མེ་ཏོག་སྣ་མང་སྤང་ལྗོངས་ཁྲོད་ན་འཛུམ། །

རྐང་དྲུག་སྦྲང་མ་དགའ་བས་ཡོངས་སུ་མྱོས། །

སྤྲིན་གྱི་མེ་ཏོག་ས་འཛིན་ལྟེ་བར་འཐོར། །

དུས་བཞིའི་དབྱར་གྱི་འཚོ་བ་འདི་རྨད་དོ། །

འབྲུ་དྲུག་ཞིང་གི་ལོ་མའི་མགོ་བོ་ལྡེམ། །

ཞིང་པ་རྒན་པོ་དགའ་བའི་འཛུམ་གྱིས་གང་། །

འབྲུ་རིགས་སྣ་ཚོགས་ཁྱིམ་གྱི་མཛོད་དུ་སྤུངས། །

དུས་བཞིའི་སྟོན་གྱི་འཚོ་བ་འདི་རྨད་དོ། །

རི་ལུང་ཀུན་ཏུ་སྨུག་པ་ལང་ལོང་གཡོ། །

རྩི་ཤིང་ནགས་ཚལ་སོགས་ལ་གསོན་ཤུགས་རྒྱས། །

རྐང་གཉིས་སྲོག་ཆགས་འཚོ་བའི་ལས་ལ་བྲེལ། །

དུས་བཞིའི་དཔྱིད་ཀྱི་འཚོ་བ་འདི་རྨད་དོ། །

གཙང་ཆབ་སྔོན་མོ་འཁྱག་རོམ་སྦུབས་སུ་ཞུགས། །

ལྷབ་ལྷུབ་ཁ་བས་གྲང་ངར་མགྲོན་དུ་བསུས། །

ཨུག་ཆོའི་མེ་ཏོག་མཐོ་སྒང་རི་ནས་དགོད། །

དུས་བཞིའི་དགུན་གྱི་འཚོ་བ་འདི་རྨད་དོ། །