ང་ཡི་ཉིན་ཐོ་ནང་དུ།

ཆ་རྒྱུས་མེད་པའི་མིག་ཆུ་ཐིགས་པ་ཞིག་ལྷུང་།

མིག་ཆུ་དེས་བདག་གི་སེམས་པ་རྡོ་བ་ཞིག་

དང་འདྲ་བར་ཤིན་ཏུ་འཁྱག་པར་གཏོང་།

ང་ཡི་ཉིན་ཐོ་ནང་དུ།

ཁེར་རྐྱང་གི་རྩྭ་རྐང་ཐུར་ཞིག་སྐྱེས།

དེ་ནི་དོན་སྙིང་དབུལ་བའི།

ལོ་གཅིག་གི་བྱ་གཞག་དང་།

བདེ་སྡུག་མཚོན་བྱེད་དུ་གྱུར།

ང་ཡི་ཉིན་ཐོ་ནང་དུ།

མཚན་མོར་དཔོག་དཀའ་བའི་

མུན་ནག་དང་རྨི་ལམ་ལས།

ཉིན་མོ་མཐོང་ཐུབ་པའི་འོད་སྣང་དང་།

འཚོལ་སྙེག་གཞན་ཅི་ཡང་མི་འདུག

ང་ཡི་ཉིན་ཐོ་ནང་དུ།

ཚེ་སྟོད་སེམས་ཁུར་དང་དཀའ་སྡུག

བོར་བའི་བྱིས་པ་ཞིག

ཚེ་སྨད་ན་ཟུག་དང་སྐྱོ་གཏམ་གླེང་བའི་མི་

དར་མ་ཞིག་ཏུ་འགྱུར་བའི་གོ་རིམ་བྲིས།

དེ་ནི་ཤིན་ཏུ་གྲང་བའི་དགུན་

གཞུང་གི་རླུང་ཁ་རུ་གཅེར་རྗེན་

དུ་བུད་པ་ལས་ཀྱང་ཐབས་སྡུག་ཨང་།

ང་ཡི་ཉིན་ཐོ་ནང་གི་འཚོ་བ་ཡོད་

ཚད་ནི་ཤིན་ཏུ་འཁྱག

ཤིན་ཏུ་འཁྱག

དེ་ནི་གཞན་གྱིས་ཚོར་མི་དགོས་པར།

རང་གི་ལག་ཟུང་རང་གི་བྲང་

ཁ་སྦྱར་ན་རྟོགས་ཡོང་།