཁུར་དུ་ལྕི། །

རང་བཞིན་བདེ་བ་ཆེན་པོར་རོལ་མཛད་པ། །

རང་རེའི་སྟོན་པའི་རྣམ་ཐར་ཡང་ཅིག་དྲན། །

 

རང་གཞན་གྲུབ་མཐའ་སྟོང་གི་སྔུན་སོ་ནས། །

རང་འདོད་མཆོག་ཏུ་འཛིན་པའི་རྟོག་གེ་བས། །

རང་དང་མི་མཐུན་ཁས་ལེན་འགའ་མཆིས་ན། །

རང་དབང་མེད་པར་ཐལ་བའི་རྡུལ་བཞིན་བརླག །

 

རང་གི་རྗེས་ལུས་གྲིབ་མའི་གཟུགས་མཐོང་ཚེ། །

རང་གིས་རང་ཉིད་ད་བཟོད་ངོ་ཤེས་ཀྱང་། །

རང་སེམས་རྒོད་པོ་གདོན་གྱིས་བཟི་དྲགས་པས། །

རང་གི་གདོང་པ་མཐོང་བའི་སྐལ་བ་བྲལ། །

 

རང་ཁྱིམ་དྲོན་ཁོལ་ལྡན་པའི་མལ་ས་ནས། །

རང་གཤིས་བལ་ལྟར་འཇམ་པའི་དྲིན་ཅན་མས། །

རང་གི་བུ་ལ་འདུན་པ་ཀུན་བཅོལ་ཀྱང་། །

རང་ཤེས་མེད་པའི་བུ་ཆུང་རེ་བས་ཕོངས། །

 

རང་ཉིད་ཉིན་མཚན་དུས་ཀྱི་འཁོར་ལོ་རུ། །

རང་སེམས་བདེ་བའི་ལམ་བཟང་འཚོལ་ཡང་རུང་། །

རང་དབང་མེད་པར་སྐྱེ་བའི་ཕྲེང་བ་ཀུན། །

རང་ལ་མི་འདོད་སྡུག་བསྔལ་ཆར་བཞིན་འཇོ། །

 

རང་ལ་རང་ཆས་ཡོད་པའི་ཤེས་རབ་མིག །

རང་འགུལ་མེད་པར་གཞན་གྱི་རྐང་འོག་ནས། །

རང་བཞིན་གྱིས་ནི་འགག་ཏུ་མ་བཅུག་པར། །

རང་ཤུགས་རང་གིས་འཛིན་པའི་རང་མཐོང་དགོས། །

 

རང་བྱུང་ཐོག་མའི་སེམས་ཀྱི་རྣོ་དབལ་ལ། །

རང་སྐྱ་ཐུབ་པའི་རྫས་ཀྱིས་གསོས་བཏབ་སྟེ། །

རང་དབང་བྲལ་བའི་གླེན་པའི་དད་མོས་དཔུང་། །

རང་འཐག་འཕྲུལ་གྱིས་རང་ཚུགས་གཏོར་ལ་རེམས། །

 

རང་ལུགས་མཚམས་འཛིན་ཙམ་ཡང་མི་ཤེས་པའི། །

རང་སྟོང་གཞན་སྟོང་གླེང་བའི་ཕོད་ཚོད་ཀྱིས། །

རང་སྤྱི་མཚན་ཉིད་གཏན་ལ་འབེབས་པ་ནི། །

རང་རྒྱུད་དུག་དང་འདྲེས་པ་ཐེ་ཚོམ་མེད། །

 

རང་གྲོལ་རང་ལ་བཏགས་པའི་མཁས་པ་དང་། །

རང་རྣམ་རང་གིས་བརྫུས་པའི་རྟོག་ལྡན་དང་། །

རང་བརྩིས་རང་གིས་བྱེད་པའི་བླ་མ་གསུམ། །

རང་ཅག་ཁ་བ་རི་པའི་ལན་ཆགས་ཡིན། །

 

རང་བྱུང་སེམས་ཀྱི་ཁོར་ཡུག་མཛེས་པ་ལ། །

རང་གཤིས་སྙིགས་མས་ཕྱུག་པའི་ཁེར་རྐྱང་ངར། །

རང་བཟོས་གསར་པའི་ལག་རྗེས་མ་བྱུང་ཚེ། །

རང་ག་བ་ཡི་མི་བཞིན་ཕན་པ་ཅི། །

 

རང་ཡུལ་ལག་མཐིལ་ཙམ་ལས་མ་འགྲིམས་ཀྱང་། །

རང་ལྟ་མཆོག་ཏུ་འཛིན་པའི་ཆེན་པོ་དག །

རང་དང་མི་འཚམ་བྱ་སྤྱོད་མཐོང་བ་ན། །

རང་གི་ནུས་ཤུགས་ཡོ་རྒུས་འཇོམས་པར་བྱེད། །

 

རང་ལ་འདོད་པའི་ནོར་རྫས་སྦྱིན་མཁས་པའི། །

རང་སྐྱ་ཐུབ་པའི་ལྷ་ཞིག་མ་འགྲུབ་ཀྱང་། །

རང་བཞིན་འཇིག་རྟེན་མི་ཡི་རྩེད་ར་ན། །

རང་ཉིད་ཁོ་ནར་དབང་བའི་འདྲེ་ཞིག་ཡོད། །

 

རང་རྒྱལ་ལྟ་བུའི་སྒེར་སེམས་མ་མཆིས་ཅིང་། །

རང་གཞན་དོན་ཆེན་འགྲུབ་པའི་བརྩེ་སེམས་མེད། །

རང་ལ་རན་པའི་བསམ་བློ་རྣལ་མ་དག །

རང་གི་ཁོར་ཡུག་ཧྲིལ་པོར་སྒྲོག་ན་འདོད། །

 

རང་མཚང་ཏིལ་འབྲུ་ཙམ་ཡང་མ་རིག་པའི། །

རང་རློམ་མཁའ་ལྟར་ཡངས་པའི་སྐྱེ་བོ་འགས། །

རང་ལས་གཞན་པའི་སྐྱེས་མཆོག་མ་མཐོང་ཞིང་། །

རང་ཉིད་སྲིད་པ་ཆེན་པོའི་མིག་ཏུ་བསྒོམས། །

 

རང་སྐལ་སྲོག་དང་བྲལ་ཡང་མི་གཏོང་བར། །

རང་འདོད་འབའ་ཞིག་སྒྲུབ་པའི་ཆོས་པ་དག །

རང་རང་འདོད་པའི་ཕྱོགས་སུ་རྒྱུགས་པ་ལས། །

རང་གི་གཏམ་གྱི་འདུན་མའི་ལམ་ཆེན་བོར། །

 

རང་ཚུགས་སྒལ་བ་ཆག་པའི་མཁྲེགས་འཛིན་དང་། །

རང་གཞན་ཐན་དུ་ལྟ་བའི་གཡམ་རྒྱུགས་ཙམ། །

རང་སྡེ་རང་གཞུང་འཛིན་ལ་ཆེས་གནོད་པས། །

རང་སེམས་གཙང་མ་མཐའ་བྲལ་དབུས་ལ་འཛུལ། །


  • ལེ་ཚན་སྔོན་མ།:དུས་བཞིར་བསྔགས་པ།
  • ལེ་ཚན་རྗེས་མ།:སྙིང་གཏམ་ཕར་ལབ་ཚུར་ལབ།